Sutarhi, koma i śmierć — kali zvyčajnaja vada moža stać śmiarotna niebiaśpiečnaj
Pitnaja vada maje rašajučaje značeńnie dla praduchileńnia abiazvodžańnia arhanizmu, ale jaje praźmiernaje spažyvańnie na praciahu karotkaha pieryjadu času moža pryvieści da prablem sa zdaroŭjem.
Ab tym, što pitnaja vada ŭ vialikaj kolkaści moža stać pryčynaj intaksikacyi, piša The Wall Street Journal. Hetaja prablema nie tak viadomaja, jak abiazvodžvańnie. Śpiecyjalisty adznačajuć, što simptomy vodnaj intaksikacyi nahadvajuć ciepłavy ŭdar, što abciažarvaje pastanoŭku pravilnaha dyjahnazu.
Nastupstvy praźmiernaj hidratacyi mohuć pryvieści da surjoznych prablem sa zdaroŭjem pačynajučy ad młosnaści, dezaryjentacyi i vanitavańnia až da sutarhaŭ i śmierci.
U čym pryčyna? Jak tłumačać vučonyja, kali čałaviek za karotki pramiežak času vypivaje šmat vady, to heta moža pryvieści da hipanatryjemii — źnižeńnia kancentracyi ŭ kryvi natryju (adnaho z elektralitaŭ, jaki dapamahaje zbałansavańniu vadkaści ŭ kryvi).
Hetaje zachvorvańnie nadzvyčaj niebiaśpiečnaje z pryčyny svajoj niepradkazalnaści i imklivaści. Najbolš ciažkim jaho ŭskładnieńniem źjaŭlajecca aciok hałaŭnoha mozhu, što vyklikaje sutarhi, komu i śmierć.
Śpiecyjalisty nahadvajuć, što nyrki čałavieka mohuć pierapracavać adzin litr vady za hadzinu. Kali čałaviek vypivaje bolš, to ryzyka razbaŭleńnia elektralitaŭ u kryvi istotna ŭzrastaje.
Da hipanatryjemii moža pryvieści drennaja funkcyja nyrak, sardečnaja ci piačonačnaja niedastatkovaść. Taksama ŭzrovień natryju mohuć źnizić niekatoryja antydepresanty ci abiazbolvajučyja.
Na pytańnie, kolki ž treba vypivać vady, daktary adkazvajuć tak — stolki, kab prahnać smahu. Rekamiendacyi ab tym, što ŭ siarednim darosłamu čałavieku patrabujecca kala dvuch z pałovaj litraŭ vady ŭ dzień (uklučna vadkaść, što ŭtrymlivajecca ŭ ježy) na samoj spravie adnosicca da zdarovaha čałavieka, jaki žyvie ŭ miakkim klimacie i viadzie nieaktyŭny ład žyćcia.
Patrebnaść čałavieka ŭ vadzie zaležyć šmat ad jakich paramietraŭ — połu, uzrostu, vahi, fizičnaj aktyŭnaści, klimatyčnych umovaŭ.
Pačućcio smahi ŭ čałavieka, pa słovach śpiecyjalistaŭ, mianiajecca z uzrostam, z-za hetaha stanovicca składaniej vyznačyć, kolki pić vady. A ludzi, jakija zajmajucca fizičnymi treniroŭkami, pavinny papaŭniać straty vady i soli, vypivajučy vadu z dadatkam elektralitaŭ i spažyvajučy salonyja zakuski.
Kali vy ličycie, što ŭ vas vodnaja intaksikacyja, lepš za ŭsio nieadkładna źviarnucca pa dapamohu da śpiecyjalista, jaki acenić stupień surjoznaści z dapamohaj analizaŭ kryvi i historyi chvaroby, uklučajučy leki, što vy prymajecie, najaŭnyja prablemy sa zdaroŭjem i fizičnuju aktyŭnaść.
U lohkich vypadkach doktar moža prosta parekamiendavać abmiežavać spažyvańnie vady, u ciažkich — prapisać śpiecyjalnyja leki ci injekcyi natryju.
Mnohija daśledčyki rekamiendujuć prytrymlivacca adnaho praviła dla praduchileńnia hipanatryjemii:
nie prymušajcie siabie pić bolš, čym patrabuje vaša smaha.
Kandydatami ŭ prezidenty zarehistravali Łukašenku i ŭsich čatyroch jaho sparynh-partnioraŭ4
Kamientary