Rasija z sakavika pastaviła Paŭnočnaj Karei miljon barelaŭ nafty — heta ŭ 10 razoŭ bolš, čym aficyjna letaś

Z sakavika hetaha hoda Rasija pastaviła Paŭnočnaj Karei bolš za miljon barelaŭ nafty. Da takoj vysnovy pryjšoŭ Brytanski daśledčy centr Open Source Centre, praanalizavaŭšy spadarožnikavyja zdymki, piša Bi-bi-si.

Viadučyja ekśpierty i ministr zamiežnych spraŭ Vialikabrytanii Devid Łemi skazali Bi-bi-si, što, pa ich pierakanańni, hetaj naftaj Maskva raspłačvajecca z Pchieńjanam za zbroju i sałdat, jakimi KNDR dapamahaje Rasii vajavać z Ukrainaj.

Analiz spadarožnikavych zdymkaŭ, jakim Open Source Centre ekskluziŭna padzialiŭsia ź Bi-bi-si, pakazvaje, što za apošnija vosiem miesiacaŭ bolš za tuzin Paŭnočnakarejskich tankieraŭ ździejśnili 43 rejsy pamiž rasijskim naftavym terminałam na Dalokim Uschodzie i svaimi partami.

Zdymki tankieraŭ u mory pakazvajuć, što ŭ Rasiju jany išli pustymi, a viartalisia zahružanymi.

Pieršy rejs, zadakumientavany Open Source Centre, adbyŭsia 7 sakavika 2024 hoda, praź siem miesiacaŭ paśla pieršych paviedamleńniaŭ ab pastaŭkach paŭnočnakarejskich bojeprypasaŭ Rasii. Apošni — 5 listapada.

«Hety pastajanny prytok nafty daje Paŭnočnaj Karei ŭzrovień stabilnaści, jakoha jana nie bačyła z tych časoŭ, jak byli ŭviedzienyja sankcyi», — miarkuje staršy analityk Open Source Centre Džo Biern.

Paŭnočnaja Kareja z-za svajoj jadziernaj prahramy znachodzicca pad sankcyjami AAN, i joj zabaroniena zakuplać bolš za 500 tysiač barelaŭ nafty ŭ hod.

Miljon barelaŭ (56 tysiač ton), pra jaki kaža Open Source Centre, — heta dla Rasii zusim nievialiki abjom: pavodle aficyjnych źviestak, jana za adny sutki zdabyvaje amal u dziesiać razoŭ bolš.

Open Source Centre adznačaje, što miljon barelaŭ — heta minimalnaja adznaka, tamu što častku rejsaŭ jany nie zmahli adsačyć z-za abłokaŭ.

«Uvieś žnivień było vobłačna, tak što my nie zmahli zadakumientavać nivodnaha rejsa», — tłumačyć Džo Biern.

Pavialičyć

Rasijski MZS na prośbu Bi-bi-si prakamientavać vysnovy Open Source Centre nie adkazaŭ.

«Hetyja pastaŭki zabiaśpiečvajuć paliva dla pucinskaj vajskovaj mašyny: heta nafta za rakiety, nafta za artyleryju, nafta za žaŭnieraŭ», — kaža Chju Hryfits, jaki ŭ 2014-2019 hadach uznačalvaŭ hrupu ekśpiertaŭ AAN, jakaja sačyła za vykanańniem sankcyj suprać Paŭnočnaj Karei.

Kiraŭnik Foryn-ofisa Devid Łemi ŭ zajavie dla Bi-bi-si skazaŭ: «Rasija ŭ svajoj vajnie va Ukrainie ŭsio bolš pačynaje zaležać ad Paŭnočnaj Karei, jaje žaŭnieraŭ i zbroi ŭ abmien na naftu».

Nafta i naftapradukty patrebnyja Pchieńjanu, u pryvatnaści, dla taho, kab pierakidvać pa krainie vojski i ŭzbrajeńni, a taksama zapraŭlać aŭtamabili kiroŭnaj elity.

Režym sankcyj dazvalaje Paŭnočnaj Karei zakuplać usiaho 500 tysiač barelaŭ u hod, tady jak jaje spažyvańnie, pavodle acenak śpiecyjalistaŭ, składaje kala dzieviaci miljonaŭ barelaŭ. Tamu KNDR kuplaje naftu i naftapradukty nielehalna.

Pa słovach doktara Ho Mionchuna z paŭdniovakarejskaha Instytuta nacyjanalnaj stratehii ŭ halinie biaśpieki, źviazanaha z vyviedkaj, hetyja nielehalnyja sposaby pastavak uklučajuć pierahruzku nafty z tankiera na tankier u adkrytym mory. Heta i ryzykoŭny, i darahi sposab.

«A ciapier Kim Čen Yn atrymlivaje naftu naŭprost, prytym, napeŭna, lepšaj jakaści, i jość vierahodnaść, što jon atrymlivaje jaje biaspłatna, za bojeprypasy. Što moža być lepš? — kaža doktar Ho. — Miljon barelaŭ heta ništo dla takoj naftazdabyvajučaj krainy, jak Rasija, ale heta istotny abjom dla Paŭnočnaj Karei».

Adsočanyja tajemnyja pastaŭki

Va ŭsich 43 rejsach, jakija adsačyŭ Open Source Centre pa spadarožnikavych zdymkach, paŭnočnakarejskija tankiery prychodzili ŭ rasijski port Uschodni z adklučanymi trekierami, jakija pakazvajuć, dzie znachodzicca sudna, a adtul viartalisia ŭ čatyry porty na ŭschodnim i zachodnim uźbiarežžach KNDR.

«Sudny cicha prychodzili amal kožny tydzień. Z sakavika idzie davoli pastajanny patok», — kaža Džo Biern z Open Source Centre.

Kamanda, jakaja adsačyła ruch hetych tankieraŭ, viedaje ich hruzapadymalnaść z tych časoŭ, kali byli ŭviedzienyja sankcyi.

Zatym jany vyvučyli fatahrafii sudnaŭ, jakija prychodzili va Uschodni i sychodzili ź jaho, źviartajučy ŭvahu na ich asadku — heta značyć, toje, nakolki jany byli zahružanyja.

Paŭnočnakarejskija tankiery, pavodle ich acenki, sychodzili zahružanymi na 90%.

Z hetych zychodnych danych i była vyviedziena adznaka ŭ miljon barelaŭ. Heta ŭ dziesiać razoŭ bolš, čym Rasija aficyjna pastaviła Paŭnočnaj Karei ŭ 2023 hodzie.

ZŠA jašče ŭ traŭni zajavili, što, pavodle ich acenki, Rasija pastaviła ŭ KNDR 500 tysiač barelaŭ nafty.

U sakaviku hetaha hoda Rasija tarpiedavała padaŭžeńnie mandata hrupy ekśpiertaŭ AAN, jakaja sačyła za vykanańniem sankcyj suprać Paŭnočnaj Karei.

«My adsočvali niekatoryja z datyčnych sudnaŭ i kampanij, ale nas prymusili spynić pracu — mahčyma, paśla taho, jak jany ŭžo pieravysili limit u 500 tysiač barelaŭ», — kaža amierykanka Ešli Chies, jakaja pracavała ŭ hrupie ekśpiertaŭ da samaha jaje rospusku.

Sa słoŭ brytanca Eryka Pienton-Voŭka, jaki ŭznačalvaŭ hrupu ŭ 2021-2023 hadach, rasijskija čalcy hrupy sprabavali pieraškadžać jaje pracy.

«A ciapier, kali hrupy bolš niama, jany mohuć prosta ihnaravać praviły. Toj fakt, što Rasija zaprašaje hetyja sudny ŭ svaje party i zahružaje ich naftaj, demanstruje novy ŭzrovień pahardy sankcyjami», — kaža ekśpiert.

Ciapier Pienton-Voŭk uvachodzić u praŭleńnie Open Source Centre. Jon adznačaje, što prablema z supracoŭnictvam Maskvy i Pchieńjana hłybiej, čym pieravyšeńnie limitu pastavak nafty.

«Ciapier hetyja aŭtarytarnyja režym naroščvajuć supracoŭnictva, dapamahajuć adzin adnamu damahacca čaho jany chočuć i ihnarujuć pažadańni suśvietnaj supolnaści. Heta stanovicca ŭsio bolš niebiaśpiečnym […] Mienš za ŭsio nam chaciełasia b, naprykład, kab paŭnočnakarejskaja taktyčnaja jadziernaja zbroja źjaviłasia ŭ Irana», — tłumačyć Pienton-Voŭk.

Paŭdniovaja Kareja i jaje chaŭruśniki bolš za ŭsio aścierahajucca, što za dapamohu ŭ vajnie z Ukrainaj Maskva adździačyć Pchieńjanu spadarožnikavymi i rakietnymi technałohijami.

«Kali vy pasyłajecie svaich ludziej pamirać na čužoj vajnie, to miljon barelaŭ nafty — naŭrad ci dastatkovy košt», — razvažaje doktar Ho.

Ź im zhodny rasijski śpiecyjalist pa Paŭnočnaj Karei, prafiesar paŭdniovakarejskaha ŭniviersiteta Kunmin Andrej Łańkoŭ.

«Ja raniej dumaŭ, što heta nie ŭ intaresach Rasii — dzialicca vajskovymi technałohijami, ale ciapier, mahčyma, u jaje inšy raźlik. Rasiejcam patrebnyja hetyja žaŭniery, i heta daje paŭnočnakarejcam novy ryčah upłyvu», — kaža Łańkoŭ.

• 0
• 0
• 0
• 0
• 0
• 0
• 0
• 0