Prajekt Reform.by na miažy zakryćcia. Pra heta napisaŭ hałoŭny redaktar Reform.by Fiodar Paŭlučenka. U redakcyi zastałosia hrošaj na paŭtara-dva miesiacy pracy.
Jak piša Paŭlučenka, 19 śniežnia 2023 hoda redakcyja atrymała admovu ŭ padtrymcy ad klučavoha jeŭrapiejskaha instytucyjnaha donara. «Tłumačeńniaŭ my nie atrymali, jany i nie mielisia na ŭvazie. My pavažajem hetaje rašeńnie, choć i nie možam ź im pahadzicca», — piša jon.
Reform.by jak paŭnavartasnaje miedyja było stvoranaje ŭ žniŭni 2018 hoda. Jaho inicyjavali troje žurnalistaŭ ź vialikim dośviedam pracy — Alaksiej Žukaŭ, Alaksandr Atroščankaŭ i Fiodar Paŭlučenka.
«U nas byŭ dakładny płan na 3-4 hady, jakim čynam my znojdziem svajo miesca na vielmi kankurentnym rynku. Da leta 2020 hoda naš sajt naviedvała kala 100 tysiač biełaruskich karystalnikaŭ kožny dzień, i my całkam mahli finansavać siabie za košt rekłamy. Niadrenny vynik dla dvuch hadoŭ pracy miedyjastartapu», — piša jon.
Vydańnie aśviatlała padziei 2020 hoda ŭ krainie. «Dziakujučy papiaredniaj padrychtoŭcy, tolki Reform.by byŭ dastupny dla karystalnikaŭ ź Biełarusi ŭ žniŭni, u tyja niekalki dzion błakiroŭki źniešniaha internieta. Adnamu bohu viadoma, kolki naviedvalnikaŭ u nas było ŭ tyja dni — ličylniki nie pracavali», — piša hałoŭred.
Pavodle Paŭlučenki, u 2021 hodzie ŭ siarednim kožny dzień ad 300 da 500 tysiač biełarusaŭ čytała materyjały vydańnia.
Reform.by acanili nie tolki čytačy, ale i ŭłady. Pačalisia pieraśledy žurnalistaŭ, kryminalnyja spravy, dopyty. Redakcyja zjechała z krainy svoječasova, nichto ŭ turmu nie patrapiŭ. U žniŭni 2021 hoda Mininfarm zabłakavaŭ damien dla biełaruskich karystalnikaŭ.
Paśla pačatku poŭnamaštabnaj vajny błakiroŭku pačali i rasijskija cenzary. Sajt vykinuli z rasijskich ahrehataraŭ navin i zabłakavali ŭ Rasii.
Redakcyja prykłała maksimum namahańniaŭ, kab pradoŭžyć pracu za miežami Biełarusi.
«Ja hanarusia tym, što my paśpieli zrabić za hetyja 5 hod. Našy žurnalisty pravodzili adny z samych składanych i rezanansnych rasśledavańniaŭ, naš «Ihar Lankievič» — adzin ź lepšych hramadska-palityčnych analitykaŭ, Saša Atroščankaŭ robić vielmi dobryja intervju, z nami supracoŭničaje adzin z najlepšych žurnalistaŭ pa kulturnaj tematycy, my robim adnu z najlepšych, kali nie samuju lepšuju stužku navin u krainie. Našu pracu adznačyli — redakcyja Reform.by stała łaŭreatam premii ŭ halinie svabody ŚMI Free Media Awards za 2023 hod», — piša hałoŭred.
Niahledziačy na heta, redakcyja ad adnaho z donaraŭ atrymała admovu ŭ hrancie na toj padstavie, što nie zmahli adaptavacca da novaj realnaści i stracili aŭdytoryju.
«Tak, całkam zhodzien. Zabłakavanyja ŭsiudy, ź siarednim 12-hadzinnym pracoŭnym dniom biez vychadnych, u čužoj krainie i zarobkam nižej, čym u «Žabcy» — našy mahčymaści stvarać novyja revalucyjnyja pradukty niekalki abmiežavanyja. U nas ni razu nie było situacyi, kali my mahli b prosta ŭziać adnaho novaha čałavieka i krychu bolš času vydatkavać na raźvićcio. Hrošaj zaŭsiody było na 3-4 miesiacy», — piša Paŭlučenka.
Jon prosić pra dapamohu kaleh, aktyvistaŭ, palitykaŭ, partnioraŭ — dapamahčy zachavać prajekt.
Taksama jon źviarnuŭsia da čytačoŭ.
«Lubimyja našy čytačy, prosta zastavajciesia z nami! A kali jość mahčymaść, padtrymajcie danatam, nu a raptam. Kali niama mahčymaści, padpišyciesia na naš telehram-kanał! Dziakuj», — napisaŭ hałoŭny redaktar Reform.by.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič24
Kamientary