Na «Biełaruśfilmie» praciahvajucca čystki: zvolnili kiraŭnictva dakumientalnaj studyi «Letapis»
Jak stała viadoma z ananimnych krynic u Ministerstvie kultury, całkam zvolnienaje kiraŭnictva «Letapisa» — padraździaleńnia nacyjanalnaj kinastudyi, adkaznaha za vytvorčaść dakumientalnaha kino, piša na «Jeŭraradyjo» kinakrytyk Taras Tarnalicki.
Niadaŭna pasadu dyrektarki studyi straciła Aksana Ejchart. Jak tłumačyć krynica, da jaje «byli pytańni» praz aktyŭnaje adstojvańnie prajektaŭ studyi padčas ich razhladu na mastackaj radzie. Ciapier čynoŭniki na jaje miesca šukajuć bolš pamiarkoŭnaha kiraŭnika.
Aksana Ejchart. Fota: «Biełaruś siehodnia»
Taksama zvolnili dakumientalistku Halinu Adamovič, pryziorku šmatlikich kinafiestyvalaŭ, jakaja supracoŭničała sa studyjaj z 1995 hoda. Pryčynaj stali pytańni da novych prac režysiorki, a apošniaj kroplaj stała źjaŭleńnie ŭ adnoj sa stužak fanahramy, pryśviečanaj Ukrainie.
Z pačatku 2024 hoda na studyi nie pracuje Uładzimir Maroz — kinarežysior, piśmieńnik i paet, jaki zajmaŭ pasadu viadučaha redaktara «Letapisa». Jon pryjšoŭ siudy pracavać u poźnija savieckija časy, a ciapier ź im nie praciahnuli kantrakt.
U vyniku ciapier na studyi zastalisia tolki adnosna maładyja kadry: režysiory Jaŭhien Siaćko, Uładzimir Łucki, Juryj Cimafiejeŭ i jašče niekalki aŭtaraŭ. Chto ŭznačalić «Letapis», pakul nieviadoma.
Taksama istotna źmianiłasia mastackaja rada studyi, jakaja zajmajecca «pryjomkaj» zamoŭlenych filmaŭ. Ciapier tudy nie zaprašajuć kinaznaŭcaŭ, a kličuć supracoŭnikaŭ Minkulta i kinaprakatčykaŭ — kiraŭnikoŭ rehijanalnych dziaržaŭnych kinasietak. Takim čynam dziaržava płanuje vyznačać kantent, jaki budzie zapatrabavany ŭ masavaha hledača.
Ciaham apošnich hadoŭ adbyvajucca pierastanoŭki i na samim «Biełaruśfilmie». Tak, na pasadu hiendyrektara ŭ 2023 hodzie pryjšoŭ były hrodzienski ideołah i eks-kiraŭnik miascovaha kinaprakatu Juryj Alaksiej. Niadaŭna jaho namieśnikam staŭ Pavieł Skałaban, były ideołah i cenzar Minharvykankama, kiraŭnik «Minskkinavideaprakata».
Akramia «Letapisa», chvala zvalnieńniaŭ prakaciłasia i pa animacyjnaj studyi «Biełaruśfilma». Jak pisała ŭ krasaviku vydańnie Reform.news, supracu spynili z mastakom-multyplikataram Alaksandram Lenkinym, jaki papracavaŭ na studyi 40 hadoŭ, viadučaj śpiecyjalistkaj padraździaleńnia Valancinaj Nikifaravaj. I heta nie ŭsio.
«Mnohija daśviedčanyja režysiory-animatary daŭno vyviedzienyja za štat, pryciahvajucca «pa damovie», tamu zvalniać ich i nie treba, prosta nie pryciahvać da supracoŭnictva. Akazalisia nie pry spravie šmatlikija talenavityja režysiory… Heta vielmi zručnaja schiema, kab pazbavić pracy «niepažadanych», — apisvaje situacyju krynica vydańnia.
«Biełaruśfilm» źniaŭ multfilm pra vajnu — zapaŭniać zały dziećmi buduć administracyjnymi mietadami
«Biełaruśfilm» zdymaje kino pra Alaksieja Tałaja
«Biełaruśfilm» choča źniać svajo «Słova pacana»
Minkult prosić viertykal maksimalna zapoŭnić zały pry pakazie novaha prapahandysckaha šedeŭra
Minkult skardzicca: nichto nie choča zdymać filmy pra 2020 hod i «hieraizm siłavikoŭ»
Na «Biełaruśfilmie» zdymuć kino pra baćku Minaja. Scenar napisaŭ viadomy rasijski komik
Baćka Maryi Kaleśnikavaj raskazaŭ, jak była arhanizavana sustreča z dačkoj2
Kamientary
Nie biaduj, luby čytače praz kadravyja źmieny ŭ prapahandyskim šapito, biaduj praź jaho isnavańnie