Hramadstva22

Adnaho z byłych hałoŭnych turemščykaŭ Biełarusi buduć sudzić razam z žonkaj za ŭdzieł u pratestach

U Minsku za ŭdzieł u pratestach buduć sudzić Siarhieja Sandaluka — byłoha namieśnika načalnika Departamienta vykanańnia pakarańniaŭ (DVP) MUS, piša «Lusterka». Hetaje viedamstva kiruje ŭsioj pienitencyjarnaj sistemaj Biełarusi — turmami, kałonijami, SIZA i inšymi papraŭčymi ŭstanovami. Razam z mužčynam sudziać i jaho žonku.

Siarhiej Sandaluk sprava. Fota: UUS Hrodzienskaha abłvykankama

Imiony Siarhieja i Anžeły Sandalukoŭ źjavilisia ŭ raskładzie suda Kastryčnickaha rajona Minska. Praces nad imi pačniecca 6 žniŭnia ŭ 10.30 i budzie adkrytym.

Muža i žonku sudziać pa adnoj kryminalnaj spravie. Im vystaŭlenaje abvinavačvańnie ŭ «aktyŭnym udziele ŭ hrupavych dziejańniach, jakija hruba parušajuć hramadski paradak». Heta č. 1 art. 342 KK — tak zvany narodny artykuł, pavodle jakoha represujuć bolšaść šarahovych udzielnikaŭ mirnych pratesnych maršaŭ 2020 hoda.

Daviedaŭšysia pra budučy sud, «Lusterka» pravieryła asoby abvinavačanych z dapamohaj Belpol i pierakanałasia, što havorka idzie mienavita pra byłoha namieśnika načalnika DVP.

Šmat hadoŭ va ŭnutranych vojskach

Pałkoŭnik unutranaj słužby Siarhiej Sandaluk naradziŭsia ŭ Mazyry ŭ 1971 hodzie, ciapier jamu 53 hady. Jon šmat hadoŭ słužyŭ u vajskovaj čaści 7404 u Baranavičach — heta 4-ja śpiecyjalnaja milicejskaja bryhada ŭnutranych vojskaŭ MUS. U 1996 hodzie Sandaluk, pa jaho słovach, kamandavaŭ tam rotaj, a ŭ 2000-ch dasłužyŭsia da kamandzira čaści. Prynamsi, u kancy 2012 hoda jon, miarkujučy z publikacyj u ŚMI, jašče zajmaŭ hetuju pasadu.

U skład v/č 7404 uvachodziać try strałkovyja bataljony ŭ Baranavičach, Ivacevičach i Vaŭkavysku i śpiecbataljony milicyi ŭ Hrodnie i Breście. Jak i inšyja čaści ŭnutranych vojskaŭ, hetaja śpiecyjalizujecca na achovie kałonij, kanvairavańni asudžanych, achovie hramadskaha paradku i roznych abjektaŭ. U vypadku pratestaŭ unutranyja vojski časta pryciahvajuć da ich razhonu.

Niejki čas Sandaluk taksama słužyŭ u bujnoj 5-j bryhadzie ŭnutranych vojskaŭ MUS u Mahilovie (v/č 6713). Jana siońnia ŭklučaje milicejskuju v/č 5527 u Babrujsku, strałkovyja bataljony ŭ Mahilovie, Babrujsku, Horkach i Škłovie, patrulny bataljon u abłasnym centry. Pałkoŭnik byŭ tam načalnikam štaba — pieršym namieśnikam kamandzira čaści.

Siarhiej Sandaluk. Fota atrymanaje ad Belpol

Turemny načalnik

Užo ŭ 2013 hodzie Siarhiej Sandaluk pajšoŭ na pavyšeńnie i staŭ namieśnikam načalnika Departamienta vykanańnia pakarańniaŭ. Na hetaj pasadzie jon adkazvaŭ za ideałahičnuju rabotu i kadravaje zabieśpiačeńnie.

Pałkoŭnik niekalki razoŭ adznačyŭsia ŭ ŚMI: jon pravodziŭ ekskursii pa kałonijach dla žurnalistaŭ dziaržvydańniaŭ, supracoŭničaŭ z Ekzarchatam Biełaruskaj pravasłaŭnaj carkvy, abmiarkoŭvaŭ uzajemadziejańnie DVP i Carkvy ź mitrapalitam Paŭłam.

Siarhiej Sandaluk (u centry) na sustrečy ź mitrapalitam Paŭłam u 2018 hodzie. Fota: «Viestnik tiuriemnoho słužienija»

«Dla niekatorych źniavolenych turemny ład žyćcia sapraŭdy stanovicca ramantykaj. Za doŭhija hady adsiedki jany advykajuć ad voli i ŭ zvyčajnym žyćci hublajucca. Kali za kalučym drotam jon hieroj, aŭtarytet, ź im ličacca, to na voli jon «nichto» i zvać jaho «nijak». Takomu praściej ździejśnić novaje złačynstva i znoŭ apynucca na narach», — kazaŭ milicyjanier dziaržvydańniu «SB» u 2013 hodzie.

Pry Sandaluku DVP arhanizoŭvaŭ spartyŭnyja spabornictvy z zaprašeńniem zamiežnych haściej. Naprykład, jak minimum u 2017 i 2018 hadach u Hrodnie prachodziŭ adkryty čempijanat Departamienta vykanańnia pakarańniaŭ MUS pa valejbole. U im udzielničali kamandy supracoŭnikaŭ DVP z usich rehijonaŭ Biełarusi, a taksama zbornaja akruhovaj turemnaj słužby Biełastockaha vajavodstva Polščy.

Darečy, abodva hady pieramožcami turniru stanavilisia mienavita pradstaŭniki zachodniaj susiedki. Paśla čaho čempijanat, padobna, pravodzić pierastali: infarmacyi pra matčy pačynajučy z 2019 hoda niama.

Siarhiej Sandaluk z polskimi kalehami na adkrytym čempijanacie DVP pa valejbole ŭ 2018 hodzie. Fota: UUS Hrodzienskaha abłvykankama

Vychad na piensiju?

Na miažy 2018-2019 hadoŭ Siarhiej Sandaluk pajšoŭ u adstaŭku z pasady namieśnika kiraŭnika DVP. Pra heta ŭ pačatku studzienia 2019-ha pisaŭ błoh Nexta, namiakajučy na niejki skandał u viedamstvie, a krynicy «Našaj Nivy» tady havaryli, što Sandaluk niaŭdała pasprabavaŭ prykryć ad adkaznaści svajho kiroŭcu, jaki «trapiŭ u niepryjemnuju situacyju, źviazanuju z užyvańniem siły». Sam ža pałkoŭnik u kamientary nam skazaŭ, što nie varta vieryć čutkam, jon prosta vyjšaŭ na milicejskuju piensiju i maje namier znajści sabie novuju pracu.

U tym ža studzieni 2019 hoda Sandaluk zarehistravaŭsia ŭ Leninskim rajonie Minska ŭ jakaści indyvidualnaha pradprymalnika, kab akazvać pasłuhi pa zdačy žylla ŭ pasutačnuju arendu. Jahony IP zastajecca dziejnym dahetul.

Siarhiej Sandaluk (druhi sprava) z polskimi kalehami na adkrytym čempijanacie DVP pa valejbole ŭ 2018 hodzie. Fota: UUS Hrodzienskaha abłvykankama

Z žonkaj Anžełaj mužčyna znachodzicca ŭ šlubie z 1999 hoda. Infarmacyi pra žančynu ŭ internecie amal niama — tolki toje, što ŭ pačatku 2000-ch jana niekalki hadoŭ była aformlenaja pradprymalnicaj u Minsku, ale paśla zakryła IP.

Što pahražaje byłomu funkcyjanieru MUS

Kali Siarhiej i Anžeła Sandaluki byli zatrymanyja, nieviadoma. Taksama niama infarmacyi pra toje, ci źmiaščali ich na čas śledstva ŭ SIZA abo jany znachodziacca na voli.

Byłomu namieśniku kiraŭnika biełaruskich turmaŭ i jahonaj žoncy pavodle «narodnaha» artykuła pahražaje pakarańnie ŭ vyhladzie aryštu na termin da 3 miesiacaŭ, albo abmiežavańnie voli na termin ad 2 da 5 hadoŭ, albo pazbaŭleńnie voli na termin da 4 hadoŭ.

Sudździoj pa spravie vystupaje Alena Žyvica. Z 2020 hoda jana vyniesła niekalki sotniaŭ represiŭnych prysudaŭ i administracyjnych rašeńniaŭ pa palityčna matyvavanych spravach. U pryvatnaści, mienavita Žyvica sudziła za pratesty muzykaŭ hurta Nizkiz. 

Kamientary2

  • Kub
    02.08.2024
    Milicyja z narodam!
  • Anžeła
    03.08.2024
    Naspadziavana atrymajecca, kali sapraŭdy načalnik z DVP razłupliŭsia na piensii. Honar i pavaha tady, ŽBSU!
 
Naciskańnie knopki «Dadać kamientar» aznačaje zhodu z rekamiendacyjami pa abmierkavańni.

Ciapier čytajuć

Łukašenka nacyjanalizavaŭ «Amkador». Šakucin staŭ prostym biełaruskim piensijanieram

Łukašenka nacyjanalizavaŭ «Amkador». Šakucin staŭ prostym biełaruskim piensijanieram

Usie naviny →
Usie naviny

Usie kamiery na darohach pačali łavić aŭto nie tolki za chutkaść25

Ukraina abvinavaciła Signal u sadziejničańni Rasii8

U Minsku milicyja siońnia ačapiła terytoryju vakoł HUMa

«Nafih ja siudy pryjšoŭ?» Łaŭroŭ nie strymaŭ emocyj pierad sustrečaj Pucina i Łukašenki VIDEA10

Łukašenka pryjechaŭ u Kreml ź luksavym remieniem Hermes FOTAFAKT20

Ci mohuć ZŠA vyvieści z ładu ŭzbrajeńni, jakija pastaŭlajucca Jeŭropie?1

Kijeŭ pačaŭ nacyjanalizacyju ŭkrainskich aktyvaŭ «Biełaruśkalija». Častku ź ich paśpieli pradać5

Łukašenka: Tramp zranku kaža adno, a viečaram druhoje16

«Ursuła ni razu narmalnaha pistaleta nie bačyła»17

bolš čytanych navin
bolš łajkanych navin

Łukašenka nacyjanalizavaŭ «Amkador». Šakucin staŭ prostym biełaruskim piensijanieram

Łukašenka nacyjanalizavaŭ «Amkador». Šakucin staŭ prostym biełaruskim piensijanieram

Hałoŭnaje
Usie naviny →

Zaŭvaha:

 

 

 

 

Zakryć Paviedamić