Biełaruski ekanamist i palityčny ahladalnik Siarhiej Čały zapościŭ va ŭłasnym instahramie skrynšot sa Steam z ustalavanaj hulnioj Baldur’s Gate 3, supravadziŭšy jaho karotkim dopisam: «Byvajcie».
Siužet usioj sieryi zasnavany na papularnaj nastolnaj rolevaj hulni Dungeons & Dragons (Padziamielli i Cmoki), dziejańnie jakoj adbyvajecca ŭ adnym z najbolš viadomych vydumanych hulniavych suśvietaŭ — Zabytych Karaleŭstvach (Forgotten Realms).
Hetaja sieryja kampjutarnych hulniaŭ, pieršaja častka jakoj vyjšła jašče ŭ 1998 hodzie, adnosicca da tak zvanych partyjnych rolevych hulniaŭ (RPG), dzie vy bieracie na siabie kiravańnie nie adnym piersanažam, a cełaj kamandaj. U adroźnieńnie ad bolšaści padobnych hulniaŭ, vy stvarali tolki adnaho svajho pratahanista, a dalej pa svaim šlachu nabirali kamandu svajoj mary, znachodziačy novych spadarožnikaŭ u samych roznych łakacyjach i pry samych roznych abstavinach. Mienavita hety faktar šturchaŭ hulcoŭ da daśledavańnia hulniavoha śvietu, što stała hałoŭnaj fiškaj Baldur's Gate.
Tut, u adroźnieńnie ad mnohich prymityŭnych tahačasnych rolevych hulniaŭ, vy byli zaniatyja nie macavańniem siabie i svaich spadarožnikaŭ, a mienavita padboram idealna zbałansavanaj kamandy. Heta było niaprosta, bo hieroi byli raskidanyja pa ŭsim śviecie, a na vašym šlachu vam mahło nie traplacca piersanažaŭ nieabchodnaj dla vašaha atrada śpiecyjalizacyi. Davodziła brać choć kaho, kab vyžyć u niebiaśpiečnym vydumanym śviecie. Akramia taho, bolšaść kampańjonaŭ mieła svaju ŭłasnuju historyju, jakaja šturchała atrad da novych pryhodaŭ, vyrašajučy prablemy minułaha svaich kampańjonaŭ.
Razmovy pamiž siabrami kamandy i toje, jak vy pavodzili siabie ŭ hramadstvie, upłyvała na raźvićcio vašych uzajemaadnosin. U zaležnaści ad śvietapohladu, vašyja kampańjony mohuć uchvalać abo nie ŭchvalać vašy dziejańni. Časam jany navat mohuć uviazvacca ŭ vašyja dyjałohi ź niehulniavymi piersanažami (NPC) i ŭpłyvać na ich vynik. U vas mahło zdarycca burlivaje kachańnie, razharecca kanflikt pamiž piersanažami z supraćlehłymi pohladami abo navat pačacca raźnia pamiž kampańjonami, jakaja mocna asłabiła b vašu kamandu.
Pry hetym atrad nie moh raści biaskonca, akramia pratahanista ŭ im mahło być jašče piaciora kampańjonaŭ, praz što ŭźnikali maralnyja dylemy, kaho vyhnać, kab pryniać novaha piersanaža z dobrymi ŭmieńniami, abo prosta praihnaravać i hulać piersanažami, da jakich vy ŭžo prykipieli dušoj. Bo z vyhnanym piersanažam mahli syści jahonaja kachanaja abo najlepšy siabar. Tak što davodziłasia vybirać pamiž bajavoj efiektyŭnaściu kamandy i jaje maralnym adzinstvam.
Raspracoŭščyki ŭznavili ŭ hulni tolki nievialikuju častku śvietu Zabytych Karaleŭstvaŭ, ad Bramy Bałdura da pasielišča Naškiel, ale detalova prapracavali jaje. Za košt raznastajnych padziej i dyjałohaŭ hulec adčuvaŭ, što znachodzicca ŭ vializnym pa maštabach śviecie, dzie svaimi rašeńniami ŭpłyvaje na losavyznačalnyja padziei. Šmat u čym hłybinia hulni tłumačycca tym, što jana abapirałasia na dobra raspracavany suśviet nastolnaj hulni, viadomaj ź siaredziny 1970-ch hadoŭ, a nie stvarała na kalency svoj ułasny i nie źviartała da litaraturnych suśvietaŭ, jakija žorstka abmiežavanyja bačańniem aŭtara i fanataŭ.
U hetym usim Baldur's Gate była pieradavoj hulnioj u svaim žanry, što zabiaśpiečyła joj słavu kultavaj. Jaje praciah, Baldur's Gate II, atrymaŭ najvyšejšyja acenki presy, jaje chvalili za zachaplalny hiejmpłej, cudoŭnuju hrafiku i jakasnuju ahučku hulni. U 2001 hodzie vyjšaŭ dadatak da jaje Tron Baała (Throne of Bhaal), na jakim historyja sieryi faktyčna skončyłasia.
Raspracoŭščyki hulni BioWare praciahnuli pracu nad partyjnymi rolevymi hulniami: u tym ža śviecie Zabytych Karaleŭstvaŭ u 2002 hodzie vyjšła dosyć paśpiachovaja Neverwinter Nights («Nočy Nevervintera»), jakaja pierarasła ŭ sieryju. Paśla zapuścili sieryju Dragon Age (Viek Cmoka) pa ŭłasna raspracavanym śviecie Tedasa. Ale ŭsie jany faktyčna raźvivali asnovy, zakładzienyja ŭ Baldur's Gate (jakuju fanaty łaskava nazyvajuć «Bałdoj»), prynosiačy mała čaho novaha.
Fanaty čakali praciahu lubimaj sieryi amal 20 hadoŭ, ale spadziavańniaŭ na toje asabliva nie było. Dapamoh kryzis u žanry: jak i ŭ kiniematohrafie, mnohija kampanii źviartajucca da ŭžo daŭno pavieranych časam suśvietaŭ i historyj, vydajučy za apošnija hady ŭsio bolš remiejkaŭ i praciahaŭ tvoraŭ minułych dziesiacihodździaŭ. Bajučysia stracić hrošy na niaŭdałym novym prajekcie, raspracoŭščyki robiać akcent na nastalhičnych pačućciaŭ tych ludziej, jakija ŭ kancy 1990-ch — pačatku 2000-ch sami byli dziećmi, padletkami abo maładymi ludźmi. Siarhieju Čałamu ŭ toj čas było ŭžo kala 30 hadoŭ i jon moh sabie dazvolić pravodzić doŭhija hadziny, z zachapleńniem hulajučy ŭ tahačasnuju «Bałdu». Tamu nie dziva, što znajomaja nazva novaj hulni abudziła ŭ surjoznym biełaruskim ekśpiercie ciopłyja pačućci i vymusiła z hałavoj iznoŭ pahruzicca ŭ śviet Zabytych Karaleŭstvaŭ.
Ale treciaja častka hulni raspracoŭvałasia ŭžo zusim inšaj studyjaj, Larian Studios, i nie praciahvaje pryhody dziciaci Baała papiaredniaj častki. U novaj častcy na pieršy płan vychodziać ilitydy, złaviesnyja vaśminohapadobnyja istoty, prazvanyja «pažyralnikami rozumu» i nadzielenyja zvyšnaturalnymi zdolnaściami. Jany pieramiaščajucca na latučych karablach i razmnažajucca, adkładvajučy ŭ cieły inšych razumnych istot svaich ličynak. Pratahanist, za jakoha nam daviadziecca hulać, budzie adnoj z takich achviar ilitydaŭ, i budzie sprabavać pazbavicca ad ličynki, jakaja patrochu raźjadaje jamu mozh, ale pry hetym daje ŭnikalnyja telepatyčnyja zdolnaści.
Raspracoŭščyki paśpieli na prezientacyi hulni šakavać publiku scenaj seksu maładoha elfa ź miadźviedziem, dakładniej z druidam u abliččy miadźviedzia, za jakoha moža syhrać hulec. Heta sparadziła mnostva miemaŭ u hulniavym asiarodździ.
Ci zmoža hetaja hulnia stać novaj viachoj u raźvićci žanru, abo prosta zastaniecca tolki adnoj z u šerahu padobnych, pakaža čas. Krytyki pakul nie śpiašajucca davać svaich acenak, reliz jakoj adbyŭsia tolki 3 žniŭnia. Ale niekatoryja recenzienty paśla 30 hadzin hulni, usio ž vykazalisia nakont hulni. Aŭtary partała ZTGD acanili hulniu ŭ 9,5 bałaŭ z 10, nazvaŭšy prajekt šedeŭram. Vydańnie We Got This Covered nazvała jaje novym załatym standartam rolevaha žanru i pastaviła joj 4,5 bały z 5.
«Naša Niva» — bastyjon biełaruščyny
PADTRYMAĆ-
«Z zadavalnieńniem syhrała b Kaleśnikavu». Śviatłana Zielankoŭskaja — pra novyja roli, Michałka i toje, jak zavablivali viarnucca ŭ Biełaruś
-
Mižnarodny Kanhres daśledčykaŭ Biełarusi nazvaŭ najlepšyja navukovyja publikacyi za 2023 hod
-
Abvieščana vilenskaja prahrama Fiestyvalu intelektualnaj knihi Pradmova
Kamientary