Praz 30 hadoŭ sud nazvaŭ vinavataha ŭ zabojstvie Tupaka Šakura — adnaho z samych upłyvovych repieraŭ u historyi
Prysiažnyja ŭ Łas-Viehasie pryznali 63‑hadovaha Duejna «Kifi Dzi» Devisa vinavatym u zabojstvie repiera Tupaka Šakura, adnaho z samych viadomych vykanaŭcaŭ u historyi chip-chopa. Šakura zastrelili ŭ 1996 hodzie, ale abvinavačany ŭ jaho zabojstvie źjaviŭsia tolki praz 27 hadoŭ. Ciapier Devisu pahražaje pažyćciovaje źniavoleńnie, piša Bi-bi-si.
Tupaku Šakuru było 25 hadoŭ, kali 7 vieraśnia 1996 hoda ŭ Łas-Viehasie abstralali aŭtamabil, u jakim jon jechaŭ razam z kiraŭnikom hukazapisvalnaha łejbła Death Row Records Meryjanam «Šuham» Najtam. Pobač ź ich BMW na śviatłafory spyniŭsia bieły Cadillac, ź jakoha adkryli ahoń. Šakur atrymaŭ ciažkija ranieńni i pamior u balnicy 13 vieraśnia. Najt vyžyŭ.
Zabojstva adnaho z samych viadomych repieraŭ 1990‑ch zastavałasia nieraskrytym dziesiacihodździami.
Pavodle viersii abvinavačańnia, napad byŭ pomstaj za bojku, jakaja adbyłasia niezadoŭha da stralaniny. Šakur i ludzi ź jaho atačeńnia źbili ŭ kazino Arłanda Andersana — plamieńnika Duejna Devisa i ŭdzielnika bandy South Side Compton Crips.
Prakurory śćviardžali, što paśla hetaha Devis zdabyŭ pistalet, sabraŭ jašče troch mužčyn i adpraviŭsia šukać Šakura. Kali jany znajšli jaho mašynu, Devis, pavodle abvinavačańnia, pieradaŭ zbroju na zadniaje siadzieńnie Cadillac, paśla čaho adzin z mužčyn adkryŭ ahoń.
Chto mienavita stralaŭ u Tupaka, śledstva tak i nie ŭstanaviła.
U vydadzienych u 2019 hodzie miemuarach Devis napisaŭ, što znachodziŭsia ŭ Cadillac, ź jakoha stralali ŭ Šakura, i pieradaŭ pistalet čałavieku na zadnim siadzieńni. Jon taksama nieadnarazova havaryŭ pra zabojstva ŭ intervju, padkastach i dakumientalnych filmach.
Mienavita hetyja zajavy stali važnaj častkaj dokazaŭ abvinavačańnia. Palicyja śćviardžaje, što padazravała Devisa daŭno, ale raniej nie mieła dastatkova dokazaŭ dla pradjaŭleńnia abvinavačańnia. Jaho aryštavali ŭ 2023 hodzie — praz 27 hadoŭ paśla zabojstva repiera.
Abarona nastojvała, što historyi Devisa byli pierabolšanyja dziela viadomaści i prodažu knihi. Sam jon svajoj viny nie pryznaŭ i paśla vierdyktu zajaviŭ, što źbirajecca jaho abskardzić.
Prysiažnym spatrebiłasia kala troch hadzin, kab pryznać Devisa vinavatym u zabojstvie pieršaj stupieni z vykarystańniem zbroi. Jamu pahražaje pažyćciovaje źniavoleńnie biez mahčymaści daterminovaha vyzvaleńnia. Prysud majuć abviaścić 13 kastryčnika.
Devis zastajecca adzinym žyvym z čatyroch mužčyn, jakija, pavodle śledstva, znachodzilisia ŭ Cadillac. Jaho plamieńnik Arłanda Andersan zahinuŭ u pierastrełcy ŭ 1998 hodzie, jašče dvoje mužčyn taksama pamierli.
Ciapier čytajuć
«U syna na telefonie byli naleplenyja ściah i hierb Rasii. Z hetaha ŭsio pačałosia». Baćka školnika z Baranavič raskazaŭ, jak jaho syna ckavali adnakłaśniki28
«U syna na telefonie byli naleplenyja ściah i hierb Rasii. Z hetaha ŭsio pačałosia». Baćka školnika z Baranavič raskazaŭ, jak jaho syna ckavali adnakłaśniki
ŠI-hienieracyju ŭ videahulniach krytykavali, a ciapier zachaplajucca. Źlitaja technałohija ad NVIDIA pieratvaraje staryja hulni ŭ sapraŭdny kiniematohraf44
ŠI-hienieracyju ŭ videahulniach krytykavali, a ciapier zachaplajucca. Źlitaja technałohija ad NVIDIA pieratvaraje staryja hulni ŭ sapraŭdny kiniematohraf4
«Tekst prysiahi prahučaŭ tady dvojčy». Statkievič padzialiŭsia ŭspaminami pra prysiahu biełaruskich vajskoŭcaŭ u 1992 hodzie na Dzień bitvy pad Oršaj1616
Kamientary