Eks-kiraŭnik MZS Kitaja Cyń Han pamior z-za katavańniaŭ ci suicydu ŭ vajskovym špitali Piekina — Politico
Jak paviedamiła krynica, były kiraŭnik MZS Kitaja Cyń Han moh pamierci jak niepasredna ad atrymanych traŭmaŭ, tak i ździejśnić suicyd. I heta nie pieršy vypadak źniknieńnia vysokapastaŭlenych čynoŭnikaŭ. Si pravodzić čystki, paraŭnalnyja sa stalinskimi.
Jak piša Politico, u toj čas jak śviet adciahnuty vajnoj na Blizkim Uschodzie i va Ukrainie, u zvyšsakretnaj palityčnaj sistemie Kitaja prachodziać stalinskija čystki, jakija majuć hłybokija nastupstvy dla suśvietnaj ekanomiki i navat dla pierśpiektyŭ miru ŭ rehijonie.
Vorahi paŭsiul
U lik hučnych achviaraŭ akramia byłoha kiraŭnika MZS i ministra abarony krainy ŭvachodziać hienierały, jakija adkazvajuć za kitajskuju prahramu stvareńnia jadziernaj zbroi, i niekatoryja vysokapastaŭlenyja čynoŭniki, jakija kuryrujuć kitajski finansavy siektar. Asobnyja z hetych byłych pamočnikaŭ Si Czińpina, mahčyma, pamierli ŭ źniavoleńni.
Jašče adnoj złaviesnaj prykmietaj źjaŭlajecca zaŭčasnaja śmierć Li Keciana, jaki niadaŭna vyjšaŭ u adstaŭku z pasady premjer-ministra Kitaja. Paviedamlajecca, što Kecian pamior ad sardečnaha prystupu ŭ basiejnie ŭ Šanchai ŭ kancy kastryčnika. I heta niahledziačy na toje, što karystaŭsia adnymi z najlepšych u śviecie miedycynskimi pasłuhami. Paśla jaho śmierci Si Czińpin zahadaŭ istotna skaracić publičnuju žałobu.
Jak adznačaje vydańnie, u razumieńni mnohich u Kitai «sardečny prystup u basiejnie» maje toj ža sens, što i «vypadzieńnie z akna» dla rasijskich aparatčykaŭ, jakimi niezadavoleny Uładzimir Pucin.
U ramkach tak zvanaj «karupcyjnaj kampanii», jakuju Si pačaŭ u 2012 hodzie, byli praviedzieny hrandyjoznyja čystki. Sotni staršych aficeraŭ Narodna-vyzvalenčaj armii (NVAK), a taksama tysiačy najvyšejšych partyjnych čynoŭnikaŭ byli aryštavanyja, źnikli abo «skončyli žyćcio samahubstvam» (byli daviedzieny da samahubstva abo zabityja pry abstavinach, padobnych da samahubstva).
Bienieficyjarami hetaj šmathadovaj čystki stali pravincyjnyja biurakraty, jakija pracavali ź Si Czińpinam u pačatku jaho karjery, čyja hałoŭnaja kvalifikacyja — biezumoŭnaja łajalnaść «narodnamu lidaru».
Adroźnieńnie situacyi ŭ tym, što słužbovyja asoby, jakija niejtralizujucca, źjaŭlajucca nie siabrami varožych palityčnych frakcyj, a łajalistami z unutranaha kalca ŭłasnaj kliki Si. I heta vyklikaje surjoznyja pytańni adnosna stabilnaści režymu.
Chłopcy z maleńkich haradoŭ
Paśla praviedzienych čystak bolšaść u najvyšejšym kiraŭnictvie krainy zajmajuć całkam łajalnyja Si byłyja čynoŭniki z maleńkich haradoŭ. Adnym ź ich i byŭ ministr zamiežny spraŭ Cyń Han, jaki niečakana źnik paśla taho, jak 25 červienia pravioŭ sustrečy ŭ Piekinie ź ministrami zamiežnych spraŭ Šry-Łanki i Vjetnama, a taksama z namieśnikam ministra zamiežnych spraŭ Rasii Andrejem Rudenkam.
Pa słovach niekalkich čałaviek, jakija majuć dostup da vysokapastaŭlenych kitajskich čynoŭnikaŭ, sapraŭdnaja misija Rudenki ŭ Piekinie składałasia ŭ tym, kab prainfarmavać Si Czińpina ab tym, što jaho ministr zamiežnych spraŭ i niekalki vyšejšych aficeraŭ NVAK byli skampramietavanyja zachodnimi śpiecsłužbami.
Paśla źniknieńnia Cyń Hana źjavilisia historyi pra jaho raman z reparciorkaj kitajskaj telekampanii, ad jakoj u jaho nibyta naradziŭsia syn, jaki źjaŭlajecca hramadzianinam ZŠA. Hetyja historyi šyroka raspaŭsiudzilisia ŭ internecie ź vidavočnaj zhody kitajskich kibiercenzaraŭ.
Na dumku niekalkich čałaviek, jakija majuć dostup da vysokapastaŭlenych čynoŭnikaŭ, sapraŭdnaj pryčynaj jaho raptoŭnaha źniknieńnia stała dačynieńnie Cynia da značna bolš surjoznaha skandału, u jakim zamiašanyja ministr abarony i hienierały, jakija kamandavali kitajskimi «rakietnymi siłami», što kuryrujuć prahramu stvareńnia jadziernaj zbroi ŭ krainie.
Dvoje z hetych ludziej śćviardžajuć, što Cyń pamior u vyniku samahubstva ci katavańniaŭ u kancy lipienia ŭ vajskovym špitali ŭ Piekinie, dzie lečać najvyšejšych kiraŭnikoŭ Kitaja.
Pa słovach ludziej, jakija majuć dostup da vysokapastaŭlenych kitajskich čynoŭnikaŭ, pasłańnie rasijskaha namieśnika ministra Rudenki Si Czińpinu źmiaščała śćviardžeńni ab tym, što Cyń i svajaki najvyšejšych aficeraŭ rakietnych vojskaŭ dapamahli pieradać kitajskija jadziernyja sakrety zachodnim śpiecsłužbam.
Amal u toj ža čas, kali źnik Cyń, źnikli i hałoŭny kamandujučy rakietnymi vojskami Li Jučaa, i jaho byłyja i dziejnyja namieśniki. Taksama źnikła niekalki inšych vysokapastaŭlenych aficeraŭ.
Nieŭzabavie źnik Li Šanfu, čałaviek, jakoha Si pryznačyŭ ministram abarony Kitaja ŭ sakaviku hetaha hoda. Ab jaho aficyjnym zvalnieńni było abjaŭlena ŭ kancy kastryčnika. Da hetaha było abvieščana ab tym, što z-za «nieefiektyŭnaha miedycynskaha lačeńnia» pamior Van Šaacziuń — kamandujučy padraździaleńniem Centralnaj hvardyi, jakoje abaraniaje vyšejšych kiraŭnikoŭ Kitaja i kuryruje asabistuju achovu staršyni Si Czińpina.
Paranoja kiraŭnictva
Uličvajučy nieprazrystaść kitajskaj sistemy, niemahčyma kančatkova paćvierdzić hetyja paviedamleńni, i kitajski ŭrad nie kamientuje ŭnutranaj pracy Kamunistyčnaj partyi. Ale siensacyjny charaktar samich zajavaŭ jasna pakazvaje paranoju, jakaja achapiła Piekin. Jana raspaŭsiudžvajecca na ŭsie śfiery biurakratyi i ekanomiki i, padobna, zaplamiła luboha, kaho ličyli zanadta viesternizavanym abo zanadta blizkim da «varožych zachodnich sił».
Vypadkova ci naŭmysna, adznačaje vydańnie, hety nastroj abvastryŭsia letam, kali dyrektar Centralnaha raźviedvalnaha ŭpraŭleńnia ZŠA Uiljam Bierns zajaviŭ, što CRU «dabiłasia prahresu» ŭ adnaŭleńni svajoj sietki ŭ Kitai i maje «mocny patencyjał čałaviečaj raźviedki» ŭ krainie.
Analityki aścierahajucca, što izalavany i paranaidalny staršynia Si moža praličycca, spravakavać uzbrojeny kanflikt z adnym sa svaich bolš słabych susiedziaŭ ci navat pačać poŭnamaštabnaje ŭvarvańnie na demakratyčny Tajvań, kab adciahnuć uvahu ad jaho ŭnutranych prablem.
Čytajcie jašče:
Stała viadomaja pryčyna raptoŭnaha zvalnieńnia ministra zamiežnych spraŭ Kitaja
Si Czińpin niečakana źmianiŭ kamandavańnie jadziernych sił Kitaja
Kamientary
Z hetym Czińpiniam chvalujuś za vierabjeu.
.Viernym putiem iditie kamrad si- mao)))