Dźvie hadziny na vyšcy i 3000 jeŭra na sudy. Jak biełarus amal 4 hady damahajecca mižnarodnaj abarony ŭ Litvie
Jahor Michalkievič — toj samy biełarus, jaki zalez na vyšku ŭ Vilni ź bieł-čyrvona-biełym ściaham. U razmovie z Radyjo Svaboda jon raskazaŭ padrabiaznaści svajoj historyi.
«Palicyja źviarnuła na mianie ŭvahu tolki praz 2 hadziny», — pryhadvaje Jahor Michalkievič padziei 17 červienia, kali jon zalez na vyšku mabilnaha apieratara ŭ Vilni. Z saboj biełarus uziaŭ nacyjanalny ściah. Takim čynam Jahor chacieŭ źviarnuć uvahu na prablemu — z 2020 hodu jon prosić u Litvie mižnarodnuju abaronu, ale tak pakul jaje i nie atrymaŭ. Spačatku admaŭlaje Departamient mihracyi, paśla sud stanovicca na jahony bok, paśla znoŭ admova.
Jahor kaža, što amal 4 hady žyvie jak prośbit statusu ŭciekača. Heta nakładaje šerah abmiežavańniaŭ. Naprykład, nielha mieć rachunak u banku, aficyjna pracavać.
«Ja pryjechaŭ u žniŭni 2020 hoda i adrazu padaŭsia na miažy na mižnarodnuju abaronu. Praz paŭhoda mnie vydali admoŭnaje rašeńnie, i ja pačaŭ sudzicca. U pieršaj instancyi prajhraŭ. Paśla była apielacyja ŭ vyšejšy administracyjny sud, ja jaho vyjhraŭ, spravu viarnuli ŭ mihracyju na razhlad. I jany dva hady maŭčali», — raskazvaje Jahor.
U Departamiencie mihracyi Litvy, pa jahonych słovach, spasyłalisia na zaniataść i prapanoŭvali rabić pracoŭnuju vizu. Potym była akcyja pratestu pad budynkam mihracyjnaj słužby ad inšaha biełarusa, da jakoj Jahor dałučyŭsia. Praz try miesiacy jamu znoŭ admovili ŭ mižnarodnaj abaronie i jon znoŭ pajšoŭ u sud.
«Pieršuju instancyju ja znoŭ prajhraŭ, a pa apielacyi ŭ bolš vysokaj instancyi vyjhraŭ. Adnak tam była farmuloŭka, što spravu znoŭ viernuć u sud pieršaj instancyi. I jaho ja znoŭ prajhraŭ, nieŭzabavie budzie znoŭ apielacyja ŭ sudzie bolš vysokaj instancyi», — tłumačyć Jahor.
Jašče raniej biełarus vyjhraŭ sud z Departamientam mihracyi praz toje, što jon nie vykanaŭ rašeńnia administracyjnaha sudu (dakumienty ab sudovych rašeńniach Michalkievič pieradaŭ u redakcyju. — RS). Atrymaŭ kampiensacyju ŭ 1100 jeŭra. Kaža, što tolki advakat na hetym pracesie kaštavaŭ jamu 1400 jeŭra. A ahułam na sudy, jak śćviardžaje Jahor, jon patraciŭ kala 3000 jeŭra.
Praca ŭ štabie Babaryki i ŭcioki ź Biełarusi
Jahoru 37 hadoŭ, jon sa Śvietłahorsku. Raskazvaje, što ŭ 2020 hodzie aktyŭna ŭklučyŭsia ŭ vybarčuju kampaniju, staŭ supracoŭničać sa štabam Viktara Babaryki. Da hetaha pracavaŭ sam na siabie jak inžyner technałahičnych pracesaŭ. Pa adukacyi jon prahramist.
«Ja byŭ u kamandzie Babaryki ŭ Śvietłahorsku, dapamahaŭ źbirać podpisy. Potym razdavali ludziam maski, vadu. Drukavaŭ materyjały. Kali Viktara pasadzili i stali hramić štab, ja pierajšoŭ u kamandu «Čiestnych ludiej«. Musiŭ być siabram vybarčaj kamisii. Ja panios dakumienty ŭ vykankam, i mianie zatrymali na sutki da vyśviatleńnia asoby», — pryhadvaje Jahor.
Surazmoŭca raskazvaje, što taksama jon drukavaŭ materyjały dla stendaŭ z kandydatami.
«Jašče nie prajšli vybary, i ŭžo pačali «vincić« ludziej. Pryjšli ź pieratrusam da baćkoŭ, bo ja drukavaŭ ulotki, inšyja materyjały. Stała zrazumieła, što možna atrymać termin. Ja pajechaŭ na miažu z Estonijaj praz Rasieju, ale FSB viarnuła mianie nazad. Vybary ja pravioŭ u viciebskim izalatary časovaha ŭtrymańnia, ahułam niekalki dzion. Potym mianie vypuścili pad abaviazańnie zjavicca ŭ sud u administracyjnaj spravie», — kaža Jahor.
Paśla jamu na vočy trapiŭsia vystup litoŭskaj ministarki ŭnutranych spraŭ Ahnie Biłatajcie, jakaja vykazvałasia pra dapamohu palityčna aktyŭnym biełarusam sa statusam uciekača. Tamu vyrašyŭ pajechać u Litvu.
Sproba atrymać prytułak u Estonii
U 2022 hodzie Jahor pracavaŭ naładčykam abstalavańnia na tkackim pradpryjemstvie ŭ Vilni. Lehalna atrymlivaŭ zarobak. Adnak tady, kaža surazmoŭca, u Litvie vyjšaŭ zakon, jaki abaviazvaŭ pracadaŭcaŭ vypłočvać zarobki supracoŭnikam tolki na bankaŭskuju kartku.
«Na Novy hod ja pajechaŭ da siabra ŭ Estoniju, sabraŭ usie dakumienty i rečy i pajšoŭ u palicyju. Apisaŭ situacyju, što pracavać nie mahu. A tam jakraz byŭ mihrancki kryzis, u miescach utrymańnia mihrantaŭ tvaryŭsia žach. Paŭhoda ja pravioŭ u departacyjnym izalatary. Paśla mianie viarnuli ŭ Litvu», — pryhadvaje Jahor.
Umovy ŭtrymańnia, kaža, byli kiepskija. Zaraz u Litvie Jahor, pavodle jahonych ža słovaŭ, pracuje nielehalna.
«Ja nie žyvu ŭ žabractvie, mnie dapamahajuć ludzi, ja zarekamiendavaŭ siabie dobrym śpiecyjalistam», — kaža Jahor.
Pra Litvu mužčyna adhukajecca dobra: zjavilisia znajomyja, pačali dapamahać.
«Pieršyja dva hady było składana, bo heta taki paŭlehalny stan. Paśla zjavilisia znajomyja, acanili jak dobraha śpiecyjalista, stała lahčej. Šmat čaho, viadoma, upirajecca ŭ hrošy, tady i advakata sabie možna dazvolić. Za paŭhoda pracy na pradpryjemstvie ja dobra litoŭskuju movu pačaŭ razumieć. Zaraz ža ŭžo stračvaju navyk», — kaža Jahor.
Na vyšku biełarus zalez, bo «inšyja sposaby ŭžo nie pracavali». Kaža, što nastupstvaŭ pakul nie było, bo jahonyja dziejańni nie prynieśli nijakaj škody.
«Ja sam źlez, siłaj mianie nie spuskali adtul, palicyja apytała», — kaža Jahor.
Pakul jon nie vyznačyŭsia dakładna, što budzie rabić, kali sud ci mihracyja admoviać čarhovy raz.
U Departamiencie mihracyi Litvy admovilisia kamientavać historyju Jahora, spasyłajučysia na zakanadaŭstva ab abaronie piersanalnych źviestak.
«Departamient mihracyi nie daje nijakaj infarmacyi adnosna jurydyčnaha statusu i inšych asabistych źviestak datyčna hramadzian», — adznačyli ŭ viedamstvie.
Tam padkreślivajuć, što struktura «zaŭsiody vykonvaje zakon i sudovyja rašeńni».
Kamientary