«Ab zakryćci havorka nie idzie». Zasnavalnik «Vostrava čyścini i smaku» prakamientavaŭ prablemy biznesu
U vieraśni 2022 hoda źjaviłasia infarmacyja pra zatrymańnie hiendyrektara «Vostrava čyścini» Viktara Ramuka. Praz hod jaho biznes byŭ na miažy bankructva: krynicy «Našaj Niva» śćviardžali, što vializny vykup za vychad ułaśnika ź SIZA i prablemnaja biznes-madel pahražajuć kampanii zakryćciom. Ciapier Ramuk prakamientavaŭ vydańniu «Pra biznes» stan svajoj kampanii.
Ramuk skazaŭ, što ciapierašniaje zakryćcio kram pa ŭsioj krainie — «nie nazaŭždy», heta «aptymizacyja sietki pad ciapierašnija finansavyja ŭmovy». Pavodle jaho, mnohija pastaŭščyki praź niapeŭnaść situacyi źmianili formu apłaty: pieraviali «Vostraŭ čyścini» na pieradapłatu.
Adpaviedna, kampanija pryniała rašeńnie zachavać prysutnaść va ŭsich haradach, ale tyja abjekty, «jakija stajali pobač adzin z adnym, časova zakryć».
Što tyčycca napaŭnieńnia palic tavarami, to Ramuk zapeŭnivaje — na praciahu lutaha-sakavika situacyja vypravicca.
«Tak, byli ciažkaści, my nie zmahli z vytvorcami svoječasova zapłanavać pastaŭki tavaraŭ, ale ŭvieś čas znachodzimsia ź imi ŭ ciesnym kantakcie, kab adnavić raniejšyja abjomy pastavak i najaŭnaść na palicach», — kaža jon.
Kampanija, u jakoj i sietka aptek, i sietka kram «Try łasi», i kramy dla žyvioł, ciapier budzie śpiecyjalizavacca tolki na «Vostravie čyścini i smaku».
«Što tyčycca inšych biznesaŭ, chutčej za ŭsio, my budziem pieradavać ich profilnym partnioram. U tym liku tym, chto zajmajecca farmaceŭtyčnym biznesam, kab «Astravy čyścini i smaku» stali bolš finansava ŭstojlivymi, i ništo nie pieraškadžała ich paśpiachovamu funkcyjanavańniu», — havoryć Ramuk.
Svaju vytvorčaść u Iŭjeŭskim rajonie (vyrab tualetnaj papiery, bytavoj chimii), dzie pracuje 170 čałaviek, jon abiacaje zachavać i raźvivać.
Dastaŭka sietki, jakaja prypyniałasia, pracuje ŭžo ŭ Minsku, paetapna chočuć viarnuć jaje dla ŭsioj krainy.
«U nas vialikaja kampanija, jakaja krychu źmienšyła temp. Usie častki kampanii pracujuć narmalna, rentabielna. Adzinaja ciažkaść, ź jakoj sutykajemsia, — heta aściarohi pastaŭščykoŭ z-za situacyi, jakaja skłałasia», — kaža Ramuk.
Ciapier, raspaviadaje jon, kampanija abmiarkoŭvaje finansavyja pytańni i damaŭlajecca ab restrukturyzacyi doŭhu: «pastupova raźmiarkoŭvajem jaho na paŭhoda ci na 9 miesiacaŭ».
«Pakul finansavy razryŭ nie likvidujem, viadoma, idealnaj situacyi nie dabjemsia, i heta naša pieršačarhovaja zadača. Jašče raz paŭtarusia. Ab zakryćci havorka nie idzie. U mianie pytajucca: «Vy naohuł začyniacca dumajecie?» A ja dumaju, što značyć začyniacca? Heta niemahčyma. My biznes stvarali 15 hadoŭ, navat bolš, heta cełaja sietka. Ja ŭžo nie kažu ab vytvorčaści, aptovym našym biznesie. My ŭpeŭniena adčuvajem siabie na rynku, zaraz vypravim situacyju — i ŭsio budzie dobra», — havoryć jon.
Na pytańnie, adkul uźnikli takija surjoznyja prablemy, Ramuk panarakaŭ na svaje praliki.
«U 2021 hodzie była zroblena kupla nielikvidnaha aktyvu, a mienavita aptečnaj sietki, jaki paśla nie daŭ žadanaha ekanamičnaha efiektu i pahoršyŭ finansavy stan pa biźniesie ŭ cełym. Heta vyklikała zaniepakojenaść u bankaŭskaha siektaru i pryčyniłasia daterminovaha spahnańnia bankaŭskich praduktaŭ u šerahu bankaŭ. Spracavaŭ pryncyp damino i skłałasia biahučaja situacyja na siońniašni dzień.
Kampanija pryniała peŭnyja miery pa ŭrehulavańni hetaha pytańnia i znajšła vyrašeńnie hetaj prablemy», — skazaŭ jon.
Što zapisana aficyjnaj pryčynaj śmierci adzinaha syna Jarmošynaj?4
Kamientary