U Biełarusi pačali źbirać kitajskija mikraaŭtobusy raniej nieviadomaha nam brendu. Što za jany i kolki kaštujuć
Kitajski aŭtapram praciahvaje zavajoŭvać biełaruski aŭtamabilny rynak. Aproč užo zvykłych krasovieraŭ i siedanaŭ, na rynak zachodziać vytvorcy lohkaj kamiercyjnaj techniki.
Made in Belarus?
Brend Shineray aficyjna vyjšaŭ na rynak Biełarusi ŭ 2024 hodzie. Biełarusam prapanujucca jak pasažyrskija viersii na 7 abo 9 miescaŭ, tak i hruzavyja furhony.
Pad kapotam mikraaŭtobusaŭ ustalavany 2-litrovy bienzinavy ruchavik mahutnaściu 150 k.s., jaki pracuje ŭ pary z 5-stupieńčataj miechaničnaj karobkaj pieradač. Pryvad — zadni. Zajaŭleny raschod paliva — ad 7,2 litra na 100 km.
Shineray M7 pradajecca pa cenach ad 85 200 rubloŭ (kala 26 tysiač dalaraŭ).
Jak zajaŭlaje aficyjny dystrybjutar, u Biełarusi ŭžo pradajucca aŭtamabili miascovaj zborki. Zborku zapuścili tolki hetaj vosieńniu. Da Novaha hoda płanujuć sabrać bolš za 100 aŭtamabilaŭ.
Pastaŭščyki pryznajuć, što asnoŭnaja pieravaha biełaruskaj zborki — heta mahčymaść ekanomić na ŭtylizacyjnym zbory.
Z papiarednich zajaŭ pastaŭščyka ŭ cełym vynikaje, što kali b nie zachodnija sankcyi i pavyšeńnie stavak utylizacyjnaha zboru, biełaruskija aŭtaamatary, mahčyma, tak i nie daviedalisia b pra isnavańnie Shineray M7.
Navat u rekłamnym materyjale pastaŭščyk pryznavaŭsia, što jašče ŭ 2021 hodzie biznes chutčej byŭ hatovy pierapłacić i nabyć, naprykład, novy jeŭrapiejski furhon u aficyjnaha dylera zamiest novaha «kitajca». Ale časy źmianilisia.
Jak źmieny ŭ zakanadaŭstvie Biełarusi i ES adkryli darohu Shineray
Z 1 krasavika ŭ Biełarusi adčuvalna padniali staŭki ŭtylizacyjnaha zboru na hruzavuju techniku, u tym liku lohkuju kamiercyjnuju.
A paźniej Jeŭrasajuz uvioŭ novyja sankcyi, jakija zabaraniajuć ekspart u Biełaruś hruzavoha transpartu. A taksama lehkavoha z abjomam ruchavika, bolšym za 1,9 litra.
Praz heta možna nie sumniavacca, što nieviadomyja raniej kitajskija mikraaŭtobusy biełaruskaj zborki buduć karystacca popytam.
SK paviedamiŭ pra kryminalnuju spravu na 45 čałaviek13
Kamientary
Takaja siebie schiema prikrytija nielehalnych postavok.