Były dypłamat Macukievič: Režymu nie ciažka vyzvalić usich palitźniavolenych na praciahu 48 hadzin. Heta vialiki pravał apazicyi
Były časovy pavierany ŭ spravach Biełarusi ŭ Šviejcaryi Pavieł Macukievič vykazaŭsia adnosna mahčymaści abmienu palitźniavolenymi pa prykładzie Rasii.
Macukievič u efiry prahramy «Obyčnoje utro» nazvaŭ situacyju z abmienam viaźniaŭ, dzie nie było biełaruskich palitźniavolenych, «vialikim pravałam demakratyčnaj apazicyi Biełarusi».
«Nie tolki Minsk vyzvaliŭ adnaho čałavieka. Palaki i słaviency vyzvalili troch rasijskich špijonaŭ. I farmalna ničoha za heta nie atrymali. Pytańnie ŭ tym, ci łabiravałasia ŭ pryncypie tema ŭklučeńnia ŭ abmienny pakiet biełaruskich palitźniavolenych».
Jon ličyć, što paśla takich historyj lidaram apazicyi treba padavać u adstaŭku.
Macukievič razvažaje: apazicyja pravodzić šmat sustreč na samym vysokim uzroŭni. I važna, jakoje pytańnie tam stavicca. Adna reč — kazać, što vyzvaleńnie palitviaźniaŭ važnaje, ale iści na sastupki Łukašenku nielha, pakul jon nie vykanaje ŭsie našy patrabavańni.
«A možna stavić pytańnie inakš: «My hatovy i vitali b, kab vy ŭklučylisia ŭ hety praces i na niejkich prymalnych umovach (jakija my možam abmierkavać asobna), pastaralisia vyzvalić kaho-niebudź», — vykazvaje svajo bačańnie były dypłamat.
«My bačym, što ŭ tych vypadkach, kali lidary zachodnich krain pradmietna zajmalisia vyzvaleńniem tych palitźniavolenych, jakija ich cikavili, hetyja ludzi byli vyzvaleny. Pry hetym nie vialikim koštam. Nie admianiajučy sankcyj, a navat uvodziačy novyja», —
zaŭvažyŭ Macukievič i ŭ jakaści prykładu pryvioŭ zvanok dziaržsakratara ZŠA Marka Pampieja Łukašenku, paśla jakoha ŭ kastryčniku 2020 hoda byŭ vyzvaleny Vital Šklaraŭ.
Paśla hoda kantaktaŭ z aficyjnym Minskam Šviejcaryja damahłasia vyzvaleńnia Natalli Chierše. Ale paśla vyzvaleńnia pryniała novy sankcyjny pakiet, jaki byŭ da hetaha pryniaty ES, i dałučałasia da ŭsich nastupnych.
U 2021 hodzie premjer Izraila adnym zvankom Łukašenku vyzvaliŭ svaju hramadzianku Maju Rajten-Stol z turmy.
«Adnak, heta ŭsio hramadzianie zachodnich krain, a što budzie z Babarykam, Statkievičam? Chto pavinien pazvanić?»
— spytali ŭ Macukieviča.
«Dośvied Rasii pakazvaje, što heta mahčyma. (…) Dumaju, što dla biełaruskaha režymu nie składaje vialikaj ciažkaści vyzvalić usich palitźniavolenych (i samych značnych taksama) na praciahu 48 hadzin. Bo hetyja ludzi nie ŭjaŭlajuć nijakaj pahrozy.
Možna dakładna taksama na praciahu nastupnych hadzin ich pasadzić nazad. Kali jany vyjeduć za miažu, to, jak vy bačycie pa dośviedzie apošnich čatyroch hadoŭ, usio, što adbyvajecca za miažoj, nie ŭjaŭlaje pahrozy dla biełaruskich uładaŭ, i ŭjaŭlać nie moža».
Što Łukašenka moža atrymać u abmien na Ryka Kryhiera? Viersija Frydmana
Čamu ŭ vialikim abmienie nie było biełaruskich palitviaźniaŭ? Adkaz Viačorki
«Kali b Zachad zatrymlivaŭ łukašenkaŭskich ahientaŭ, moh by być abmienny fond». Viačorka — pra palitviaźniaŭ, kadravuju ciakučku ŭ Kabiniecie,
«Heta byli pieramovy z Maskvoj, Minsk u ich nie ŭdzielničaŭ». Ofis Śviatłany Cichanoŭskaj prakamientavaŭ abmien źniavolenymi
Va Ukrainie zahinuła 24-hadovaja biełaruskaja dobraachvotnica Maryja Zajcava20
Kamientary