Adna z najbolšych tytuniovych karparacyj śvietu, japonskaja JT International, i jaje brytanskaja dačka Gallaher Group razarvali licenzijnyja pahadnieńni z kampanijaj «Tytuń-Inviest». U adpaviednaści ź imi na praciahu mnohich hadoŭ u Biełarusi vypuskalisia i pradavalisia cyharety pad markami Winston, Camel, Sobranie i Monte Carlo, piša partał «Biełorusy i rynok».
Zhodna ź infarmacyjaj, raźmieščanaj na sajcie Nacyjanalnaha centra intelektualnaj ułasnaści, abodva dakumienty stracili lehitymnaść jašče ŭ mai hetaha hoda. Licenzijnaje pahadnieńnie JT International z «Tytuń-Inviest» dziejničała z 2008 hoda, a z Gallaher Group — z 2013 hoda.
U biełaruskim ofisie «Džapan Tabaka Internešnł EsEndDzi» paćvierdzili partały «Biełorusy i rynok» fakt, što pahadnieńni spynili svajo dziejańnie.
Najaŭnaść cyharet brendaŭ karparacyi ŭ štomiesiačnych pieralikach, jakija publikuje Ministerstva pa padatkach i zborach Biełarusi pa zajaŭlenych vytvorcami i imparciorami tytuniu maksimalnych roźničnych cenach, u ofisie patłumačyli patrabavańniami biełaruskaha zakanadaŭstva.
Zhodna ź im, hetyja danyja mohuć znachodzicca na sajcie Ministerstva pa padatkach i zborach na praciahu troch hadoŭ paśla zakančeńnia hoda, u jakim jany byli zajaŭlenyja abo źmienienyja. Pry hetym reštki ŭ roźnicy pieraaceńvajucca. Heta pryviało da taho, što ŭ žniŭni «Tytuń-Inviest», užo paśla razarvańnia licenzijnaha pahadnieńnia, pavysiŭ ceny na reštki zapasaŭ cyharet Camel, jakija zastavalisia na składach kram.
Pryčyny razarvańnia pahadnieńniaŭ nie nazyvajucca. Adnak viadoma, što ŭ śniežni 2023 hoda kampanija «Tytuń-Inviest» i jaje saŭładalniki Pavieł Tapuzidzis i Viktor Piatrovič trapili pad sankcyi Minfina ZŠA. Amierykanskaje viedamstva vyznačyła termin zavieršeńnia ździełak ź biełaruskim vytvorcam da 2 lutaha 2024 hoda.
Cikava, što ŭ Rasii, paśla doŭhich razvažańniaŭ, JTI zastałasia. Spačatku ŭ sakaviku 2022 hoda Japan Tobacco abjaviła, što prypyniaje ŭ Rasii novyja inviestycyi ŭ svaje 4 fabryki na miascovym rynku i markietynhavuju dziejnaść. Ale ŭ listapadzie 2023 hoda było abjaŭlena, što kiraŭnictvam karparacyi pryniata rašeńnie, zachoŭvajučy ŭsie praviły rehulavańnia (jak mižnarodnyja, tak i rasijskija), praciahnuć svoj biznes.
Na dumku ekśpiertaŭ «Biełorusy i rynok», nie vyklučany varyjant, što brendy JTI ciapier buduć zavozić u Biełaruś z Rasii. Abo budzie padpisana licenzijnaje pahadnieńnie ź inšym vytvorcam, jaki «čysty» z punktu hledžańnia mižnarodnych sankcyj.
Fabryka «Tytuń-Inviest» była dla JT International hałoŭnaj placoŭkaj u Biełarusi, dzie vypuskalisia jaje brendy. Historyja ž japonskaj karparacyi ŭ našaj krainie pačałasia 25 hadoŭ tamu.
U 1999 hodzie JT International pahłynuła amierykanskuju kampaniju R. J. Reynolds, razam ź jakoj joj dastałasia ŭžo najaŭnaja z kanca 1990-ch dola na biełaruskim tytuniovym rynku. R. J. Reynolds zabiaśpiečyła jaje dziakujučy papularnaści svaich brendaŭ Magna i Monte-Carlo.
JT International stała pieršym z bujnych suśvietnych tytuniovych hulcoŭ, jaki łakalizavaŭ vytvorčaść svaich brendaŭ na terytoryi Biełarusi. Heta adbyłosia ŭ 2005 hodzie, kali na mahutnaściach «Tytuń-Inviest» była zapuščanaja licenzijnaja vytvorčaść cyharet Monte Carlo i Magna. U 2006-2007 hadach tam ža pačali vypuskać biełaruskija Winston i Camel.
U 2008 hodzie JT International zarehistravała daččynuju kampaniju ŭ Biełarusi — «Džapan Tabaka Intiernešnł EsEndDzi».
Jak maje pracavać schiema pa abychodžańni sankcyj, nakładzienych na vytvorcaŭ cyharet
U Biełarusi źjaviłasia novaja kampanija — vytvorca cyharet. Ale nie novaje proźvišča jaje ŭładalnika
U Biełarusi vyraścili svoj tytuń
Va Ukrainie aktyvisty patrabujuć rasśledavać dziejnaść biełaruskaha «karala kantrabandy»
Na biełaruski tytuniovy rynak vyjšaŭ hulec z Rasii
Padroblenyja biełaruskija cyharety štampavała fabryka ŭ Rasii
Vyjavilisia svajackija suviazi pamiž ułaśnikami «Karony» Paŭłam Tapuzidzisam i Viktaram Piatrovičam
«Aleksin — heta Viktar, Tapuzidzis — heta Dźmitryj». Zachaplalnaja historyja biznesu Paŭła Tapuzidzisa
«Ja padniaŭ adnaho sa słabavikoŭ — i vypuściŭ jaho na asfalt». Desantnik Rusłan Akostka raskazaŭ, jak adsiedzieŭ 4 hady9
Kamientary