Piać «insajdaŭ» pra apazicyju, jakija možna daviedacca ź intervju na ANT danosčycy Ciškievič

Paśla taho jak imia Volhi Ciškievič źjaviłasia ŭ bazie danosčykaŭ KDB, jana ŭciakła ź Litvy i viarnułasia ŭ Biełaruś. Ciapier žančynu paklikali ŭ efir ANT. Pakul što pakazali tolki pieršuju tracinu intervju, jakoje prapahandysty anansavali jak «siensacyjnaje», ale jano vartaja žalu — Ciškievič nie skazała ŭvohule ničoha, što mahło b zacikavić aŭdytoryju.

Patłumačym kantekst. Ličycca, što ŭ druhoj pałovie 2010-ch Ciškievič uznačalvała mahiloŭskaje adździaleńnie «Narodnaj hramady» Mikoły Statkieviča. «Kiraŭnica abłasnoha adździaleńnia» — hučyć pryhoža, ale nasamreč havorki pra paŭnavartasnuju strukturu niama. Ciškievič prosta była adna ź niamnohich žycharak Mahiloŭščyny, jakaja prabiłasia (ci jakoj pastavili zadaču prabicca) u atačeńnie Mikoły Statkieviča. Da taho ž «Narodnaja hramada» była niezarehistravanaja, a značyć, «pasada» nidzie aficyjna nie prapisvałasia.

Ciškievič siabravała (ci była sužycielkaj) aktyvista rasijskaha čarnasocienskaha ruchu «NOD» («nacyjanał-vyzvalenčy ruch») Alaksieja Hałavina. Užo tady hetaja suviaź vyklikała pytańni.

U intervju Ciškievič na ANT za insajdy znutry apazicyi vydajucca nastupnyja historyi:

1) Kali Ciškievič pierajechała ŭ Polšču, joj było składana. Cytata: «Ja nikoli nie była ŭ Polščy, i paśla ruskamoŭnaha nasielnictva polskuju movu praktyčna nie razumieješ». Jana pajšła na nizkakvalifikavanuju pracu — kamplektavańnie pasyłak, prybirańnie numaroŭ u hateli. Tam joj, ź jaje słoŭ, udavałasia zarablać 500-600 jeŭra na miesiac — značna mienš, čym abiacali i čym joj chaciełasia b.

2) Žančyna narakaje, što ŭ niezaležnych miedyja nie pakazvajuć umovy, u jakich žyvuć za miažoj biełaruskija emihranty. «Čamu nie aśviatlajuć, što Ilja Dabratvor žyvie ŭ mašynie?» Heta chłuśnia. Dabratvor užo nie žyvie ŭ mašynie, ale kali žyŭ, to na hetuju temu biełaruskija ŚMI nieadnarazova pisali. 

3) Ciškievič adkryła tajamnicu, što roznyja apazicyjaniery nie zaŭsiody lubiać adno adnaho i sprabujuć nastroić hramadskuju dumku suprać svaich apanientaŭ. Pakolki jana znachodziłasia ŭ asiarodździ Mikoły Statkieviča, to pryvodziła prykłady, źviazanyja ź im. Maŭlaŭ, isnavała niejkaja hrupa prychilnikaŭ Statkieviča, i jon zaklikaŭ svaich paplečnikaŭ pisać u internecie kamientary z tym ci inšym źmiestam — naprykład, suprać Mikoły Aŭtuchoviča.

Z kantekstu vynikaje, što prychilniki Statkieviča pisali hetyja kamientary adkryta ad svajho imieni. Spraŭdzić historyju niemahčyma, bo i Statkievič, i Aŭtuchovič znachodziacca za kratami, ale ŭ lubym vypadku niezrazumieła, što ŭ joj aburalnaha.

4) Jana zapeŭniła, što ŭ Vilni jość hrupa aktyvistaŭ, niezadavolenych Śviatłanaj Cichanoŭskaj. Jany nibyta navat adnojčy pryjšli ź pikietam pad Ofis Cichanoŭskaj. A jana da ich tak i nie vyjšła. «Stvarajucca mižusobnyja vojny. Chtości za Cichanoŭskuju, chtości suprać, i jany vajujuć adzin z adnym», — patłumačyła Ciškievič. 

Napeŭna, ni dla kaho nie tajamnica, što jość palityčnyja siły, jakija sprabujuć asprečyć lidarstva Cichanoŭskaj. Heta było vidavočna i da «skandalnaha intervju» na ANT. I heta narmalna — heta i jość palityčny pluralizm.

5) Ciškievič pryznałasia, što «nichto nie chacieŭ» udzielničać u vybarach u Kaardynacyjnuju radu, ale jaje «Narodnuju hramadu» niechta «prymusiŭ» zrabić heta.

Niezrazumieła, chto kaho i dziela čaho prymušaŭ, bo šmat jakija palityčnyja siły praihnaravali vybary ŭ KR — i praciahnuli svajo isnavańnie. A voś śpis «Salidarnaść», u jaki pieršapačatkova ŭvachodziła sama Ciškievič, nabraŭ mizernuju kolkaść hałasoŭ i nie pieraadoleŭ patrebnaj płanki.

Pavodle anonsa na ANT, u nastupnaj častcy intervju Ciškievič budzie raskazvać pra hrošy, a paśla jašče i pra teraryzm — jak niechta z apazicyjanieraŭ nibyta «stvaraŭ drony z radyjenuklidami».

• 1
• 20
• 68
• 0
• 1
• 1
• 4
• 4