Cichanoŭskaja: Abmiežavańni na miažy nie zakranuć aŭtobusy i maršrutki
Śviatłana Cichanoŭskaja prakamientavała abmiežavańni, jakija ŭviała ŭ dačynieńni da aŭtamabilaŭ ź Biełarusi Łatvija i jakija mohuć taksama ŭvieści inšyja susiedzi pa Jeŭrasajuzu. Jana paviedamiła, što jaje kamanda znachodzicca na suviazi z Polščaj, Litvoj i Łatvijaj, davodziačy nieabchodnaść zrabić vyklučeńni dla biełarusaŭ, jakija ŭjazdžajuć u ES na svaich aŭtamabilach.
Rašeńnie ab abmiežavańni na ŭjezd biełaruskich aŭtamabilaŭ Cichanoŭskaja nazvała «paśpiešlivym i škodnym», jakoje «ŭ pieršuju čarhu bje pa ludziach, a nie pa režymu Łukašenki».
Tamu Cichanoŭskaja i Abjadnany pierachodny kabiniet viaduć pracu, kab damahčysia źmieny hetaha rašeńnia, i majuć peŭnyja pośpiechi:
«Siońnia my majem damoŭlenaść: abmiežavańni nie zakranuć pasažyrski transpartny ruch (aŭtobusy, maršrutki i t.p.). Taksama biełarusy, jakija žyvuć u Jeŭrasajuzie, atrymajuć mahčymaść pierarehistravać svaje aŭtamabili na jeŭrapiejskija numary».
U toj ža čas Cichanoŭskaja razumieje, što hetaja palohka ŭsio adno nie vyrašyć prablemu mabilnaści biełarusaŭ, i ŭpeŭnienaja, što miaža ź Jeŭrasajuzam pavinna być adkrytaja dla biełarusaŭ, jakija nie padtrymlivajuć režym i bačać budučyniu svajoj krainy ŭ Jeŭropie. Tamu vykazvaje rašučaść praciahvać nadalej baranić intaresy biełarusaŭ.
Dadatkovyja tłumačeńni pa hetym pytańni daŭ u fejsbuku hałoŭny daradca Cichanoŭskaj Franak Viačorka. Pavodle jaho słoŭ, rašeńni ab abmiežavańni na ŭjezd aŭtamabilaŭ ź biełaruskimi numarami prymaje nie MZS, a najpierš mytnyja słužby ci ministerstva transpartu zhodna z dyrektyvaj Jeŭrasajuza.
Abmiežavańni hetyja majuć šmat pryčyn: i kantrol nad abychodam sankcyj Rasijaj, i źmianšeńnie nahruzki na pamiežnyja pierachody, i baraćba za hałasy vybarščykaŭ, jakija vystupajuć za žorstkija abmiežavańni, i pytańni biaśpieki. Taksama ŭ Łatvii śćviardžajuć, što rasiejcy rehistrujuć svaje aŭtamabili na biełaruskija numary, i heta dazvalaje im abychodzić abmiežavańni.
U toj ža čas Viačorka ŭpeŭnieny, što tyja, chto ŭvodziŭ abmiežavańni, nie praličvali palityčnych nastupstvaŭ — što jany bjuć pa prajeŭrapiejskich nastrojach biełarusaŭ i zapichvajuć Biełaruś u adzin košyk z Rasijaj. Bo tak jeŭrapiejcam praściej.
Kab hetuju roźnicu tłumačyć, akurat vielmi važnyja sustrečy, pajezdki, razmovy, lubaja aktyŭnaść biełarusaŭ. Ciapier kamanda Cichanoŭskaj sprabuje dabicca vyklučeńniaŭ, kab biełarusy zmahli ŭjazdžać, vyjazdžać i pieramiaščacca na svaich aŭtamabilach praź miažu i na terytoryi ES. Pakul ža prosiać adterminavać vykanańnie rašeńnia ŭ Polščy i Litvie, a taksama ŭ Łatvii.
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA16
Kamientary