«Ich departujuć, vizy anulujuć». Kala 40 biełaruskich turystaŭ, što jechali ŭ Ispaniju, zatrymali ŭ Hiermanii
Kala 40 turystaŭ ź Biełarusi, jakija jechali na aŭtobusie ŭ Ispaniju z hrečaskimi šenhienskimi vizami, zatrymali ŭ Niamieččynie. Papiaredniaja pryčyna — parušeńnie praviłaŭ vykarystańnia viz. Pra heta «Lusterku» raspaviali niekalki krynic. Ciapier biełarusam pahražaje departacyja i navat zabarona na ŭjezd u ES. Voś što viadoma.
![](http://nashaniva.com/img/w840d4webp1/photos/stock/travel-i7wm9.jpg.webp)
Pavodle infarmacyi «Lusterka», kala 60 turystaŭ adpravilisia na aŭtobusie ŭ tur ad firmy Interlux.
Jak paznačana na jaje sajcie, startavali turysty 19 žniŭnia ź Minska, punkt pryznačeńnia — Ispanija, uźbiarežža Mižziemnaha mora.
Faktyčna aŭtobus vyjechaŭ ź Biełarusi ŭ Łatviju (kab abjechać čerhi), dalej prajechaŭ terytoryju Polščy — u hetych krainach prablem nie ŭźnikła.
Dalej jany nakiravalisia ŭ Niamieččynu, i na miažy z Polščaj byŭ pašpartny kantrol.
Padčas jaho zatrymali kala 40 čałaviek. Z aŭtobusa źniali tych biełarusaŭ, u kaho była pieršaja pajezdka pa hrečaskaj šenhienskaj vizie.
Pa słovach našaj krynicy, hrečaskija vizy padarožnikam dapamahła aformić turfirma, «bo tolki ich i było realna atrymać». Za heta jany płacili 400 rubloŭ.
Tyja, dla kaho ŭjezd byŭ paŭtornym, zmahli pradoŭžyć padarožža. A zatrymanych źmiaścili ŭ palicejski ŭčastak u horadzie Frankfurt-na-Odery. Jany tam znachodziacca ŭžo bolš za sutki.
Što havorać u turkampanii?
Jak zvyčajnaja hramadzianka žurnalistka «Lusterka» patelefanavała ŭ Interlux. Tam paćvierdzili, što turystaŭ sapraŭdy zatrymali. I zaraz kampanija na suviazi ź imi.
Pa paviedamleńni krynicy, turkampanija imkniecca dapamahčy zatrymanym turystam i paabiacała pakryć usie hrošy za sapsavany adpačynak.
Što havorać u pasolstvie?
— My zajmalisia hetym pytańniem, niamieckaja palicyja nam abiacała, što da viečara ŭsich adpuściać, — skazali ŭ pasolstvie Biełarusi ŭ Hiermanii žurnalistcy «Lusterka», jakaja źviarnułasia tudy jak fizičnaja asoba.
Pa inšyja padrabiaznaści surazmoŭca adpraviła da konsuła. Pradstaviŭšysia biełaruskaj, u jakoj maci z hrečaskaj vizaj adpraŭlajecca ŭ tur pa Jeŭropie, žurnalistka «Lusterka» raspaviała, što čuła pra takoje zatrymańnie, i spytała, što rabić u vypadku, kali ŭžo nabyty tur. Konsuł paćvierdziŭ, što zatrymali biełarusaŭ, jakija mieli pieršy ŭjezd pa hrečaskaj vizie.
— U kaho była pieršaja pajezdka, tych źniali. Z 62 čałaviek bolš za 20 pajechali dalej, — skazaŭ jon. — Vyjavili pryncypovaść niemcy.
Jak niamieckaja palicyja vyznačyła, što heta niametavy ŭjezd i turysty, naprykład, nie nakiroŭvajucca ŭ Hrecyju? Konsuł rastłumačyŭ, što jany pravieryli dakumienty vadzicielaŭ, a taksama apytali pasažyraŭ.
— Jany apytali ŭsich, ludzi ščyra skazali, što jeduć u Ispaniju. Pahladzieli dakumienty vadzicielaŭ, ubačyli, što napramak zusim nie hrecki. Dy i Hrecyja krychu ŭ inšym napramku, pieršapačatkova ŭžo padazreńni ŭźnikajuć, — skazaŭ dypłamat.
— A jakoje pakarańnie za heta?
— Ich departujuć. Vizy anulujuć i departujuć. Nie viedaju (treba budzie potym udakładniać), z zabaronaj na ŭjezd ci nie. Ale nam palicyja napisała, što vizy anulavanyja. Siońnia viečaram turfirma aŭtobus im daść i ich u Biełaruś adviazie.
— Heta značyć, mohuć jašče i zabaronu na ŭjezd nakłaści?
— My zapyt rabili, kab jany [palicyja] rastłumačyli, za što zatrymali. Jany paličyli heta ŭjezdam nie pa pryznačeńni i adkazali, što hetyja dziejańni padpadajuć pad kryminalny pieraśled. U našych hramadzian šmat takich situacyj, ale zvyčajna pa 1-3 vypadki. Ale kab turaŭtobus [zatrymali], takoha nie było.
Pa słovach konsuła, u takoj situacyi lepš šukać inšyja varyjanty. Kali zaraz pajechać u Niamieččynu ź vizaj inšaj dziaržavy i heta budzie pieršaja pajezdka — «mohuć być prablemy».
— Ja pamiataju, 10 hadoŭ tamu zychodzili z taho, što pry adkryćci vizy treba ŭpieršyniu ŭjazdžać u tuju krainu, praz pasolstva jakoj ty atrymaŭ šenhien. Potym heta niejak usio źnikła, — tłumačyć dypłamat. — I kali było ŭsio dobra, byccam na heta ŭvahi nie źviartali. Bolš za toje, nakolki ja viedaju, navat sami konsuły ŭ toj daloki čas kazali: tak-tak, možna jechać, umoŭna kažučy, kali vizu vam dali ŭ Litvie, ničoha, možna jechać u Bałharyju adpačyvać.
Ale hetaje praviła nikudy nie źnikła, jano zaŭsiody zastavałasia. Prosta na niejkim etapie jano ścierłasia, turfirmy pierastali papiaredžvać. Krychu prosta na heta pierastali zvažać inšyja krainy. Ale… Krychu inšy čas, tamu vyrašyli prajavić pryncypovaść. Turfirma skazała, što ŭsio, bolš u takich situacyjach praź Niamieččynu jechać nie budziem. Ale ja kažu, hladzicie, kab inšyja krainy tak nie pačali rabić.
Kamientary