Mižnarodny instytut kiraŭničaha raźvićcia (IMD) pradstaviŭ svoj rejtynh samych «razumnych» haradoŭ śvietu. Hetyja harady mohuć pachvalicca najbolš efiektyŭnym vykarystańniem sučasnych technałohij u roznych śfierach hramadskaha i ekanamičnaha žyćcia, piša Myfin.by.
U daśledavańni IMD za 2024 hod aceńvajecca toje, jak infrastruktura i technałohii ŭ 142 nasielenych punktach płaniety ŭpłyvajuć na pradukcyjnaść i jakaść žyćcia haradžan.
Na asnovie apytańniaŭ 120 žycharoŭ kožnaha z razhladanych haradoŭ strukturny i technałahičny kampanienty aceńvalisia pa piaci klučavych napramkach: zdaroŭje i biaśpieka, mabilnaść, dziejnaść (zabavy, mierapryjemstvy i h.d.), mahčymaści (vučoba, praca, biznes) i kiravańnie.
U vyniku ŭžo nie pieršy hod u rejtynhu lidziruje šviejcarski Ciurych. Absalutnaja bolšaść jaho žycharoŭ zadavolenyja vykarystańniem sučasnych technałohij u adukacyi (naprykład, vykładańniem IT u škołach) i pracy (anłajn-servisy dla biznesu i h.d.), achovie zdaroŭja, zabieśpiačeńni biaśpieki i ŭ inšych śfierach.
Top-10 razumnych haradoŭ pa viersii IMD:
- Ciurych (Šviejcaryja);
- Osła (Narviehija);
- Kanbiera (Aŭstralija);
- Ženieva (Šviejcaryja);
- Sinhapur;
- Kapienhahien (Danija);
- Łazana (Šviejcaryja);
- Łondan (Vialikabrytanija);
- Chielsinki (Finlandyja);
- Abu-Dabi (AAE).
Adznačajecca, što harady, jakija zaniali vysokija miescy ŭ rejtynhu, mohuć pachvalicca stabilnym i pradkazalnym sacyjalnym i ekanamičnym asiarodździem. Taksama ŭ ich raspracavanyja inicyjatyvy, nakiravanyja na palapšeńnie ahulnaj jakaści žyćcia hramadzian, u tym liku azielanieńnie, a taksama pašyreńnie mahčymaściaŭ dla praviadzieńnia kulturnych mierapryjemstvaŭ i naładžvańnia sacyjalnych suviaziaŭ.
«U bolšaści hetych haradoŭ-lidaraŭ takija namahańni spałučajucca ź inavacyjnymi stratehijami pa pryciahnieńni i ŭtrymańni talentaŭ, stymulavańni inviestycyj u abranych halinach (naprykład, u intaresach ustojlivaha raźvićcia) i vyrašeńni daŭnich prablem, źviazanych z hieahrafičnaj niaroŭnaściu i inkluziŭnaściu», — havorycca ŭ spravazdačy.
U śpisie nie pradstaŭlenyja biełaruskija harady, zatoje ŭ im apynulisia niekatoryja stalicy susiednich dziaržaŭ, pryčym ich pakazčyki palepšylisia ŭ paraŭnańni ź minułym hodam.
Tak, Varšava raźmiaściłasia na 38-m miescy (vyšej na 6 pazicyj), Vilnia — na 47-m miescy (vyšej na 18 pazicyj), Ryha — na 59-m miescy (vyšej na 24 pazicyi).
U top-5 samych kamfortnych haradoŭ Rasii ŭklučyli «pryfrantavy» Biełharad
Top-15 biełaruskich haradoŭ, jakija vymirajuć chutčej za ŭsio. Lidar vas mocna ździvić
Astraviec, Stolin, Žabinka — rejtynh biełaruskich haradoŭ, u jakich nasielnictva pavialičvajecca nasupierak usiamu
Dzie ŭ Biełarusi niebiaśpiečniej za ŭsio? Kryminalny top haradoŭ i rajonaŭ
Kamientary