Šmatpakutny kompleks «Šanter Chił» na praśpiekcie Pieramožcaŭ u Minsku moža davieści siabra Alaksandra Łukašenki da cuhundara. I nie adnaho jaho.
U 2013-m Alaksandr Łukašenka asabista damaŭlaŭsia z kitajcami ab vydzialeńni lhotnaha kredytu dla siabra svajoj siamji Alaksandra Šakucina, jaki zadumaŭ vyraścić kala Drazdoŭ hrandyjozny, na 140 tysiač kvadratnych mietraŭ, biznes-kvartał «Šanter Chił».
Kolki inviestavaŭ sam Šakucin, dakładna nieviadoma. Banki zvyčajna prosiać, kab klijenty ŭnosili ŭłasnymi hrašyma chacia b 10% ad ahulnaj sumy. Kitajcy ž dakładvali $120 miljonaŭ.
Paručalnikam stała dziaržava praz harantyi ŭrada. Kali pazyčalnik nie zmoža viarnuć hrošy, kredyt stanie abaviazkam biudžetu.
Finansavaja madel jasnaja. Ułaśnik «Amkadora» płanavaŭ hasić kredyt z arendnych prybytkaŭ paśla ŭvodu abjekta ŭ ekspłuatacyju. Pačaŭšy budaŭnictva ŭ 2016-m, Šakucin mieŭsia zdać jaho letam 2019-ha, ale nie paśpieŭ.
Pamyłki ŭ kanstruktarskich rašeńniach zapavolvali budoŭlu, tut ža pačaŭsia pieryjad bujnych niaŭdač u asnoŭnym biznesie.
Sankcyi zakryli Zachad, kitajskaja ekspansija zvuziła mahčymaści ŭ Rasii.
Jak kažuć biznesmieny, jakija zajmajucca ekspartam techniki, da vychadu zachodnikaŭ z Rasii kitajskaja pradukcyja była ŭ słaboj pazicyi, bo nie isnavała arhanizavanaha absłuhoŭvańnia i kanałaŭ pastavak raschodnikaŭ. Ciapier usio heta jość, i kitajskija anałahi atrymlivajucca tańniejšymi za biełaruskija pa ŭsich paramietrach. Heta prablema nie tolki MTZ i MAZa, ale i dla «Amkadora» Šakucina.
Praz toje, što ŭ adnym miescy zvyšprybytki źnikli, a ŭ inšym ich nie zdaryłasia, jon nie toje što nie moža dafinansoŭvać budoŭlu, ale vymušany trybušyć i źniakroŭlivać svaje profilnyja aktyvy, kab ź ciažkaściami, pry ŭsiebakovym spryjańni dziaržavy, vyšukvać hrošy na pahašeńnie doŭhu pierad kitajcami, u jakich nie pryniata dyskantavać kredyty siabram Łukašenki.
My možam prykładna ŭjavić, kolki Šakucin vydatkavaŭ na «Šanter Chił» za hetyja hady, navat nie viedajučy dakładnaj pracentnaj staŭki i terminu kitajskaha kredytu.
Małaimavierna, kab Šakucin atrymaŭ nastolki lhotny kredyt, kab jon byŭ tańniejšym za bazavyja staŭki kitajskaha Centrabanka. U 2016-m hodzie, kali pačynałasia budaŭnictva, staŭka składała 4,3%.
Voźmiem hety pracent jak aryjencir dla razumieńnia paradku ličbaŭ.
Šakucin moh atrymać adterminoŭku pahašeńnia cieła doŭha na čas budaŭnictva (2016-2019), a moh i nie atrymać. Heta mała mianiaje sutnaść. Tolki za pieršyja try hady Šakucin pa nižniaj płancy padlikaŭ mieŭsia vypłacić kitajcam kala $15 miljonaŭ hadavymi.
Jon karystajecca hrašyma ŭžo vosiem hod, a prybytku ad ich nijakaha nie atrymlivaje. Apošnija hady staŭka ŭ Kitai płaŭna źnižałasia da siońniašnich 3,35%.
Kali b Šakucin vypłačvaŭ tolki pracenty, to jaho vydatki siahnuli b pad $40 miljonaŭ biez uliku ŭłasnych inviestycyj.
Kali ž jon užo pačaŭ hasić cieła kredytu, adpaviedna, skaračajučy bazu, ź jakoj naličvajucca hadavyja, to vydatki buduć blizkimi da sotni miljonaŭ dalaraŭ.
Tonkaści dakładnych ličbaŭ viadomyja tolki pahružanym u jahonyja bałansy i finansavyja spravazdačy.
Ale prablemy vidavočnyja pry luboj mietodycy padliku, choć sam Šakucin i skazaŭ by, što farmalnych strataŭ u jaho niama — jość tolki vydatki na toje, što isnuje i niečaha kaštuje. Nu, chiba što tolki nie akuplajecca.
Vielmi padobna, što pad biaźludnym niedabudam na praśpiekcie Pieramožcaŭ i chavajecca bolšaść prablem haładajučaha «Amkadora» i vialikaj siamji jahonych «dočak».
Samastojna davieści prajekt da rozumu jahony aŭtar ciapier nie ŭ stanie. U hetym sensie trajektoryja losu Šakucina vielmi nahadvaje trajektoryju losu Juryja Čyža, jaki taksama na čužyja hrošy pazałaziŭ u prajekty, jakija nie zmoh paciahnuć i akupić, i ŭ vyniku straciŭ usio.
Pakul što, nakolki možna razumieć, dziaržava nie dapamahaje Šakucinu hasić doŭh naŭprost ź biudžetu, ale robić heta praz dyskantavańnie ŭnutranych kredytaŭ i refinansavańnie abaviazkaŭ «Amkadora» i daččynych kampanij pierad biełaruskimi bankami.
Pra toje, što situacyja mienavita takaja, uskosna śviedčyć i sioletniaje rasśledavańnie «Biełpoła», u jakim aŭtary pryviali množnyja fakty nievytłumačalnych revieransaŭ dziaržavy ŭ bok Šakucina. Imavierna, tut samy značny matyvatar — pytańnie raźliku z kitajcami, a nie vialiki kłopat pra Šakucina.
Što ciapier rabić biznesmienu? Pa łohicy — šukać durnych uvajści ŭ prajekt; a jašče i ŭvajści tak, kab całkam nie vystavić za dźviery samoha Šakucina, jaki stolki hod admučyŭsia.
I možna ŭjavić, što znajści partniora, hatovaha vykupić častku biznesu (a zaadno i častku doŭha), Šakucinu siońnia nie tak prosta.
Ludziej, zdolnych paciahnuć takija inviestycyi, unutry krainy małavata, a rasijanie nie śpiašajucca ŭ Biełaruś pa tych ža pryčynach, što i zachodnija kapitały — samadurstva Łukašenki ŭ luby momant moža pamnožyć ich inviestycyi na nul.
Dy i sama biznes-dumka, jakaja ŭ 2013-m naradziła papieru z prajektam «Šanter Chiła», užo sastareła: u Minsku praficyt arendnych płoščaŭ, masa płaciežazdolnych arandataraŭ uciakli zdymać ofisy ŭ susiednija stalicy. Try ofisnyja śviečki nie abiacajuć załatych hor.
Siońnia ruki hrejuć mietrdateli — rasijanie zahružajuć haścinicy pad 100%.
U hetym moh by być aktualny biznes «Šanter Chiła», jaki b dazvoliŭ chutčej raźličycca z kredytoram i zarabić samim. Ale kab pierarabić jaho ź niepierśpiektyŭnaha ofisnaha centra na ŭskrainie Minska ŭ maržynalny apart-hatel, treba mianiać i nanoŭ uzhadniać prajekt, układvać u pierarobku… Masa niuansaŭ. Tym bolš zabaŭna, što raniej Šakucin užo mianiaŭ prajekt, parezaŭšy kolkaść hatelnych mietraŭ na karyść ofisnych. Pralik za pralikam.
U hetych umovach pa Minsku ŭžo z paŭhoda poŭzajuć čutki, što dziaržava razhladaje varyjant adabrać kompleks u bankruta. Nieviadoma tolki, na čyju karyść. Sam Šakucin pra heta, niesumnienna, taksama infarmavany.
U situacyi niapeŭnaści na prajekcie sprabujuć śpiekulavać litaraturnyja piersanažy. Najśviežy taki epizod zdaryŭsia na minułym tydni.
U piatnicu, 29 žniŭnia, niekalki biełaruskich resursaŭ — «Anłajnier» i OfficeLife, — apublikavali dziŭnyja pres-relizy ab tym, što kompleks «Šanter Chił» nibyta pieradadzieny ŭ kiravańnie biełaruskaj IT-kampanii X-Labs inc., rezidentu Parka vysokich technałohij.
«X-Labs inc. atrymaje kompleks «Šanter Chił» i zamovu na $180 miljonaŭ ad kampanii Blockchain Sports Ecosystem dla raspracoŭki pieradavych rašeńniaŭ na bazie štučnaha intelektu», — paviedamlałasia ŭ tekstach.
Pad viečar bieź nijakich tłumačeńniaŭ tekst na OfficeLife źnik uvohule, a na «Anłajniery» vydalili častku pra «atrymaje Šanter Chił», pakinuŭšy — užo ni da čaho — fota kompleksu ŭ šapcy materyjału.
Hetyja paviedamleńni cikavyja tym, što pakazvajuć, jakija kadry prabivajucca na kamiercyjny łandšaft u siońniašniaj Biełarusi, pakul mnohija inšyja zalehli na dno.
Kiruje kampanijaj X-Labs inc. biełarus Dźmitryj Saksonaŭ. Ukidvać čutki, što kompleks zabiraje mienavita jon, Saksonaŭ pačaŭ z paru miesiacaŭ tamu. Publikacyi ŭ ŚMI — tolki kulminacyja.
Praz suhučnaść imionaŭ minskija ryełtary, jakija navat nie padazravali pra isnavańnie Saksonava, stali dzialicca adzin z adnym plotkami ab mierkavanym prychodzie ŭ Minsk rasijskaha deviełapiera Dźmitryja Aksionava.
U Biełarusi nie redkaść, kali ludzi daviedvajucca ab svaim dalejšym losie sa ŚMI. I možna ŭjavić pačućci abałdziełaha Šakucina, jaki z «Anłajniera» daviedaŭsia, što bolš nie haspadar svajmu stvareńniu.
Ale, jak akazałasia ŭ vyniku, hetaje paviedamleńnie było niapraŭdaj, śpiekulacyjaj Saksonava z mahčymym prycełam na vialikuju afieru.
Sprava ŭ tym, što i X-Labs inc., i sam Blockchain Sports Ecosystem — heta prajekty Saksonava. «Vydavać» $180 miljonaŭ jon namieryŭsia sam sabie.
U tym, što ŭ hetaha čałavieka byŭ čas zarabić takija hrošy, možna śmieła sumniavacca — jon tolki niadaŭna pamianiaŭ čornuju robu na prezientabielny harnitur. U kancy 2018 hoda Saksonaŭ atrymaŭ čatyry hady ŭzmocnienaha režymu. Bazy «Biełpoła» viedajuć Dźmitryja Saksonava (1989 h.n.) jak čałavieka ź dziasiatkami epizodaŭ machlarstva i dvuma sudovymi prysudami pa č.3 art. 209.
«Šlacham padmanu i złoŭžyvańnia davieram zavałodaŭ hrašovymi srodkami […]», — apisvajuć bazy jaho kampietencyi.
Paśla vychadu z kałonii Saksonaŭ zachapiŭsia startapami. Startap-śfiera — heta takoje miesca, dzie možna lehalna źbirać hrošy na fantastyčnyja idei i potym, kali jany nie ŭźlacieli, nie nieści nijakaj adkaznaści — heta ryzyka, jakuju prymajuć vienčurnyja inviestary ŭ pošukach hienijaŭ.
Čytajcie taksama: Paśpiachovaja startapierka ci baranesa Miunchhaŭzien? Jak Taćciana Zareckaja trapiła ŭ Abjadnany kabiniet i čamu jana jaho pakinuła
Zrazumieŭšy temu, Saksonaŭ abjadnaŭsia z paraj ajcišnikaŭ, jakija raniej užo paśpiachova, ale biez praktyčnych vynikaŭ zasvojvali vienčurnyja srodki; abkłaŭsia źbiadniełymi zorkami, jak, naprykład, byłyja futbalisty Kievin Kurańji i Ramarya — i staŭ raźvivać futbolny startap u Brazilii.
Dzieci, abviešanyja datčykami, hulajuć u futboł, i miarkujecca, što zbor infarmacyi i jaje nastupny analiz štučnym intelektam dapamoža futbolnym skaŭtam bolš efiektyŭna znachodzić budučych talentaŭ, a inviestaram dazvolić układacca naŭprost u futbalistaŭ na rańnich stadyjach.
Heta ideja nie novaja, nijakich prykmiet jaje prybytkovaści pakul nie vidać. Ale toje, što Saksonaŭ niedzie znajšoŭ hrošy prynamsi na razhortvańnie drobnaj škoły ŭ Brazilii — fakt.
A pakolki ni ŭ trojcy rasijskich kampanij, dzie Saksonaŭ źjaŭlajecca akcyjanieram, ni ŭ adzinaj jahonaj biełaruskaj i nie pachnie miljonami dalaraŭ prybytku, to padobna, što dziejničaje Saksonaŭ na čužyja srodki.
I choć u jaho niama kampanij, jak jon zajaŭlaje, ni ŭ Dubai, ni na Siejšełach (my praviarali kampaniju BCS Ecosystem Limited, ad jakoj jon pradstaŭlajecca, u siejšelskim i emirackim rejestry jurydyčnych asobaŭ — takoj nie isnuje), heta nie zaminaje jamu pradstaŭlacca bujnym dziejačam i hastralavać pa ofisach davierlivych arabaŭ u sprobie napyłasosić hrošaj na svaje prajekty.
Chacia nakolki sapraŭdnyja sami šejchi, ź jakimi Saksonaŭ padpisvaje salidnyja pahadnieńni — taksama vialikaje pytańnie.
Na žyvapisnym fota ŭ artykule «Anłajniera» za śpinami radasnych padpisantaŭ — łahatypy nieisnujučaj jurydyčna Blockchain Sports i jašče mienš realnaha ryjadskaha inviestfonda Jossor Alpha Investment.
Internet pra prajekty hetaha fondu ničoha nie viedaje, členy jahonaha praŭleńnia nie majuć dačynieńnia da kirujučaj saudaŭskaj dynastyi. Veb-sajt «inviestycyjnaha fondu» ŭjaŭlaje saboj stvorany letaś łendzinh z apłačanym na adzin hod chostynham.
Atrymlivajecca, spamierskaja rassyłka ŭłaśnika X-Labs inc. pa biełaruskich miedyja ab tym, što ŭ jaho samoha jość sotni miljonaŭ dalaraŭ, biełaruskaja dziaržava pavieryła ŭ jahonyja idei i vydzieliła hihancki kompleks dla «raboty nad štučnym intelektam», a araby vydzielili 65 hiektaraŭ ziamli — heta, chutčej, jaskravaja sučasnaja adaptacyja kazki pra Kata ŭ botach z paznavalnymi hierojami i zrazumiełymi metami.
Nastupnaje cikavaje pytańnie — jak uzbrojeny ŭpłyvovymi suviaziami ŭłaśnik «Amkadora» abydziecca z chłopcam, jaki raschvalavaŭ i jaho samoha, i ŭsiu deviełapierskuju tusoŭku Biełarusi svaim žadańniem nažycca na šakucinskich ślazach.
«Naša Niva» — bastyjon biełaruščyny
PADTRYMAĆ«Prosta zalivaješsia ślaźmi i dumaješ: za što?» Iryna Ščasnaja i jaje čatyry balučyja hady za kratami4
Kamientary