Parłamient Jeŭrapiejskaha sajuza škaduje, što paśla šerahu stanoŭčych krokaŭ biełaruskich uładaŭ u krainie niama istotnaha prahresu ŭ śfiery pravoŭ i svabod.
Parłamient Jeŭrapiejskaha sajuza škaduje, što paśla šerahu stanoŭčych krokaŭ biełaruskich uładaŭ u krainie niama istotnaha prahresu ŭ śfiery pravoŭ i svabod. Pra heta havorycca ŭ rezalucyi Jeŭraparłamienta, pryniataj 17 śniežnia bolšaściu hałasoŭ.
Pierad pačatkam hałasavańnia ŭ rezalucyju byŭ uklučany zaklik da biełaruskich uładaŭ rasśledavać vypadki vykradańnia maładziožnych aktyvistaŭ, a taksama hibieli apazicyjaniera z Marjinaj Horki (Puchavicki rajon Minskaj vobłaści) Valancina Doŭnara.
U dakumiencie vitajecca rašeńnie Rady ES pradoŭžyć u dačynieńni da biełaruskich čynoŭnikaŭ sankcyi da kastryčnika 2010 hoda, a taksama zamarozić ich na hety termin. Na dumku deputataŭ, dyjałoh pa pravach čałavieka ź Biełaruśsiu «pavinien stavić na mecie kankretnyja vyniki i istotny prahres u śfiery demakratyzacyi i viaršenstva zakonu».
U vypadku dastatkovaha prahresu sankcyi ŭ dačynieńni da krainy pavinny być admienieny, a pracesy intehracyi paskorany, zaznačajecca ŭ rezalucyi.
Deputaty Jeŭraparłamienta zaklikali Jeŭrakamisiju razhledzieć mahčymaść źmianšeńnia koštu viz dla biełarusaŭ i spraścić praceduru ich atrymańnia, a taksama padrychtavać rekamiendacyi dla pieramoŭ pa pahadnieńniach ab ablahčeńni vizavaha režymu i readmisii. Rekamiendavana taksama stvaryć pramiežkavy płan pryjarytetnych reform u Biełarusi, kab viarnucca da padpisańnia Pahadnieńnia ab partniorstvie i supracoŭnictvie.
«Dyjałoh pa Jeŭranieście pavinien być praduktyŭny, — havorycca ŭ dakumiencie. — Biełaruś budzie zaprošana da paŭnavartasnaha ŭdziełu, kali parłamient krainy budzie abrany ŭ vyniku svabodnych vybaraŭ. Pakul ža ŭsie rašeńni pramiežkavyja».
U rezalucyi ŭtrymlivajecca rekamiendacyja Jeŭrapiejskamu inviestycyjnamu banku i Jeŭrapiejskamu banku rekanstrukcyi i raźvićcia razhledzieć mahčymaść pavieličeńnia finansavaj dapamohi Biełarusi, asabliva drobnamu i siaredniamu biźniesu.
Jeŭradeputaty vitali aktyŭny ŭdzieł biełaruskich uładaŭ u palitycy ES «Uschodniaje partniorstva».
Jany zaklikali Minsk praciahvać supracoŭnictva z ABSIE pa refarmavańni vybarčaha zakanadaŭstva, a taksama raźvivać dyjałoh z demakratyčnaj apazicyjaj, u pryvatnaści vyznačyŭšy rolu Hramadska‑kansultacyjnaha savieta pry Administracyi prezidenta.
Jeŭraparłamientaryi čakajuć, što ŭ najbližejšy hod biełaruskija ŭłady refarmujuć zakon ab ŚMI ŭ adpaviednaści z rekamiendacyjami mižnarodnych ekśpiertaŭ; admieniać artykuł 193‑1 Kryminalnaha kodeksa; dazvolać rehistracyju palityčnych partyj i arhanizacyj hramadzianskaj supolnaści; stvorać spryjalnyja ŭmovy dla pracy NDA i niezaležnych ŚMI.
U dakumiencie ŭtrymlivajecca zaklik da biełaruskich uładaŭ pierahledzieć prysudy, vyniesienyja ŭdzielnikam «spravy čatyrnaccaci», u pryvatnaści Arciomu Dubskamu, i nieadkładna vyzvalić z‑pad varty vaŭkavyskich pradprymalnikaŭ Mikałaja Aŭtuchoviča i Uładzimira Asipienku.
Jeŭradeputaty vykazalisia za «nieadkładny maratoryj» na śmiarotnuju karu ŭ Biełarusi. Jany taksama zaklikali Minsk pryznać Sajuz palakaŭ na Biełarusi na čale z Anžalikaj Borys i vykonvać pravy nacyjanalnych mienšaściej.
Natalla Kalehava raskazała pra dapamohu biełaruskim uciekačam, svaju siamju, staŭleńnie da Cichanoŭskaj. I patłumačyła, chto takija «babry» i «zajcy»34
Kamientary