Аўтамабільны партал ABW абвясціў пра аднаўленне працы, але з іншымі заснавальнікамі
Сёння партал ABW пачаў аднаўляць навінавую стужку. У першай жа публікацыі пасля вымушанага перапынку выданне паведамляе, што сярод прыхільнікаў знайшліся тыя, хто захацеў стаць новым уладальнікам ABW. Аднак у выхадных звестках па-ранейшаму пазначаны ТАА «Бонусторг», піша БАЖ.
— У нашага партала мноства чытачоў і прыхільнікаў, сярод якіх знайшліся тыя, хто захацеў стаць новым уладальнікам ABW, — адзначаецца ў паведамленні. — Сёння ў abw.by новыя заснавальнікі, якія падхапілі эстафету 30—гадовай гісторыі газеты «Автобизнес» — самага аўтарытэтнага аўтамабільнага выдання Беларусі.
У адноўленай стужцы навінаў — звычайныя паведамленні пра міжнародныя падзеі, таксама сустракаюцца беларускія інфанагоды. Напрыклад, пра змены ў натарыяльным афармленні куплю-продажу аўтамабіляў ці пра пашырэнне спецыяльнасцяў у некаторых беларускіх універсітэтах, звязаных з распрацоўкай і эксплуатацыяй транспарта. Аўтаркай некаторых публікацыяў пазначаная Марына Ажгірэй, якая доўгія гады працавала ў выданні.
— У нашых планах — актыўнае развіццё медыярэсурсаў і акаўнтаў ABW у сацыяльных сетках, — сцвярджае каманда партала. — Мы адкрытыя для вашых ідэй і прапаноў і гатовыя на старонках ABW даць слова знакамітым і маладым аўтаэкспертам, рэпарцёрам і журналістам, якім цікавая аўтамабільная тэматыка. Вядома, будуць і змены, якія, спадзяемся, ацэняць як нашы пастаянныя чытачы, так і новая аўдыторыя рэсурсу.
Раней, яшчэ да 2020 года, «Автобизнес» уздымаў вострыя і крытычныя для ўлады пытанні. У прыватнасці, асвятляў канфлікты паміж аўтаўладальнікамі і ДАІ, размяшчаў публікацыі з судовых працэсаў, крытыкаваў МУС. Як зменіцца рэдакцыйная палітыка цяпер, стане зразумела ў хуткім часе.
Нагадаем, ABW заявіў аб поўным спыненні працы 19 лістапада 2023 года. На сайце з'явіўся развітальны ліст ад рэдакцыі. Медыя падзякавала сваім чытачам за адданасць, падтрымку і крытыку, партнёраў — за давер і крэатыў, а калег-канкурэнтаў — за матывацыю да ўдасканалення.
Літаральна за месяц да таго сілавікі затрымалі дырэктара партала Віталя Палякова. Праўладныя Telegram-каналы апублікавалі відэа, на якім той прызнаваў, што ўдзельнічаў у акцыях пратэсту. А ў студзені 2023 года галоўную рэдактарку ABW Юлію Мудрэўскую асудзілі да 1,5 года калоніі паводле артыкула 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).
У снежні 2022 года вырак вынеслі рэдактару спецпраектаў выдання Юрыю Гладчуку — яму прысудзілі 2,5 года калоніі.
Каментары
Варта прызнаць ужо, што мы свой шанец прая***і і нечага выпендрывацца як муха на шкле. А людзі проста хочуць жыць сваім жыццём. А не бегчы за мроямі.