Čerhi na maršrutki ŭ rajonie stancyi mietro «Uschod», zdajecca, byli zaŭsiody. Adsiul ludzi jeduć pa damach u blizki pryharad, u tym liku i ŭ Łahojsk. Ale niadaŭna zdaryŭsia kałaps: na zvykłyja rejsy maršrutki raptam nie vyjšli. Što adbyłosia z maršrutkami Łahojsk — Minsk, raźbirałasia Tochka.by.
Kvest z maršrutkami
U Łahojskim rajonie žyvie bolš za 35 tysiač čałaviek. Viadoma, mnohija vučacca i pracujuć u stalicy. Na transpartnyja znosiny ludzi ŭ pryncypie nikoli nie skardzilisia: byli maršrutki, chadzili i aŭtobusy.
Ale ŭ kancy kastryčnika mnohija kiroŭcy maršrutnych taksi prosta nie vyjšli na pracu. Prablema zakranuła ŭvieś rajon, pryčym nie tolki ŭ hadzinu pik, dniom intervały pamiž rejsami pavialičylisia da hadziny i bolš.
«Ź niejkaj pryčyny źmienšyłasia kolkaść maršrutak. Kali raniej jany kursiravali kožnyja 15-20 chvilin, to zaraz miesca nielha zabraniravać navat na nastupny tydzień. Kažuć, što pačalisia niejkija razborki pamiž pryvatnikami, maŭlaŭ, jany ledź nie padrazajuć adzin adnaho na darohach, dzielać rynak i pasažyraŭ. Ale pakutujem my», — padzialiŭsia žychar Łahojska.
Jon kaža, što aŭtobusaŭ ad dziaržaŭnaha pieravozčyka niedastatkova. Šmat hadoŭ tamu na hetym kirunku pačali ščylna pracavać pryvatniki i adrazu paciaśnili mienš pavarotlivych dziaržaŭnych kankurentaŭ. Bo dajechać na maršrutcy z kamfortam i chutčej kaštavała adnosna niadoraha — usiaho 4 rubli.
Ciapier zusim biada.
«Dzicia chodzić na dadatkovyja zaniatki. Vyjšła na maršrutku da patrebnaha času i nikudy nie źjechała. Akramia taho, astatnija maršrutki vymušanyja taksama pracavać z parušeńniami i nabirać ludziej u pierapoŭnienyja sałony (a ŭsie my pamiatajem, što było pad Smalavičami). Ludzi skandalać, usie pryvykli da kamfortu», — raspaviadaje chłopiec.
Jak kažuć žychary Łahojska, na maršrucie zastalisia dva nievialikija pryvatniki i dziaržaŭny transpart. I hetaha nie chapaje. Dy i čas na darohu ciapier pavialičyŭsia: kali raniej maršrutki prajazdžali tolki praz Baraŭlany i naŭprost na Minsk (i nazad adpaviedna), to ciapier jeździać u abjezd i praź inšyja vioski.
Zhodna z płatformaj «Atłas», na jakoj možna zabraniravać maršrutku, na Łahojskim napramku sapraŭdy praktyčna niama svabodnych miescaŭ i naohuł nivodnaha bileta — na budnija dni paśla doŭhich vychadnych.
A aŭtobusy «Minabłaŭtatransa» (aŭtaparka № 12) pakul jašče nie zmahli spravicca z uzrosłaj nahruzkaj.
Što zdaryłasia i dzie maršrutki?
U Asacyjacyi prafiesijnych pieravozčykaŭ pasažyraŭ (APPP) zajavili, što pryvatnyja maršrutčyki pracavali nie pa praviłach.
«Na praciahu šaści hadoŭ na hetym maršrucie niezakonna pracuje pieravozčyk pad brendam płatformy «Atłas». U jaho nie byŭ zaklučany dahavor z apierataram maršrutu. U pačatku vieraśnia za parušeńni ŭ jaho była kanfiskavanaja adna maršrutka. Niedachopy nie byli vypraŭlenyja, a dziejnaść jon nie lehalizavaŭ. Zatym kanfiskavali jašče adnu mašynu, zatym — jašče dźvie. Usio za surjoznyja parušeńni», — raspaviadaje staršynia APPP Kaciaryna Stankievič.
Pa słovach surazmoŭnicy, u adpłatu pieravozčyk vyrašyŭ, što z 27 kastryčnika całkam admianiaje ŭsie svaje rejsy. Maršrut byŭ paralizavany na niekalki hadzin.
«Naturalna, dziaržaŭnamu i pryvatnamu pieravozčykam, jakija zakonna pracavali na maršrucie, treba čas pierastroicca. Pierad imi šeść hadoŭ zabirali pasažyraŭ, rejsaŭ było niašmat. A ciapier voś takim voś presinham i šantažom niesumlennyja hulcy rynku sprabujuć vybić sabie pryvilei», — upeŭnienaja Kaciaryna Stankievič.
Bolš za toje, praź dzień, kali maršrutki byli prybranyja z rejsa, «Minabłaŭtatrans», kab paźbiehnuć kałapsu, u ekstrannym paradku padrychtavaŭ damovy, kab dapamahčy pieravozčyku na Łahojskim kirunku lehalizavać pracu. Za hetymi damovami toj pryjechaŭ, paabiacaŭšy vyjści 3 listapada na maršrut. Ale nie vyjšaŭ.
«Moža być, siońnia budzie ciažka — ažyjataž, napieradzie doŭhija vychadnyja. Ale ŭsich vyvieziem, z usim spravimsia. Situacyja adnaznačna patrabuje ŭrehulavańnia. I žychary Łahojskaha rajona buduć atrymlivać jakasnaje i biaśpiečnaje absłuhoŭvańnie ź biletam», — dadaje staršynia APPP.
Dadatkovyja rejsy ŭžo dadadzienyja, buduć jašče i aŭtobusy. Situacyju abiacajuć vypravić u najbližejšyja dni.
Da kanca pracoŭnaha dnia ŭ piatnicu na prypynku nie było niejkaj składanaj situacyi: stajali dźvie maršrutki, nabirali pasažyraŭ, padjechaŭ i aŭtobus. Ludzi kažuć, što prablemy z transpartam byli, ale ciapier stała lepš.
Što kaža pieravozčyk?
Pa tłumačeńnie žurnalisty źviarnulisia i da druhoha boku — pieravozčyka, jaki pracuje na Łahojskim kirunku. Jon zapeŭniŭ, što nichto «nie strajkuje».
«Praca idzie ščylnaja z «Minabłpasažyrtransam» (apierataram pieravozak, jaki vydaje dazvoł pracavać na hetym maršrucie. — Tochka.by) pa pavieličeńni pasažyrapatoku. U nas transpartnaja inśpiekcyja zabrała čatyry mašyny, jany stajać da vyśviatleńnia abstavinaŭ. Kałaps uźnik praz toje, što zabrali mašyny», — patłumačyŭ pieravozčyk.
Ź jahonych słoŭ, pryčyna kanfiskacyi transpartu jamu nie viadomaja: jašče nie składzienyja pratakoły, mahčyma, budzie rychtavacca piarečańnie, moža być, sprava dojdzie da suda.
Biznesmien zapeŭniŭ, što praca pa atrymańni dazvołaŭ na pracu na hetym maršrucie praciahniecca: 3 listapada ŭžo atrymali «kartki» na rejsy pa rajonie praź niekatoryja vioski, płanujecca pavialičyć mašyny na 93-m rejsie — samym zahružanym maršrucie.
Adnak, adznačyli ŭ Asacyjacyi, kali pieravozčyk atrymaŭ hetyja niekalki dazvołaŭ, maršrutki na rejs u piatnicu ŭ hadzinu pik tak i nie vyjšli.
Kamientary