Aŭtamabilny partał ABW abviaściŭ pra adnaŭleńnie pracy, ale ź inšymi zasnavalnikami
Siońnia partał ABW pačaŭ adnaŭlać navinavuju stužku. U pieršaj ža publikacyi paśla vymušanaha pierapynku vydańnie paviedamlaje, što siarod prychilnikaŭ znajšlisia tyja, chto zachacieŭ stać novym uładalnikam ABW. Adnak u vychadnych źviestkach pa-raniejšamu paznačany TAA «Bonustorh», piša BAŽ.
— U našaha partała mnostva čytačoŭ i prychilnikaŭ, siarod jakich znajšlisia tyja, chto zachacieŭ stać novym uładalnikam ABW, — adznačajecca ŭ paviedamleńni. — Siońnia ŭ abw.by novyja zasnavalniki, jakija padchapili estafietu 30—hadovaj historyi haziety «Avtobiźnies» — samaha aŭtarytetnaha aŭtamabilnaha vydańnia Biełarusi.
U adnoŭlenaj stužcy navinaŭ — zvyčajnyja paviedamleńni pra mižnarodnyja padziei, taksama sustrakajucca biełaruskija infanahody. Naprykład, pra źmieny ŭ nataryjalnym afarmleńni kuplu-prodažu aŭtamabilaŭ ci pra pašyreńnie śpiecyjalnaściaŭ u niekatorych biełaruskich univiersitetach, źviazanych z raspracoŭkaj i ekspłuatacyjaj transparta. Aŭtarkaj niekatorych publikacyjaŭ paznačanaja Maryna Ažhirej, jakaja doŭhija hady pracavała ŭ vydańni.
— U našych płanach — aktyŭnaje raźvićcio miedyjaresursaŭ i akaŭntaŭ ABW u sacyjalnych sietkach, — śćviardžaje kamanda partała. — My adkrytyja dla vašych idej i prapanoŭ i hatovyja na staronkach ABW dać słova znakamitym i maładym aŭtaekśpiertam, reparcioram i žurnalistam, jakim cikavaja aŭtamabilnaja tematyka. Viadoma, buduć i źmieny, jakija, spadziajemsia, aceniać jak našy pastajannyja čytačy, tak i novaja aŭdytoryja resursu.
Raniej, jašče da 2020 hoda, «Avtobiźnies» uzdymaŭ vostryja i krytyčnyja dla ŭłady pytańni. U pryvatnaści, aśviatlaŭ kanflikty pamiž aŭtaŭładalnikami i DAI, raźmiaščaŭ publikacyi z sudovych pracesaŭ, krytykavaŭ MUS. Jak źmienicca redakcyjnaja palityka ciapier, stanie zrazumieła ŭ chutkim časie.
Nahadajem, ABW zajaviŭ ab poŭnym spynieńni pracy 19 listapada 2023 hoda. Na sajcie źjaviŭsia raźvitalny list ad redakcyi. Miedyja padziakavała svaim čytačam za addanaść, padtrymku i krytyku, partnioraŭ — za davier i kreatyŭ, a kaleh-kankurentaŭ — za matyvacyju da ŭdaskanaleńnia.
Litaralna za miesiac da taho siłaviki zatrymali dyrektara partała Vitala Palakova. Praŭładnyja Telegram-kanały apublikavali videa, na jakim toj pryznavaŭ, što ŭdzielničaŭ u akcyjach pratestu. A ŭ studzieni 2023 hoda hałoŭnuju redaktarku ABW Juliju Mudreŭskuju asudzili da 1,5 hoda kałonii pavodle artykuła 342 Kryminalnaha kodeksa (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich).
U śniežni 2022 hoda vyrak vynieśli redaktaru śpiecprajektaŭ vydańnia Juryju Hładčuku — jamu prysudzili 2,5 hoda kałonii.
Kamientary
Varta pryznać užo, što my svoj šaniec praja***i i niečaha vypiendryvacca jak mucha na škle. A ludzi prosta chočuć žyć svaim žyćciom. A nie biehčy za mrojami.