Što Ukrainie treba zrabić u 2024 hodzie, kab mieć šancy na pieramohu ŭ 2025-m
Treci hod vajny dla Ukrainy pavinien stać hodam adnaŭleńnia i padrychtoŭki da karennaha pierałomu. Ale dla hetaha nieabchodna šmat zrabić jak samoj krainie, tak i jaje sajuźnikam. Sabrali niekatoryja mierkavańni analitykaŭ, aficeraŭ i vajennych ekśpiertaŭ.
Jak adznačaje Politico, trajektoryju raźvićcia padziej u bližejšyja miesiacy buduć vyznačać try asnoŭnyja faktary.
Pa-pieršaje, hetaj viasnoj nieabchodna źmienšyć čakańni, pakolki va Ukrainy nie budzie ni techniki, ni asabovaha składu, kab pačać značnaje kontrnastupleńnie. Pa-druhoje, Rasija z dapamohaj sajuźnikaŭ dabiłasia pieravahi ŭ artyleryi i razam ź niaspynnymi naziemnymi atakami bje joj pa ŭkrainskich pazicyjach. Pa-treciaje, biez zachodnich srodkaŭ SPA i rakiet dalokaha dziejańnia, a taksama artyleryjskich snaradaŭ Kijevu budzie ciažka arhanizavać nadziejnuju, ustojlivuju abaronu.
«Hod budzie składanym, nichto nie moža pradkazać, ź jakoha kirunku pojdzie Rasija, i ci prasuniemsia my ŭ hetym hodzie», — cytuje vydańnie słovy ŭkrainskaha vajennaha analityka Tarasa Čmuta.
Pryjarytety ŭ pastaŭkach
U chodzie telefonnaj razmovy pamiž ministram abarony Ukrainy Rustemam Umieravym, hałoŭnakamandujučym USU Alaksandram Syrskim i kiraŭnikom Pientahona Łojdam Ościnam, jakaja adbyłasia 20 lutaha, byli vyznačany pryjarytety Ukrainy adnosna novych uzbrajeńniaŭ i techniki na bližejšyja miesiacy.
Pa słovach adnaho z surazmoŭcaŭ Politico, hetyja zapyty adlustroŭvajuć niekatoryja važnyja źmieny ŭ tym, jak ukraincy płanujuć vajavać u hetym hodzie, i śviedčać ab tym, jak źmianiŭsia chod vajennaha kanfliktu.
Ciapier Kijeŭ prosić u pieršuju čarhu sistemy supraćpavietranaj abarony. Zamiest źniščalnikaŭ abo tankaŭ jamu patrebny bieśpiłotniki dla nazirańnia i naniasieńnia dalnich udaraŭ, sistemy radyjoelektronnaj baraćby dla padaŭleńnia rasijskich bieśpiłotnikaŭ i balistyčnych rakiet.
Pa słovach staršaha navukovaha supracoŭnika Karaleŭskaha abjadnanaha instytuta abaronnych daśledavańniaŭ Džaścina Bronka, ad taho, nakolki paśpiachova Zachad u bližejšyja miesiacy budzie zabiaśpiečvać Ukrainu, zaležyć, ci ŭdasca joj vystajać u hetym hodzie.
Naroščvać ułasnuju vajennuju vytvorčaść, źniasilvać praciŭnika
Jak piša staršy navukovy supracoŭnik Fonda Karniehi Majkł Kofman razam sa svaimi kalehami Robam Li i Daraj Masikot, Ukraina ŭsio jašče moža pieramahčy Rasiju, kali jana budzie nadavać pryjarytetnuju ŭvahu strymlivańniu voraha, rostu bajazdolnaści i naniasieńniu ŭdaraŭ pa vorahu tam, dzie jon najbolš uraźlivy.
Na pohlad aŭtaraŭ, na etapie «strymlivańnia» Ukrainie nieabchodna stvaryć hłybokaešałanavanuju abaronu i ŭtrymlivać liniju frontu, nanosiačy ŭdary pa słabych miescach praciŭnika takim čynam, kab jaho źniasilić.
Utrymlivajučy liniju frontu, Ukraina mahła b adnavić, navučyć i padrychtavać novyja siły, naraścić vypusk abaronnaj pramysłovaści i z dapamohaj ad partnioraŭ adnavić nieabchodnuju pieravahu ŭ 2024 hodzie dla praviadzieńnia bujnamaštabnych nastupalnych apieracyj u 2025 hodzie.
Na pohlad Majkła Kofmana i jaho kaleh, u 2024 hodzie Ukrainie daviadziecca pierahladzieć svaju palityku mabilizacyi i naboru piersanału dla rašeńnia najaŭnych prablem u struktury i jakaści asabovaha składu. Pakul što ŭkrainskija zakanadaŭcy adchilili prapanovu ab mabilizacyi ad 450 tysiač da 500 tysiač čałaviek.
Ale dla adnaŭleńnia jakaści siłaŭ, jak pišuć analityki, Kijevu daviadziecca ŭličvać nie tolki kolkaść mabilizavanych, ale i siaredni ŭzrost, a taksama pravodzić ustojlivuju ratacyju.
Niemałavažnym, na pohlad ekśpiertaŭ, zjaŭlajecca zadača pašyreńnia i refarmavańnia najaŭnych prahram navučańnia dla rašeńnia prablemy ŭzrastajučaha deficytu vajennaj adukacyi aficeraŭ i małodšych kamandziraŭ.
Razam z dapamohaj z boku sajuźnikaŭ važnym zjaŭlajecca naroščvańnie Ukrainaj ułasnaj vajennaj vytvorčaści. Ab hetym piša staršy navukovy supracoŭnik Mižnarodnaha instytuta stratehičnych daśledavańniaŭ Franc-Stefan Hadzi.
«Dla pierałomu ŭ vajnie spatrebicca vyrašalnaja pieravaha ŭ ahniavoj mocy na pole bitvy, hałoŭnym čynam artyleryjskija bojeprypasy i ŭdarnyja drony. Heta, u svaju čarhu, patrabuje značnaha pavieličeńnia vajskovaj vytvorčaści nie tolki ŭ Jeŭropie i Złučanych Štatach, ale i ŭ samoj Ukrainie», — havoryć ekśpiert.
Jeŭrapiejskija krainy mahli b finansavać pradpryjemstvy pa vytvorčaści dronaŭ va Ukrainie ci ŭ susiednich ź joj dziaržavach. Heta moža častkova kampiensavać niedachop artyleryjskich bojeprypasaŭ.
Ale situacyja z bojeprypasami nie vyhladaje patavaj. Jeŭropa ŭkłała ŭ vytvorčaść 2,2 miljarda dalaraŭ i, jak piša Majkł Kofman i kalehi, całkam mahčyma, što ličba ŭ 1 miljon snaradaŭ moža być dasiahnuta da pačatku 2025 hoda.
Pa słovach namieśnika dyrektara Mižnarodnaha centra abarony i biaśpieki (Estonija) Kryści Rajk, jakuju cytuje Foreign Policy, 2024 — vyrašalny hod dla taho, kab dakazać, što Pucin nie maje racyju i prakłaści šlach da pieramohi Ukrainy.
«Pavodle padlikaŭ Ministerstva abarony Estonii, zachodnija krainy pavinny buduć inviestavać tolki 0,25% ich VUP dla vajennaj dapamohi Ukrainie, kab kraina mahła praciahvać abaraniacca ŭ 2024 hodzie i rychtavacca da novaha kontrnastupleńnia ŭ 2025 hodzie. Hetyja inviestycyi buduć mieć vyrašalnaje značeńnie dla źmieny pohladaŭ Rasii ŭ adnosinach nie tolki da Ukrainy, ale i architektury jeŭrapiejskaj biaśpieki ŭ cełym», — ličyć Rajk.
Zachoŭvać vieru
Jašče adna zadača dla Ukrainy — zachavać vieru. 85% nasielnictva pa-raniejšamu vierać u pieramohu svajoj krainy, ale ŭsio mienš ludziej mohuć apisać, jak budzie vyhladać hetaja pieramoha i kali jana nastupić. Piesimizm šmat u čym tłumačycca tym, što apošnija miesiacy pastaŭki dapamohi zapavolilisia.
Adnak dla byłoha kamandujučaha suchaputnymi vojskami ZŠA ŭ Jeŭropie hienierała Bena Chodžesa toj fakt, što Ukraina padtrymlivaje žyćciazdolnuju abaronu i zachoŭvaje rašučaść, zjaŭlajecca padstavaj dla pazityŭnaha nastroju.
«Pačakajcie, hetaja vajna doŭžycca ŭžo 10 hadoŭ, u Rasii jość usie pieravahi, adnak praz 10 hadoŭ jana zajmaje tolki 18% terytoryi Ukrainy… Jany stracili paŭmiljona sałdat, Čarnamorski fłot z kožnym dniom stanovicca ŭsio horšym, a VPS nie mohuć dabicca pieravahi ŭ pavietry … Ja dumaju, što Rasija nasamreč znachodzicca ŭ horšym stanoviščy, čym my dumajem»,
— cytuje Politico amierykanskaha hienierała.
Čytajcie jašče:
U vajnie pieramoža toj, u kaho budzie bolš snaradaŭ. Ci moža heta być Ukraina?
«16 tysiač biezzvarotnych strat». Aŭdziejeŭka vačyma rasijskich vajenkaraŭ
Kamientary