«Chaču, kab u maich dziaciej byli narmalnyja siamiejnyja kaštoŭnaści». 21-hadovaja žycharka Łatvii sabrałasia pierajechać u Biełaruś
Dziaŭčyna z Łatvii apublikavała dopis u Threads, što ŭ chutkim časie płanuje pierajezd u Minsk. U kamientarach mnohija vykazvajuć nierazumieńnie.
21-hadovaja Monika žyvie ŭ Lijepai (horad u Łatvii kala Bałtyjskaha mora). Dziaŭčyna nazyvaje sabie pačynajučym majstram pa manikiury, jaki čakaje, kali skončycca ramont u jaje kabiniecie.
Mnohija karystalniki sacsietki byli ździŭleny płanami dziaŭčyny pierajechać z Łatvii ŭ Biełaruś.
«Pierajezd u krainu z fašysckim režymam? Heta jakaja stupień atupieńnia?» — zadaje pytańni adzin z karystalnikaŭ.
«Što pavinna zdarycca, kab pierajechać ź Jeŭropy ŭ kałhas…», — cikavicca inšy. U adkaz na heta adzin z karystalnikaŭ vykazaŭ zdahadku, što dziaŭčyna nie vyvučyła łatyšskuju movu i razmaŭlaje tolki pa-rusku.
Sama dziaŭčyna adkazała nastupnaje: «Adna z pryčyn — chaču, kab u maich dziaciej byli narmalnyja siamiejnyja kaštoŭnaści».
Praz toje, što tred nabraŭ šmat niehatyŭnych kamientaroŭ, karystalnica vykłała druhi dopis. U im jana vykazała ździŭleńnie takoj reakcyi.
Adzin z kamientataraŭ patłumačyŭ, što pierajechać u Biełaruś ź Jeŭropy ŭ 2024 hodzie — heta ŭsio roŭna, što pierajechać u Paŭnočnuju Kareju.
Taksama ŭ karystalnicy pytajucca, čamu krainaj dla pierajezdu jany abrała mienavita Biełaruś, a nie Rasiju.
Na što taja adkazvaje, što maje niekalki pryčyn, čamu nie choča ŭ Rasiju, ale nie ahučvaje ich. Dziaŭčyna dadaje, što joj z mužam Biełaruś padabajecca bolš.
Taksama dziaŭčyna adznačyła ŭ adnym z adkazaŭ, što Łatvija — heta jaje radzima.
Niekatoryja kamientatary dzielacca ŭłasnym dośviedam pierajezdu z Łatvii ŭ Rasiju abo Biełaruś.
Cikava, što adzin z karystalnikaŭ, jaki taksama ździŭleny vybaram, adznačyŭ, što raniej nie razumieŭ, adkul biełaruskija televizijonščyki znachodziać zamiežnikaŭ, jakija pierajechali ŭ Biełaruś. A ciapier bačyć, što jany jość.
Ci sapraŭdy jość popyt na pierajezd z Łatvii ŭ Biełaruś?
Nasamreč pierajezd z Łatvii ŭ Biełaruś nie takaja ŭžo i redkaja źjava. U dziaržaŭnych ŚMI časam źjaŭlajucca naviny z udziełam žycharoŭ Łatvii, jakija pierajechali ŭ Biełaruś abo ŭ Rasiju.
Jak praviła, heta prarasijski nastrojenyja ludzi, jakim aproč prasoŭvańnia ŁHBTK+ kaštoŭnaściej nie padabajecca ŭ Łatvii toj fakt, što dla paŭnavartasnaha pražyvańnia ŭ hetaj krainie treba vałodać dziaržaŭnaj movaj.
Zhodna z apošnimi danymi centralnaha statystyčnaha ŭpraŭleńnia — 34,6% nasielnictva Łatvii doma havorać pa-rusku.
Častka ruskamoŭnych u apošnija hady pačała bolš aktyŭna cikavicca pierajezdam u krainy, dzie možna atrymlivać adukacyju na ruskaj.
U telehramie navat jość supołka «Na PMŽ u Biełaruś», jakaja naličvaje kala 3700 udzielnikaŭ. Značnaja častka ź jakich — žychary Łatvii.
Kamientary