Hruzapieravozčyki i kamiersanty bjuć tryvohu — davodzicca pierasadžvacca z «Miersiedesaŭ» na HAZeli
Ciaham apošnich miesiacaŭ pryhon hruzavoha transpartu ź nie vielmi vyhadnaha pieraŭtvaryŭsia ŭ amal niemahčymy.
Try miesiacy i plus tysiačy dalaraŭ
Pieršaja niepryjemnaja navina dla tych, kamu patrebny kamiercyjny transpart, źjaviłasia naprykancy sakavika, kali stała viadoma, što ŭ Biełarusi ad krasavika ŭvodziać novyja staŭki ŭtylizacyjnaha zboru.
Praz pavyšeńnie stavak impart hruzavych mikraaŭtobusaŭ ahulnaj vahoj ad 2,5 da 3,5 tony (jakija padpadajuć pad vadzicielskuju katehoryju «V») padaražeŭ na 12-17 tysiač rubloŭ (kala 3850-5400 dalaraŭ ZŠA). I heta tolki suma, na jakuju vyras płaciež.
Sama staŭka ŭtylzboru vyhladaje tak:
Za hruzavik da 3 hadoŭ — 18 653 rubli (kala $6000). Było 6534 rubli (kala $2100).
Za hruzavik, starejšy za 3 hady, — 27 137 rubloŭ (kala $8650). Było 10 209 rubloŭ (kala $3250).
Ale ŭtylizacyjny zbor — nie adziny abaviazkovy płaciež pry imparcie hruzavoha aŭto ŭ Biełaruś. Taksama nieabchodna apłacić sukupny mytny płaciež, jaki składajecca z mytnaj pošliny i PDV.
I kali praz pavyšeńnie ŭtylzboru impart lohkaha kamiercyjnaha transpartu prosta padaražeŭ, to pryniaty 29 lipienia novy pakiet sankcyj i techničny rehłamient ES u dačynieńni da Biełarusi zrabiŭ pryhon takoha transpartu amal niemahčymym.
Novyja sankcyi zabaraniajuć ekspart u Biełaruś hruzavoha transpartu. To-bok prynamsi lehalnym čynam zrabić heta niemahčyma.
Tym nie mienš, pry vialikim žadańni hruzavik moža vyjechać ź ES u Biełaruś pad vidam mižnarodnaj pieravozki. Ale ŭ takim vypadku jon daražeje na sumu PDV u krainie rehistracyi.
Tamu ŭmoŭny Mercedes Sprinter, jaki ŭ Jeŭropie kaštuje 15 tysiač jeŭra nieta, budzie pryblizna na 20% daražejšy praź niemahčymaść lehalna aformić ekspart.
A heta jašče kala 3000 jeŭra. Kali dadać da hetaj sumy minimum 3850 dalaraŭ, na jakija pavysiŭsia ŭtylizacyjny zbor, atrymajecca, što hruzavik dadaść u canie bolš za 7 tysiač dalaraŭ u paraŭnańni z tym, kolki jon kaštavaŭ by, pryviazi jaho ŭ Biełaruś tryma miesiacami raniej.
Jak adreahavaŭ rynak?
Surazmoŭca, jaki zajmajecca hruzapieravozkami pa Biełarusi i Rasii, nazyvaje novuju sumu niepadjomnaj. Mužčyna kaža, što pradaŭ adzin z dvuch busaŭ u pieršaj pałovie sakavika, bo chacieŭ nabyć sabie bolš śviežy transpart ź Jeŭropy.
«Płanavaŭ dadać 3-4 tysiačy, kab zamiest svajho 8-hadovaha, nabyć 3-5 hadovy bus u Polščy. Nie paśpieŭ znajści padychodziačy varyjant, jak abjavili pra pavyšeńnie ŭtylzboru. Daviałosia šukać mašynu ŭ Biełarusi z tych, što pryhnali na prodaž raniej», — zhadvaje pieravozčyk.
Pa słovach mužčyny, rynak vielmi chutka adreahavaŭ na novyja staŭki i pradaŭcy śviežapryhnanych busaŭ pačali pierapisvać ceny.
«Ceny raśli na vačach, tamu chutka pryjšoŭ da vysnovy, što ŭsio adno budzie lepiej pryhnać na zamovu ź Jeŭropy, kab choć być upeŭnienym u tym, što nie budzie padmanu z prabieham. Ale znoŭ ničoha nie atrymałasia, bo Jeŭrasajuz uvioŭ novyja sankcyi i zabaraniŭ ekspart u Biełaruś.
Pasiarednik, jaki dapamahaŭ šukać mašynu ŭ Jeŭropie, skazaŭ, što ciapier adziny tearetyčna mahčymy šlach — heta vyvaz biez afarmleńnia ekspartnaj dekłaracyi, to-bok biez mahčymaści viartać PDV.
Ale zajmacca padobnymi schiemami jany nie zachacieli, bo aścierahajucca nastupstvaŭ. Da taho ž, heta jašče 23% da koštu ŭ Polščy. Tamu pošuki daviałosia spynić i kupić bus, jaki ŭžo pajeździŭ pa Biełarusi».
Na dumku pieravozčyka, kali situacyja nie źmienicca, ceny na busy zamiežnaj vytvorčaści praciahnuć raści, bo nie kožny hatovy paśla Iveco ci Mercedes pierachodzić na rasijskija HAZeli.
Inšy surazmoŭca taksama byŭ vymušany admovicca ad kupli hruzavoha mikraaŭtobusa ŭ Jeŭropie.
«U nas na firmie pracuje 4 mikraaŭtobusy. Try ź ich pryhaniali ź Jeŭropy, adzin kuplali novym u Biełarusi, kali ŭ nas byli prymalnyja ceny na Renault Master. Zvyčajna starajemsia abnaŭlać mašyny kožnyja 3-4 hady. Ciapier daviadziecca praciahvać jeździć na tym, što majem», — kaža pradprymalnik.
Sa słoŭ biznesmiena, apošni raz jon pryhaniaŭ bus na firmu vosieńniu minułaha hoda.
«Maju vizu, tamu letaś sam jeździŭ u Litvu pa bus. Sioleta taksama płanavali abnavić adnu mašynu, ale nie budziem hetaha rabić, bo ciapier zamiest 23 tysiač taja samaja mašyna abyjdziecca ŭ bolš, čym 30 tysiač», — skardzicca biznesmien.
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni11
Kamientary