«Navošta jaje ŭvohule pasadzili?!» Što viadoma pra žančynu-zabojcu z Babrujska, za jakuju zastupiŭsia Łukašenka
Na naradzie nakont amnistyi ministr unutranych spraŭ Ivan Kubrakoŭ zhadaŭ žycharku Babrujska Kaciarynu Tarasienka, jakaja zabiła muža ŭ pjanaj svarcy. Ministr prapanavaŭ skinuć joj hod pa amnistyi, ale Alaksandr Łukašenka aburyŭsia tym faktam, što žančynu ŭvohule kinuli za kraty. Raspaviadajem, što viadoma pra trahičnuju historyju siamji Tarasienkaŭ.
Kaciarynie Tarasienka ciapier 34 hady. Sa svaim budučym mužam, Mikałajem, jany paznajomilisia ŭ Horkach u 2010-m — abodva z Babrujsku, ale razam vučylisia ŭ sielskahaspadarčaj akademii. Praz hod ažanilisia.
Jašče praz hod u pary naradziłasia pieršaje dzicia. Nieŭzabavie — jašče dvoje. Małodšamu dziciaci ciapier 5 hadoŭ, a starejšamu — 11.
Pra toje, jak składalisia adnosiny pary, Kaciaryna raspaviadała na sudzie: pakul muž byŭ ćviarozy ci piŭ trochi piva, prablem nie było. Zatoje kali pierachodziŭ na bolš mocny ałkahol, moh padniać na jaje ruku, zabiraŭ telefon, kab žonka nie mahła ni z kim źviazacca. Čas ad času žančyna vybiahała z chaty i kryčała. Siniaki i rany na ciele žančyny bačyli i kalehi.
U milicyju Kaciaryna nie źviartałasia — bajałasia, što siamju pastaviać na ŭlik, a paśla adbiaruć dziaciej. Dyj muž mieŭ dobruju pracu, a status siamji ŭ «sacyjalna niebiaśpiečnym stanoviščy» moh stvaryć prablemaŭ.
Praŭda, i ŭ samoj Kaciaryny z ałkaholem, imavierna, usio niaprosta. Žančyna pracavała administratarkaj u miascovym kafe. Jana raskazała, što za dzień da trahiedyi, 15 krasavika 2022 hoda, pajšła na načnuju źmienu, z 10-j viečara da 5-j ranicy. Paśla źmieny jana praciahnuła pić. Vypiła try kaktejli, paśla pajechała da kalehi na piva, paśla jany razam pajšli da znajomaha.
Ahułam Kaciaryna vypiła z ranicy da viečara try kaktejli i bolš za try litry piva.
Z mužam Mikałajem jany svarylisia pa telefonie, bo jon taksama piŭ. Dadomu jana pryjšła kala piataj viečara.
Kali žonka viarnułasia, zaviazałasia svarka. Mikałaj pačaŭ jaje bić — raźbiŭ hałavu i zabraŭ telefon. Jana sprabavała vybiehčy z chaty, ale nie paśpieła, jon zaciahnuŭ jaje nazad. Žančyna chacieła vyklikać chutkuju dapamohu, bo z hałavy ciakła kroŭ, ale muž zabaraniŭ.
Voś jak žančyna ŭ sudzie apisała apošnija chviliny svarki:
«Jon jašče raz udaryŭ mianie dałońniu z pravaha boku, ja ŭpała. Kali ja padniałasia, to dastała nož, pieršy, jaki patrapiŭsia. Uziała ŭ ruki, kab muž spałochaŭsia i supakoiŭsia.
Kryčała: «Što ty robiš, spynisia, nie padychodź da mianie». Jon adkazaŭ: «Nu i što ty zrobiš? Davaj!». Praź siekundu jon kinuŭsia na mianie. Nie mahu skazać, što adbyłosia ŭ toj momant. Jon spyniŭsia, adstupiŭ nazad i nachiliŭsia da kuchonnaj stalnicy».
Žančyna zrazumieła, što muž ciažka paranieny i pasprabavała akazać jamu pieršuju dapamohu. Vyklikała chutkuju, razam z chutkaj pryjechała milicyja, i žančynu zatrymali. Na nastupny dzień Mikałaj Tarasienka pamior u balnicy.
U jaho kryvi vyjavili 2,32 pramile ałkaholu — mocnaje apjanieńnie.
Prakuror Ihar Savaściejeŭ zaprasiŭ dla žančyny žorstki prysud — 10 hadoŭ źniavoleńnia. Adnym z arhumientaŭ dla takoj prapanovy była roźnica ŭ viersii, ahučanaj Kaciarynaj, i mierkavańni sudova-miedycynskaha ekśpierta. Žančyna zhadvała, što trymała nož lazom paralelna padłozie, tamu, maŭlaŭ, muž moh sam naparocca na jaho. Ekśpiert ža patłumačyŭ, što ŭdar nanosiŭsia źvierchu ŭniz. Farmalna heta paličyli «supiarečnaściami».
Sa źmiakčajučych abstavinaŭ nazyvalisia najaŭnaść małaletnich dziaciej i dobraja charaktarystyka ź miesca pracy. Z abciažvajučych — što sama Kaciaryna była niećviarozaja.
Žančyna pryznała vinu tolki častkova, davodziła, što nie chacieła śmierci muža. Advakatka Natalla Piščyk prasiła kvalifikavać dziejańni svajoj klijentki jak pieravyšeńnie samaabarony. Tady možna było b adpuścić Kaciarynu da dziaciej i abmiežavacca papraŭčymi pracami.
Kaciarynie Tarasienka vynieśli prysud 23 lipienia 2022 hoda. Sudździa Pavieł Karcinin prysudziŭ joj šeść hadoŭ kałonii. Taksama joj prysudzili kampiensacyju maralnaj škody svajakam Mikałaja ŭ 30 tysiačaŭ rubloŭ.
Dziećmi žančyny ciapier apiakujecca dzied, baćka Mikałaja Tarasienki. Viadoma, što jon padavaŭ u sud na Kaciarynu, kab pazbavić jaje spadčyny na kvateru pamierłaha Mikałaja na karyść dziaciej. Sud patrabavańni padtrymaŭ.
Publičnaje abureńnie Łukašenki moža adyhrać važnuju rolu ŭ žyćci žančyny. Jak minimum, jana atrymaje minus hod pa amnistyi, ale možna dapuskać i pakazalnaje pamiłavańnie. U takim razie kiejs Tarasienka budzie ŭpłyvać na sudździaŭ, jakija vynosiać prysudy žančynam, što zabili svaich mužoŭ-ahresaraŭ.
«Naša Niva» — bastyjon biełaruščyny
PADTRYMAĆ
Kamientary
Palitviaźni zusim nie pavinny siadzieć u turmach. A im dali hihanckija terminy.
Łuka kaliści źbiŭ traktarysta, paźbieh kary i staŭ prezidentam krainy.
Žach.
Žrać, s..ć i buchać.