«Nyrku nie pierasadzili». 73-hadovaha palitviaźnia Vasila Bieraśnieva viarnuli ŭ kałoniju
Prafsajuzny aktyvist u źniavoleńni pakutuje ad nyrkavaj niedastatkovaści.
Pra situacyju z palitviaźniem Vasilom Bieraśnievym «Radyjo Svaboda» raskazaŭ Maksim Paźniakoŭ, jaki znachodzicca za miažoj i časova vykonvaje abaviazki staršyni Biełaruskaha kanhresa demakratyčnych prafsajuzaŭ (BKDP).
«Jaho abśledavali ŭ špitali na praciahu dvuch dzion i adpravili nazad u kałoniju. Vynikaŭ nie paviedamili. Skazali, što atrymaje potym, u kałonii. Krynicy, ź jakimi ja kantaktavaŭ, navat nie viedajuć, jak jon ciapier pačuvajecca», — skazaŭ «Svabodzie» Maksim Paźniakoŭ.
Pavodle Maksima Paźniakova, Vasila Bieraśnieva viarnuli ŭ kałoniju ŭ pieršaj pałovie kastryčnika.
U 73-hadovaha Bieraśnieva adna nyrka. Prablemy sa zdaroŭjem u palitviaźnia abvastrylisia jašče ŭ SIZA, a ŭ kałonii № 15, što pad Mahilovam, stan zdaroŭja rezka pahoršyŭsia. Pavodle daśviedčanych krynic, u jaho pavysiŭsia cisk i pačalisia mocnyja boli ŭ nyrcy. Jak stała viadoma pravaabaroncam «Viasny», Vasila Bieraśniova na pačatku kastryčnika zabrali z kałonii i pakłali na abśledavańnie ŭ Mahiloŭski abłasny špital.
«Situacyja krytyčnaja. Kali sapraŭdy nieabchodnaja pierasadka, treba bić va ŭsie zvany i rabić heta nieadkładna. A ŭvohule — palitviaźnia treba vyzvalać, i jak maha chutčej, i dziela hetaha vykarystoŭvać usie mahčymaści», — kazaŭ na pačatku kastryčnika pravaabaronca Ihar Kaźmierčak.
Pavodle Maksima Paźniakova, jamu nieviadoma, čamu ŭ Mahiloŭskim abłasnym špitali Vasilu Bieraśniovu apieracyju pa pierasadcy nyrki tak i nie zrabili. «Maje krynicy pra dyjahnaz taksama nie viedajuć», — skazaŭ Maksim Paźniakoŭ.
Vasil Bieraśnieŭ — lidar aršanskaha niezaležnaha prafsajuza REP, byŭ vykanaŭcam abaviazkaŭ staršyni prafsajuza REP. Prafsajuznaha aktyvista zatrymali 19 krasavika 2022 hoda ŭ miežach kryminalnaj spravy suprać kiraŭnikoŭ niezaležnych prafsajuzaŭ. Sioleta ŭ studzieni Mienski haradski sud pakaraŭ lidaraŭ prafsajuza REP vialikimi terminami źniavoleńnia. Hienadź Fiadynič i Vasil Bieraśnioŭ atrymali pa 9 hadoŭ kałonii, Viačasłaŭ Areška — 8 hadoŭ.
Bieraśnieva, Fiadyniča i Arešku pryznali vinavatymi pavodle čatyroch artykułaŭ Kryminalnaha kodeksa.
Vasil Bieraśnieŭ viny nie pryznaŭ. Biełaruskija pravaabaroncy pryznali aktyvista palityčnym viaźniem.
Što čakaje Biełaruś u bližejšyja piać hadoŭ? A Rasiju i Jeŭropu? Śpiecdakładčyk AAN pa Biełarusi daje svoj raskład3
Kamientary