«Daviedalisia pra ciažarnaść žonki i nabyli kvitki»: biełarus dva tydni žyŭ na moście ŭ Mieksicy, kab trapić u ZŠA
Biełarus Siarhiej Ściapura raspaviadaje ŭ tyktoku pra svoj z kachanaj šlach da amierykanskaj mary. Kali daviedalisia, što ŭ chutkim časie ich stanie troje, to rašylisia na emihracyju ŭ ZŠA. Razam ź ciažarnaj žonkaj Siarhieju daviałosia navat dva tydni žyć litaralna na moście.
Na toje, kab dabracca ź Biełarusi ŭ Amieryku, siamji spatrebiłasia kala 8 tysiač dołaraŭ. U videa Siarhiej raspaviadaje, što, jak tolki jany z žonkaj daviedalisia pra ciažarnaść, dyk adrazu pradali mašynu, sabrali ŭsie svaje źbieražeńni dy nabyli kvitki.
Maršrut atrymaŭsia składany. Ź Biełarusi budučyja baćki pajechali ŭ Rasiju, adtul vylecieli na Kubu.
— Usie kvitki my nabyvali praz turahienctva. Tur na Kubu nam kaštavaŭ 3 tysiačy dołaraŭ. Kali b lacieli nie turam, možna było b da Mieksiki dalacieć za 2 tysiačy na toj čas. U nas da Mieksiki atrymałasia za 5 tysiač.
Z Kuby para palacieła ŭ Mieksiku, dzie niekalki miesiacaŭ čakała mahčymaści prajści miažu z ZŠA. Pa prylocie ŭ maładych ludziej z vaśmi tysiač dalaraŭ zastałosia ŭsiaho try tysiačy.
— My zdymali apartamienty za 300 dołaraŭ u miesiac. I ja jašče znajšoŭ pracu, kab zarablać na biahučyja vydatki. Płacili nievialikija hrošy, ale choć niejak chapała na pražyvańnie, na ježu i hetak dalej. A ź biudžetu my ŭžo apłačvali arendu.
Siarhiej adznačaje: ludzi robiać taki ž šlach i z dvaccaćciu, i z saraka tysiačami dołaraŭ u kašalku. Jany zdymajuć u Mieksicy viły i ščyra spadziajucca, što zmohuć złavić datu dla pierachodu miažy za tydzień, u horšym vypadku za miesiac — i spuskajuć u vyniku vializarnyja sumy, prosta čakajučy prydatnaj mahčymaści.
— Što značyć «złavić datu»? Jak tolki vy pryjazdžajecie ŭ Mieksiku, treba spampavać aficyjny dadatak dla pierachodu miažy i prajści ŭ im rehistracyju. Paśla treba zapoŭnić ankietu, dzie paznačaješ usich členaŭ svajoj siamji, vybiraješ punkt propusku, dzie budzieš pierachodzić miažu, a paśla sprabuješ vybrać čas — hety praces i nazyvajecca «łavić datu». Štoranicy praviaraješ, ci atrymlivaješ ty zaprašeńnie na sustreču z aficeram, kab pierajści miažu. U vypadku admovy paŭtorna dasyłaješ zapyt. I tak kožny dzień.
U siamji hrošy pačali skončvacca praz try miesiacy, tamu Siarhiej z žonkaj vyrašyli iści na most Nueva-Prahresa, kab tam čakać sustrečy z aficeram pa žyvoj čarzie.
Pad videa, u jakim Siarhiej pakazvaje, jak žyŭ razam ź ciažarnaj žonkaj prosta na moście ŭ namiocie 2 tydni, šmat aburanych kamientaryjaŭ. Mužčyna tłumačyć, što takaja situacyja adbyłasia tamu, što heta była realnaja mahčymaść usio ž prajści miažu i trapić u ZŠA.
Pieršy čas siamja płanavała žyć u svajho paručyciela ŭ Ńju-Jorku, ale, jak kaža Siarhiej, nie skłałasia. Tamu pryjšłosia terminova šukać žyllo — para adpraviłasia ŭ raźmierkavalny centr i ŭ vyniku zasialiłasia ŭ šełtar hatelnaha typu.
Ciapier mužčyna šukaje pracu ŭ Amierycy, jaho žonka chutka pavinna naradzić.
Na akaŭnt źviarnuli ŭvahu i łukašenkaŭskija telehram-kanały. Jany stali vyśmiejvać siamju ŭ svaich dopisach.
Dzieciam admovili ŭ hramadzianstvie ZŠA: u maci-adzinočki ŭźnikli prablemy praz sud, jaki byŭ šmat hadoŭ tamu ŭ Biełarusi
Pamiatajecie chłopca, jaki praśpiavaŭ pieśniu NaviBand i staŭ zorkaj tyktoku? Jon raskazaŭ, jak atrymaŭ prytułak u ZŠA
Biełarus u ZŠA śpieŭ pieśniu NaviBand i staŭ zorkaj tyktoka. Chto hety chłopiec?
Biełaruska z ZŠA napisała, što choča adpravić dačku u Minsk, tamu što ŭ «Amierycy niama takich utulnych dziciačych sadočkaŭ» — i paniesłasia
Polšča ŭviała zabaronu na vyvaz mnohich tavaraŭ u Biełaruś dla fizičnych asob3
Kamientary
nie tolko śbiežał ot łukašizma no i obieśpiečił svojemu riebionku pasport normalnoj strany