Lider abjadnanych demakratyčnych sił Biełarusi zrabiŭ zajavu ŭ suviazi z raspačataj biełaruskimi ŭładami kampanijaj dyskredytacyi jahonych rodnych.
❏
«Režym viadzie kampaniju traŭli mianie, jak lidera abjadnanych demakratyčnych sił, pry hetym nie curajecca cyničnych i amaralnych mietadaŭ. Paśla chvali represijaŭ u dačynieńni da maich kaleh i adnadumcaŭ, ułada pačała žorstki presinh i zapałochvańnie maich rodnych. Abjektami pieraśledu i ačarnieńnia abranyja dzieci, i heta havoryć pra toje, što dziela dasiahnieńnia svaich metaŭ ułada nie budzie hrebavać nijakimi srodkami.
Siońnia režym sprabuje dakazać svaju siłu vajujučy z maimi dziećmi. Meta hetaj vajny vidavočnaja - maksimalna abmiežavać maju palityčnuju dziejnaść, akazać psichałahičny cisk i demaralizavać mianie i maich kaleh pa abjadnanym demakratyčnym siłam. Heta biessensoŭnyja i bieznadziejnyja sproby. Ułada, jakaja chavajecca za dziaciej, nie maje maralnaha prava kiravać krainaj.
Siońniašnija brutalnyja dziejańni režymu śviedčać, što akcyja salidarnaści, jakuju inicyjavali abjadnanyja demakratyčnyja siły, maje vidavočny pośpiech. Ułada stvaraje atmaśfieru stracha ŭ hramadstvie, my hety strach razburajem. Svabodnyja ludzi, jakija pazbavilisia strachu, nikoli nie padtrymajuć isnujučy režym. Ułada heta ŭśviedamlaje, tamu ŭsimi mahčymymi sposabami imkniecca pieraškodzić našaj salidarnaści.
Tak, siońnia, inicyjatary, aŭtary i vykanaŭcy hetaj kampanii traŭli adčuvajuć biespakaranaść i ŭsiedazvolenaść! Ale Biełaruś abaviazkova dačakajecca času, kali tyja, chto robić ź dziaciej «vorahaŭ naroda», adkažuć za svaje dziejańni pierad zakonam.»
Nahadajem, što 23 žniŭnia ŭ efiry prahramy «Panarama» Pieršaha Nacyjanalnaha kanała Biełaruskaha telebačańnia byŭ pakazany čarhovy siužet pra toje, što syn Alaksandra Milinkieviča vyklučany za «pjany deboš» z Prahramy dapamohi represavanym studentam, jakuju padtrymlivaje polski ŭrad. A 27 žniŭnia toj ža telekanał paviedamiŭ, što ŭ adnosinach da syna Iny Kulej, žonki Alaksandra Milinkieviča, zaviedziena kryminalnaja sprava. Jaho vinavaciać u ŭchileńni ad ahulnaj vajskovaj pavinnaści. Pavodle BT chłopiec byccam by padaŭ u Brescki vajenkamat falšyvuju miedyčnuju daviedku. Alaksandr Milinkievič kateharyčna abvierh infarmacyju, ahučanuju BT.
Kamientary