Čamu Izrail adbiŭ hrandyjozny ŭdar Irana? Biez dapamohi sajuźnikaŭ usio było b zusim nie tak radasna
Masiravanaja ataka Irana na jaŭrejskuju dziaržavu z treskam pravaliłasia, ale ŭsio nie tak prosta, a dalejšaje raźvićcio padziej ciažka sprahnazavać dakładna.
Napad, ździejśnieny ŭ subotu 13 krasavika z boku Irana na Izrail, byŭ adkazam na avijaŭdar pa konsulstvie isłamskaj respubliki ŭ stalicy Siryi Damasku. Jon adbyŭsia 1 krasavika i pryvioŭ da hibieli siami členaŭ iranskaha Korpusu vartavych Isłamskaj revalucyi. Vinavatym Tehieran nazvaŭ Izrail.
U efiry Bi-bi-si pradstaŭnik CACHAŁ hienierał Piter Lernier zajaviŭ, što ŭ atacy byli zadziejničanyja 170 bieśpiłotnikaŭ, 30 kryłatych rakiet i 120 balistyčnych rakiet. U vyniku 99% ź ich byli źbityja. Što tyčycca mirnaha nasielnictva, to, jak piša Bi-bi-si, viadoma tolki pra paranienuju dziaŭčynku.
Taki pośpiech tłumačycca šeraham abstavin. Pieršaje — heta toje, što na praciahu dvuch tydniaŭ iranskija śpikiery roznaha ŭzroŭniu papiaredžvali pra padrychtoŭku ŭdaru ŭ adkaz. Heta dazvoliła Izrailu i jaho sajuźnikam padrychtavacca i raźmiaścić dadatkovyja srodki baraćby z pavietranymi celami, u tym liku eśmincy.
Druhim faktaram źjaŭlajecca dapamoha Izrailu jaho sajuźnikaŭ. U adbićci masiravanaha nalotu prymali ŭdzieł vajskoŭcy ZŠA, Vialikabrytanii, Francyi i Iardanii.
Tak, amierykanski eśminiec ź sistemaj SPA AEGIS źbiŭ nie mienš za try balistyčnyja rakiety. Asabliva važnuju rolu ŭ źniščeńni bieśpiłotnikaŭ adyhrali amierykanskija, brytanskija i iardanskija vajskovyja samaloty. Bolšaść iranskich bieśpiłotnikaŭ i rakiet byli źniščanyja jašče da taho, jak dasiahnuli pavietranaj prastory Izraila. Dziasiatki dronaŭ źbili nad svajoj terytoryjaj iardanskija VPS.
Niemałavažnym źjaŭlajecca i faktar adlehłaści. Zapuščanyja z terytoryi Irana, rakiety i drony pavinny byli pralacieć šmat sotniaŭ kiłamietraŭ da celi praz terytoryi niekalkich krain. Što taksama dało dastatkova času na padrychtoŭku da ich sustrečy.
Vidavočnym, jak piša Bi-bi-si, źjaŭlajecca toj fakt, što subotniaja ataka adsunuła roznahałośsi, jakija isnavali pamiž Izrailem i jaho sajuźnikami na Zachadzie adnosna kanfliktu ŭ Hazie, na druhi płan. ZŠA i ich sajuźniki zapatrabavali ad Tehierana spynić eskałacyju kanfliktu.
Što dalej?
Adnak, jak piša vydańnie The Wall Street Journal, zastajecca adkrytym pytańnie, ci zmohuć Izrail i jaho prychilniki paŭtaryć paśpiachovyja dziejańni va ŭmovach tatalnaj vajny.
Vyklikaje pytańnie i zdolnaść Izraila abaranić siabie bieź źniešniaj dapamohi. Viadoma, što prezident ZŠA Bajden papiaredziŭ premjer-ministra Izraila Nietańjachu, što nie padtrymaje ŭdar u adkaz: Amieryka nie budzie ŭ im udzielničać.
Srodki pierachopu, asabliva sistemy Arrow i Patriot, jakija vykarystoŭvajucca suprać balistyčnych rakiet, nadzvyčaj darahija, a ich kolkaść abmiežavanaja. Situacyju ŭskładniaje i pazicyja Kanhresa ZŠA, jaki zatarmaziŭ pakiet vajskovaj dapamohi Izrailu, Ukrainie i Tajvaniu.
Ale va ŭmovach pramoj pahrozy niepasredna ad Tehierana hałasy prapalestynskich palitykaŭ i prychilnikaŭ embarha na pastaŭki zbroi Izrailu naŭrad ci buduć pačutyja.
U toj ža čas treba mieć na ŭvazie, što padčas subotniaj ataki była vykarystana tolki małaja častka vializnaha arsienała bieśpiłotnikaŭ i rakiet Isłamskaj Respubliki. Tehieran taksama trymaje ŭ reziervie svaje livanskija maryjanietačnyja siły — hrupoŭku «Chiezbała», jakaja maje tysiačy rakiet i snaradaŭ.
I choć u subotu iranskija rakiety pieraadoleli abaronu tolki niekalki razoŭ, iranskija vajskoŭcy atrymali kaštoŭnyja źviestki, nazirajučy za pracaj izrailskich i amierykanskich SPA.
Abdumvajučy miery ŭ adkaz, Izrail pavinien uličvać intaresy svaich arabskich partnioraŭ, takich jak Iardanija, Saudaŭskaja Aravija i Abjadnanyja Arabskija Emiraty. Niahledziačy na narodny hnieŭ adnosna zabojstva dziasiatkaŭ tysiač paleścincaŭ padčas izrailskich vajennych apieracyj u Hazie, Iardanija i inšyja partniory dapamahli Izrailu adbicca ad iranskich rakiet i bieśpiłotnikaŭ u subotu.
Vajenny kabiniet Izraila, jak piša Bi-bi-si, sprabuje raspracavać taki varyjant udaru pa terytoryi Irana, jaki nie pryviadzie da eskałacyi. Adnym ź ich źjaŭlajecca ataka na atamnyja abjekty.
Miž tym, kiraŭnik hienieralnaha štaba Uzbrojenych sił Irana hienierał Machamad Bahiery vystupiŭ z pahrozaj: kali Izrail raspačnie dziejańni ŭ adkaz, «naša nastupnaja apieracyja budzie našmat maštabniejšaj».
The Wall Street Journal cytuje słovy dyrektara iranskaha prajektu Mižnarodnaj kryzisnaj hrupy Ali Vajeza (Ali Vaez) ab tym, što ŭ tym vypadku, kali Iran pryjdzie da vysnovy, što niedastatkova zvyčajnych srodkaŭ, jon moža schilicca da vykarystańnia jadziernaj zbroi.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im6
Kamientary