U intervju francuzskim ŚMI prezident Ukrainy padzialiŭsia svaimi dumkami ab mahčymym vyniku vajny i sfarmulavaŭ čakańni ad Kitaja.
Prezident Ukrainy Uładzimir Zialenski daŭ intervju najbolšym francuzskim vydańniam Le Monde, Libération, L'Equipe i Agence France-Presse u čas svajoj pajezdki ŭ Roŭna.
Pryvodzim adkazy na niekatoryja pytańni, jakija publikuje vydańnie Le Monde.
Rasijski bok praciahvaje nastup na ŭschodzie Ukrainy. Čamu jany majuć pośpiech?
Zialenski nazvaŭ niekalki pryčyn. Pieršaja zaklučajecca ŭ niedakamplekcie ŭzbrajeńniaŭ.
«My padrychtavali čatyrnaccać bryhad. Bryhady, jakija my chacieli abstalavać uzbrajeńniem, kab abaraniać svaju terytoryju i naładžvać ratacyju, dajučy sałdatam mahčymaść adpačyć i zamianicca. Kali z čatyrnaccaci bryhad ukamplektavanyja tolki try, ci možna spynić rasijan?» — havoryć prezident Ukrainy.
Druhaja pryčyna, jakuju, pa słovach Zialenskaha, nieabchodna pryniać, zaklučajecca ŭ tym, što ruskija bajacca adstupać. «Kali jany adstupajuć, ich zabivajuć. My nikoli nie zmožam sabie hetaha dazvolić, nikoli. Niełahična zmahacca za čałaviečaje žyćcio, nie zachoŭvajučy jaho. Ruskija nie chočuć pra heta dumać. Pucinu heta abyjakava, jon nie ličyć [zabitych]».
Treciaja pryčyna — niemahčymaść vykarystoŭvać pastaŭlenuju Zachadam zbroju tak, jak Ukraina ličyć nieabchodnym.
Pryčyna, na jaho pohlad, u tym, što «partniory bajacca». Ale, pa słovach prezidenta, «jany pavinny razumieć, što my žyviom i zmahajemsia. I kali jany nie znojduć sposabu dapamahčy nam, my zmožam znajści inšyja rašeńni dla abarony nasielnictva».
Ci dastatkova budzie dla stabilizacyi situacyi novaha zakona ab mabilizacyi?
Adkazvajučy na heta pytańnie, Zialenski zaŭvažyŭ, što z pryniaćciem novaha zakona tempy mabilizacyi ŭzraśli. Adnak na poli boju nie chapaje ludziej, bo źmiena znachodzicca ŭ stadyi padrychtoŭki.
Zialenski adznačyŭ, što Ukraina nie moža dazvolić kidać na front niepadrychtavanych ludziej, jak heta robić Rasija, dzie na navučańnie advodziać tolki siem dzion. Jon śćviardžaje, što na padrychtoŭku navabrancaŭ va Ukrainie advodzicca nie mienš za dva miesiacy.
«Zmahańnie z Rasijaj ličbami — ciažkaja zadača. My pavinny być razumnymi i zrabić usio mahčymaje, kab zachavać žyćci našych sałdat. Na praciahu troch-čatyroch tydniaŭ jany hublali pa tysiačy čałaviek za dzień, tysiaču zabitymi i paranienymi.
Jany nienarmalnyja. Pucin źjechaŭ z hłuzdu. Jak ty možaš zabivać tysiaču svaich ludziej kožny dzień? Mienavita tamu nie varta haniacca za kolkaściu. Za adzin hod vajny jon pryniasie ŭ achviaru 300 tysiač čałaviek. Bolš za 500 tysiač jaho sałdat užo zabityja ci paranienyja», — cytuje vydańnie Zialenskaha.
Čaho Zialenski čakaje ad Kitaja?
Zialenski ličyć, što Kitaj kali zachoča, to moža prymusić Rasiju spynić vajnu.
«Ja b chacieŭ, kab jon akazaŭ cisk na Rasiju, kab jana spyniła hetuju vajnu. Hetak ža, jak cisnuć Złučanyja Štaty. Taksama, jak ciśnie Jeŭrapiejski sajuz. I čym bolšy ŭpłyŭ maje kraina, tym bolšy cisk jana pavinna akazvać na Rasiju. Na vajnie, u jakoj jość ahresar, vy nie možacie pazicyjanavać siabie jak pasiarednika», — adznačyŭ Zialenski.
Ci razhladaje mahčymaść sastupki terytoryj?
Zialenski adznačyŭ, što na mirnym samicie, jaki pavinien adbycca ŭ listapadzie hetaha hoda, pavinny prysutničać pradstaŭniki Rasii. Pry hetym jon padkreśliŭ, što spraviadlivy mir dla Ukrainy pavinien dazvolić joj viarnuć svaju terytaryjalnuju cełasnaść. Ale rašeńnie zastajecca za ŭkrainskim narodam.
«Vy pavinny razumieć, što luboje pytańnie, jakoje tyčycca terytaryjalnaj cełasnaści Ukrainy, nie moža być vyrašana adnym prezidentam, adnym čałaviekam ci ŭsimi prezidentami ŭ śviecie biez ukrainskaha naroda. Heta niemahčyma. Heta supiarečyć Kanstytucyi Ukrainy. I tamu hetaje pytańnie datyčyć tolki nas.
Chtości niadaŭna skazaŭ: «Što, kali Ukraina addaść svaje terytoryi ŭ abmien na niešta. Naprykład, harantyi biaśpieki, mahčyma, NATA, mahčyma, ES i h.d.? Takich zajaŭ moža być šmat, ale vy pavinny razumieć, što nichto ničoha aficyjna Ukrainie nie prapanavaŭ. I Ukraina nikoli nie addaść svaje terytoryi.
Ułada nie maje aficyjnaha prava addavać svaje terytoryi. Kab heta adbyłosia, ukrainski narod pavinien hetaha zachacieć».
Kamientary