Aktyvistki «Ruchu maci — 328» sabrali bolš za paŭtysiačy podpisaŭ za amnistyju dla zakładčykaŭ
Aktyvisty «Ruchu maci — 328» sabrali bolš za paŭtysiačy podpisaŭ pad novym zvarotam da ŭładaŭ. Jany prosiać prymianić amnistyju da asudžanych za narkazłačynstvy (artykuł 328 KK RB), piša Mayday.team.
Zbor podpisaŭ aktyvistami hramadskaj inicyjatyvy byŭ arhanizavany ŭ apošnija dni studzienia ŭ handlovych centrach «Dana Moł» i «Stalica» ŭ Minsku. Taksama svaje podpisy (i, mahčyma, navat asobnyja zvaroty) nakiravali ŭładam pradstaŭniki rehijonaŭ.
Podpisy źbiralisia ŭ troch ekzemplarach — na adrasy administracyi Łukašenki, Savieta Respubliki i MUS.
U zvarocie svajaki asudžanych źviartajuć uvahu na terminy źniavoleńnia, niesuvymiernyja sa złačynstvam, z-za čaho tysiačy maładych ludziej, u tym liku niepaŭnaletnija z 14 hadoŭ, trapili ŭ kałonii ŭ siarednim na 10 hadoŭ. Asnoŭnaja masa asudžanaja ŭpieršyniu, heta moładź da 30 hadoŭ, a kala 30% viaźniaŭ kałonij adbyvajuć pakarańnie pa artykule 328 KK.
Aŭtary pietycyi prosiać źmianić zakanadaŭstva ŭ bok źmiakčeńnia pa nižnich i vierchnich parohach usich častak artykuła 328 KK i prymianić budučuju amnistyju 2024 hoda taksama dla ŭsich častak hetaha artykuła ŭ jakaści akta humannaści ad dziaržavy.
Zvaroty vytrymanyja ŭ padkreślena łajalnym u adnosinach da ŭładaŭ tonie. Niekatoryja aktyvisty ruchu navat vykazvali inicyjatyvu nakiravać zvarot prapahandystu Azaronku, kab jaho pieraciahnuć na svoj bok.
Častka «Maci-328» nastojvała na asobnym paznačeńni prablemy samych žorstkich prysudaŭ pa častkach 4 i 5 artykuła 328 KK (złačynstva, ździejśnienaje ŭ składzie arhanizavanaj złačynnaj hrupy), z-za čaho ŭ ruchu paznačyŭsia raskoł.
U Biełarusi prajšli ŭžo try amnistyi (2019, 2020, 2022 h.), ale nivodnaja ź ich nie zakranuła asudžanych pa častkach 4 i 5 artykuła 328 KK.
Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii4
Kamientary