Vydańnie Forbes miarkuje, što pośpiech Uzbrojenych sił Ukrainy ŭ źbivańni rasiejskich samalotaŭ źviazany z vykarystańniem kaštoŭnych rakiet da Patriot i NASAMS, a taksama «ślapych zon» rasiejcaŭ paśla straty imi traciny samalotaŭ dalokaha radyjołakacyjnaha vyjaŭleńnia A-50.
Pavietranyja siły Uzbrojenych sił Ukrainy zajavili, što za 10 dzion źbili 10 rasiejskich vajennych samalotaŭ: dzieviać najlepšych źniščalnikaŭ-bambardziroŭščykaŭ rasiejskich VPS Su-34 i Su-35, a taksama redki samalot-radyjołakatar A-50.
Vydańnie adznačaje, što rasiejcy hublajuć samaloty ŭ 20 razoŭ chutčej, čym mohuć ich zamianić: rasiejskaja aerakaśmičnaja pramysłovaść, niahledziačy na sankcyi, sprabuje vyrablać bolš za niekalki dziasiatkaŭ novych bajavych samalotaŭ u hod.
Aŭtar «Forbes» Devid Eks miarkuje, što ŭkrainskija vajenna-pavietranyja siły vyłučyli častku ŭstanovak Patriot mabilnym hrupam SPA, jakija chutka pierasoŭvajucca pablizu linii frontu, uładkoŭvajučy zasady na rasiejskija samaloty z rakietami PAC-2 dalokaściu 90 mil (145 km), a zatym chutka pieradysłakujucca, kab paźbiehnuć kontrataki.
Ale adlehłaść, ź jakoj ukraincy źbili A-50 u piatnicu — amal 200 km — namiakaje na toje, što była zadziejničanaja rakietnaja sistema bolšaj dalokaści. Mahčyma, heta była staraja S-200, jaki ŭkraincy vyciahnuli z doŭhačasovaha zachoŭvańnia, miarkuje aŭtar.
Pry hetym jon upeŭnieny, što ŭkraincy pieramiaścili niekatoryja z dvuch dziasiatkaŭ svaich batarej PZRK NASAMS z dalokaściu 40 km bližej da linii frontu. U vyniku rasiejcy ŭ paniadziełak upieršyniu vyjavili i źniščyli rakietaj puskavuju ŭstanoŭku NASAMS pablizu Zaparožža.
Mahčyma, Ukraina razharnuła adrazu ŭsie vyšejzhadanyja sistemy i inšyja, kab stvaryć «haračuju pałasu», ale ŭ takim vypadku chutka va Ukrainy skončacca rakiety dla Patriot i NASAMS, bo ZŠA nie davali joj bojeprypasaŭ z kanca śniežnia 2023 hoda, piša aŭtar.
Jon nie vyklučaje, što i dziejańni rasiejskich vojskaŭ sadziejničali rezkamu rostu strat avijacyi RF, bo rasiejskija vajenna-pavietranyja siły ažyćciaŭlajuć bolš vyletaŭ bližej da linii frontu, dušačy ŭkrainskija vojski dla prasoŭvańnia svaich suchaputnych vojskaŭ.
Jak rastłumačyli va Ukrainskim centry abaronnych stratehij, «praciŭnik pieraadoleŭ strach vykarystoŭvać avijacyju niepasredna nad polem boju — i choć heta pryvodzić da straty samalotaŭ, jaho naziemnyja vojski atrymlivajuć značnuju pieravahu ŭ ahniavoj mocy».
Usplosk rasiejskich šturmavych vyletaŭ daje ŭkrainskim supraćpavietranym abaroncam bolš celaŭ, tamu jany źbivajuć bolš rasiejskich samalotaŭ.
Ukrainskim namahańniam dapamahaje toje, što rasiejskija piłoty ŭsio čaściej nie zaŭvažajuć ukrainskich rakietnych puskaŭ. Kaliści rasiejskija VPS raźličvali na 9 samalotaŭ-radyjełakataraŭ A-50, arhanizavanych u try «arbity» pa try samaloty na poŭdni, uschodzie i poŭnačy, kab pašyryć sensarnaje pakryćcio pa ŭsioj terytoryi Ukrainy.
Paškodziŭšy adzin A-50 udaram bieśpiłotnika ŭ minułym hodzie i źbiŭšy jašče dva A-50 u hetym hodzie, ukraincy likvidavali tracinu sensarnaha pakryćcia i stvaryli «ślapyja zony», dzie rasiejskim piłotam ciažka vyjavić vypuščanyja rakiety.
«Pakolki abodva baki marnujuć resursy, jakija jany nie mohuć adnavić — ukraincy svaje rakiety amierykanskaj vytvorčaści; rasiejcy svaje Su-34, Su-35 i A-50 — abodva baki ŭ rasijska-ŭkrainskaj vajnie pravodziać karotkaterminovyja kampanii, jakija, jak jany spadziajucca, zabiaśpiečać im doŭhaterminovuju pieravahu.
Ukrainskija US, vidavočna, imknucca vykarystoŭvać apošnija rakiety Patriot i NASAMS, kab źniasilić rasiejskija vajenna-pavietranyja siły i papiaredzić budučyja ŭsploski bambavańniaŭ.
Tym časam rasiejskija VPS majuć na mecie razbambavać bolš ukrainskich harnizonaŭ i dapamahčy rasiejskim suchaputnym vojskam zamacavacca, pierš čym eskadrylli Suchoha (vytvorca Su) vyčarpajucca z-za niedachopu samalotaŭ i daśviedčanych ekipažaŭ», — piša vydańnie.
Aŭtar adznačaje, što vychadam z tupiku była b dapamoha ZŠA, jakuju pavinny ŭchvalić u Pałacie pradstaŭnikoŭ Kanhresa ZŠA. Sienat ZŠA ŭžo adobryŭ vydzialeńnie 60 miljardaŭ dołaraŭ novaj dapamohi Ukrainie.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary