Сутаргі, кома і смерць — калі звычайная вада можа стаць смяротна небяспечнай
Пітная вада мае рашаючае значэнне для прадухілення абязводжання арганізму, але яе празмернае спажыванне на працягу кароткага перыяду часу можа прывесці да праблем са здароўем.
Аб тым, што пітная вада ў вялікай колькасці можа стаць прычынай інтаксікацыі, піша The Wall Street Journal. Гэтая праблема не так вядомая, як абязводжванне. Спецыялісты адзначаюць, што сімптомы воднай інтаксікацыі нагадваюць цеплавы ўдар, што абцяжарвае пастаноўку правільнага дыягназу.
Наступствы празмернай гідратацыі могуць прывесці да сур'ёзных праблем са здароўем пачынаючы ад млоснасці, дэзарыентацыі і ванітавання аж да сутаргаў і смерці.
У чым прычына? Як тлумачаць вучоныя, калі чалавек за кароткі прамежак часу выпівае шмат вады, то гэта можа прывесці да гіпанатрыеміі — зніжэння канцэнтрацыі ў крыві натрыю (аднаго з электралітаў, які дапамагае збалансаванню вадкасці ў крыві).
Гэтае захворванне надзвычай небяспечнае з прычыны сваёй непрадказальнасці і імклівасці. Найбольш цяжкім яго ўскладненнем з'яўляецца ацёк галаўнога мозгу, што выклікае сутаргі, кому і смерць.
Спецыялісты нагадваюць, што ныркі чалавека могуць перапрацаваць адзін літр вады за гадзіну. Калі чалавек выпівае больш, то рызыка разбаўлення электралітаў у крыві істотна ўзрастае.
Да гіпанатрыеміі можа прывесці дрэнная функцыя нырак, сардэчная ці пячоначная недастатковасць. Таксама ўзровень натрыю могуць знізіць некаторыя антыдэпрэсанты ці абязбольваючыя.
На пытанне, колькі ж трэба выпіваць вады, дактары адказваюць так — столькі, каб прагнаць смагу. Рэкамендацыі аб тым, што ў сярэднім даросламу чалавеку патрабуецца каля двух з паловай літраў вады ў дзень (уключна вадкасць, што ўтрымліваецца ў ежы) на самой справе адносіцца да здаровага чалавека, які жыве ў мяккім клімаце і вядзе неактыўны лад жыцця.
Патрэбнасць чалавека ў вадзе залежыць шмат ад якіх параметраў — полу, узросту, вагі, фізічнай актыўнасці, кліматычных умоваў.
Пачуццё смагі ў чалавека, па словах спецыялістаў, мяняецца з узростам, з-за гэтага становіцца складаней вызначыць, колькі піць вады. А людзі, якія займаюцца фізічнымі трэніроўкамі, павінны папаўняць страты вады і солі, выпіваючы ваду з дадаткам электралітаў і спажываючы салёныя закускі.
Калі вы лічыце, што ў вас водная інтаксікацыя, лепш за ўсё неадкладна звярнуцца па дапамогу да спецыяліста, які ацэніць ступень сур'ёзнасці з дапамогай аналізаў крыві і гісторыі хваробы, уключаючы лекі, што вы прымаеце, наяўныя праблемы са здароўем і фізічную актыўнасць.
У лёгкіх выпадках доктар можа проста парэкамендаваць абмежаваць спажыванне вады, у цяжкіх — прапісаць спецыяльныя лекі ці ін'екцыі натрыю.
Многія даследчыкі рэкамендуюць прытрымлівацца аднаго правіла для прадухілення гіпанатрыеміі:
не прымушайце сябе піць больш, чым патрабуе ваша смага.
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»22
Каментары