Na miažy zatrymany aŭtamabil z dvajnym dnom, kudy dostup ažyćciaŭlaŭsia praź piać lukaŭ
8 lutaha ŭ punkcie propusku «Katłoŭka» na biełaruska‑litoŭskaj miažy byŭ zatrymany mini‑ven «Piežo»,
jakim kiravaŭ hramadzianin Litvy, z dvajnym dnom. Dostup u tajnik ažyćciaŭlaŭsia praź piać raźniesienych pa ŭsioj mašynie lukaŭ,
paviedamiŭ načalnik pres‑centra Dziaržaŭnaha pahraničnaha kamiteta Biełarusi Alaksandr Ciščanka.
Try luki znachodzilisia pad zadnim siadzieńniem, adzin — pad siarednim i jašče adzin — pad piarednim. U zroblenym samatužnym sposabam tajniku znachodziłasia 3,5 tys. pačkaŭ cyharet.
Košt kantrabandy skłaŭ 2,7 młn. rubloŭ, aŭtamabil acenieny ŭ 8 młn. rubloŭ. Cyharety pieradadzieny ŭ Ašmianskuju mytniu, mašyna — kanfiskavana da rašeńnia suda.
Pavodle słoŭ Ciščanki,
uładkavańnie ŭ aŭtamabilach śpiecyjalnych tajnikoŭ dla pieravozki kantrabandy apošnim časam stała biźniesam.
Usiaho za minułyja sutki na miažy było zatrymana try aŭtamašyny sa śpiecyjalnymi tajnikami. Jašče dva kantrabandysty — hramadzianie Litvy i Biełarusi. Biełarus u «Falksvahienie‑Pasacie» taksama z dvajnym dnom i dostupam u jaho praź luk pieravoziŭ 1.650 pačkaŭ cyharet. Košt mašyny skłaŭ 30 młn. rubloŭ.
U minułyja vychadnyja na miažy ŭ kantrabandystaŭ było kanfiskavana pryblizna 400 młn. cyharet koštam prykładna 26 młn. rubloŭ. Kanfiskavanyja da suda transpartnyja srodki acenieny ŭ 300 młn. rubloŭ.
Alaksandr Ciščanka paviedamiŭ, što ŭ 2009 hodzie na miažy było zatrymana i kanfiskoŭvałasia da rašeńnia suda 395 aŭtamabilaŭ. Heta ŭ dva razy bolš, čym u 2008 hodzie. 245 ź ich źjaŭlalisia srodkam pieramiaščeńnia kantrabandy, 150 — abjektami kantrabandy. Vyjaŭlena bolš jak 2 tys. sprobaŭ nielehalnaha pieramiaščeńnia tavarna‑materyjalnych kaštoŭnaściej (u 1,5 razu bolš, čym u 2008 hodzie) na 34,6 młrd. rubloŭ. U 1,5 razu pavialičyłasia kolkaść vyjaŭlenych tajnikoŭ u transpartnych srodkach — z 350 da 594.
Kamientary