Hulniu hoda pierakłali na biełaruskuju movu z dapamohaj niejrasietki
Ciapier prajści Baldur’s Gate III ad pačatku da kanca možna i na rodnaj movie.
![](http://nnexpictures.fra1.digitaloceanspaces.com/img/w732d4webp1/photos/z_2024_03/2024-03-01143017-luf30.png.webp)
Pra pierakład tekstavaj častki hulni paviedamiŭ karystalnik tvitara pad nikam Maleńki Zianon. Jon vykanaŭ pierakład z dapamohaj niejrasietak i ałharytmaŭ, jašče niekalki dzion jon dapracoŭvaŭ pierakład ułasnymi rukami.
Zvyčajnaje prachodžańnie Baldur's Gate III zajmaje kala 75-100 hadzin, nasyčanych dyjałohami, tekstami zadańniaŭ, apisańniami hulniavych rečaŭ i inšym — ahułam bolš za 230 tysiač radkoŭ. Pierakłaści ŭłasnaručna ŭvieś hety abjem biez pryciahnieńnia techničnych srodkaŭ niemahčyma.
![](http://nnexpictures.fra1.digitaloceanspaces.com/img/w732d4webp1/photos/z_2024_03/ghlhye-xoaau4hr-gnre7.jpeg.webp)
Biełaruskija hulniavyja błohiery, jakija testavali pierakład, acanili jaho jak «całkam ahnišča». Jany adznačyli, što čakali choć jakoha pierakładu, jaki źjavicca chutka paśla vychadu i nie daviadziecca čakać jašče 10 hadoŭ, kali hulnia całkam stracić aktualnaść i zapisy prachodžańnia jaje biełaruskaj viersii buduć nikomu nie cikavyja.
![](http://nnexpictures.fra1.digitaloceanspaces.com/img/w732d4webp1/photos/z_2024_03/ghlhzsywqae0gve-nr8zx.jpeg.webp)
Pierakład hulni ad «Trasiankusa» pakul nie dastupny ŭ takich servisach jak Steam, ale jaho možna spampavać na sajcie hulniavych modaŭ. Ustanaŭlivajecca mod na ruskamoŭnuju viersiju hulni prostym pieranosam fajłaŭ u patrebnuju tečku. Pakul takija manipulacyi mahčymyja tolki na piersanalnych kampjutarach, ale Larian Studios abiacaje ciaham hoda dadać padtrymku modaŭ, tady biełarusizatar Baldur's Gate III budzie dastupnym dla šyrejšych kołaŭ.
![](http://nnexpictures.fra1.digitaloceanspaces.com/img/w732d4webp1/photos/z_2024_03/ghlhzddx0aaz_by-porlb.jpeg.webp)
Jak i luby mašynny pierakład, biełarusizatar Baldur's Gate III nie pazbaŭleny moŭnych chibaŭ. Ale hety prykład dazvalaje spadziavacca, što chutkaje raźvićcio niejrasietak i kampjutarnaj linhvistyki dazvolać biełarusam atrymlivać kantent na rodnaj movie za ličanyja tydni.
U adroźnieńnie ad pierakładu knih, pierakład hulniaŭ nie patrabuje vysokaj dakładnaści pieradačy i jakaści movy, bo patrabavańni nižejšyja. Tak što całkam realna, što nastupnym krokam u ekśpierymientach ź niejrasietkami moža stać mašynnaja ahučka piersanažaŭ.
Viadoma, u mianie jość videa pic.twitter.com/QYy9cqZAWe
Baldur's Gate III — heta adradžeńnie słavutaj sieryi hulniaŭ, jakoj fanaty, jak, naprykład, Siarhiej Čały, čakali amal 20 hadoŭ. Viartańniu da sieryi dapamoh kryzis u žanry: jak i ŭ kiniematohrafie, mnohija kampanii źviartajucca da ŭžo pavieranych časam suśvietaŭ i historyj, vydajučy za apošnija hady ŭsio bolš remiejkaŭ i praciahaŭ tvoraŭ minułych dziesiacihodździaŭ.
Siužet usioj sieryi zasnavany na papularnaj nastolnaj rolevaj hulni Dungeons & Dragons (Padziamielli i Cmoki), dziejańnie jakoj adbyvajecca ŭ adnym z najbolš viadomych vydumanych hulniavych suśvietaŭ — Zabytych Karaleŭstvach (Forgotten Realms).
![](http://nnexpictures.fra1.digitaloceanspaces.com/img/w732d4webp1/photos/z_2024_03/ghlh0tdwsaa7sbh-7jjvg.jpeg.webp)
U novaj častcy na pieršy płan vyjšli ilitydy — złaviesnyja vaśminohapadobnyja istoty, prazvanyja «pažyralnikami rozumu» i nadzielenyja zvyšnaturalnymi zdolnaściami. Jany pieramiaščajucca na latučych karablach i razmnažajucca, adkładvajučy ŭ cieły inšych razumnych istot svaich ličynak. Pratahanist, za jakoha daviadziecca hulać, źjaŭlajecca adnoj z takich achviar ilitydaŭ, i sprabuje z vypadkovymi paplečnikami pazbavicca ad ličynki, jakaja patrochu raźjadaje jamu mozh, ale pry hetym daje ŭnikalnyja telepatyčnyja zdolnaści.
![](http://nnexpictures.fra1.digitaloceanspaces.com/img/w732d4webp1/photos/z_2023_08/anoqew-w7_zqg8wrdubfsa-rzt6v.png.webp)
Hulnia maje vyklučna stanoŭčyja vodhuki krytykaŭ, jakija nazvali jaje viaršyniaj žanra ralavych hulniaŭ. U ramkach The Game Awards 2023, hałoŭnaj premii ŭ halinie hulniavoj industryi, «Brama Bałdura» stała tryumfataram, atrymaŭšy cełych šeść uznaharod: za najlepšuju akciorskuju hulniu, za najlepšuju padtrymku supolnaści, jak najlepšaja rolevaja i najlepšaja šmatkarystalnickaja hulnia, jana taksama pieramahła ŭ naminacyi pa vybary samich hulcoŭ i narešcie zabrała hałoŭny pryz — zvańnie «Hulnia hoda».
«Naša Niva» — bastyjon biełaruščyny
PADTRYMAĆ
Kamientary