Minzdaroŭja: U Biełarusi nie chapaje dzieviaci tysiač daktaroŭ i miedsiaścior
U sistemie Ministerstva achovy zdaroŭja nie chapaje čatyroch tysiač daktaroŭ i piaci tysiač miedsiaścior.
Pra heta paviedamiła namieśnik načalnika ŭpraŭleńnia arhanizacyi miedycynskaj dapamohi, načalnik adździeła śpiecyjalizavanaj miedycynskaj dapamohi Ministerstva achovy zdaroŭja Taćciana Mihal 21 studzienia na pres‑kanfierencyi ŭ Minsku.
Jana padkreśliła, što vastrej za ŭsio prablema niedachopu kadraŭ staić u pieršasnym źvianie sistemy achovy zdaroŭja. U cełym u sistemie achovy zdaroŭja za košt sumiaščeńnia pasad zaniaty 94,7% stavak daktaroŭ, a ŭ sistemie pieršasnaha źviana achovy zdaroŭja — kala 80%, skazała Mihal.
U vyniku ŭ Biełarusi nie poŭnaściu vykonvajecca narmatyŭ (adzin lekar na 1 tys. 200 čałaviek) pa zabiaśpiečanaści nasielnictva daktarami ahulnaj praktyki.
Nie chapaje ŭ paliklinikach taksama vuzkich śpiecyjalistaŭ, u pryvatnaści otałarynhołahaŭ, aftalmołahaŭ, nieŭrołahaŭ, chirurhaŭ i traŭmatołahaŭ.
Dla vyrašeńnia prablemy niedachopu śpiecyjalistaŭ u apošnija hady miedycynskija VNU značna pavialičyli nabor na svaje śpiecyjalnaści.
Mihal taksama padkreśliła, što dla zamacavańnia kadraŭ u piarvičnym źvianie nieabchodna, kab daktary atrymlivali dastojnuju zarpłatu i dla ich stvaralisia narmalnyja ŭmovy pracy ŭ paliklinikach i ambułatoryjach.
Namieśnik načalnika ŭpraŭleńnia arhanizacyi miedycynskaj dapamohi vykazała mierkavańnie, što, pakolki piarvičnaje źviano «źjaŭlajecca avanhardam miedycyny», u situacyi niedachopu śpiecyjalistaŭ, pry adsutnaści dobrych umoŭ pracy dla ich «raźličvać na jakaść akazańnia miedycynskaj dapamohi nie prychodzicca». Pry hetym Mihal adznačyła, što ŭzrovień akazańnia ambułatornaj dapamohi ŭ Biełarusi i ŭmovy pracy miedykaŭ u piarvičnym źvianie «stali značna lepšymi, čym, naprykład, 20 hadoŭ tamu».
Vylecieła ŭ nieviadomym kirunku śpikierka KR Anžalika Mielnikava30
Kamientary