Błohierka vydavała svaju zdarovuju dačku za śmiarotna chvoruju, kab atrymać danaty i łajki. A mahčyma, i truciła jaje

33-hadovaja žycharka Aŭstralii, maci čaćviarych dziaciej Ałana Charys u pačatku hetaha hoda stała raskazvać u instahramie i tyktoku pra «pakuty» svajoj małodšaj dački Dejzi, piša The Sun.

Ałana dzialiłasia svaim rasčaravańniem u daktarach i publikavała kranalnyja pasty, vykazvajučy strachi za zdaroŭje Dejzi. U žniŭni Ałana zajaviła, što dziaŭčynku ekstranna špitalizavali paśla straty prytomnaści:

«Dejzi niekali była žyćciaradasnaj i aktyŭnaj dziaŭčynkaj, ale niadaŭna jaje stan rezka pahoršaŭ, i ciapier jana, padobna, znachodzicca ŭ stanie, jaki nahadvaje komu, užo bolš za 100 hadzin. Na žal, dla Dejzi niama biaśpiečnych lekaŭ abo stymulataraŭ, jakija mahli b dapamahčy joj vyjści z hetaha stanu. Za čas, pakul jana znachodziłasia «ŭ śnie», joj zrabili mnostva ŭkołaŭ i ŭziali masu analizaŭ kryvi, ale jana navat nie mirhnuła».

U vieraśni Ałana raspaviała, što Dejzi paŭtorna špitalizavali paśla taho, jak jana stała mlavaj i vidavočna niezdarovaj. Jana padrabiazna apisała puchliny, jakija nibyta cisnuli na mozh dački, i raskazała, što za tydzień dziaŭčynka pieraniesła dźvie apieracyi na hałaŭnym mozhu. Paźniej Ałana paviedamiła, što paśla pieraniesienych apieracyj stan dziaŭčynki nie palepšaŭ, i jana arhanizuje palijatyŭnuju dapamohu joj u siabie doma.

Pavialičyć

Jak paviedamlajecca, na praciahu leta i pačatku vosieni było adkryta niekalki dabračynnych rachunkaŭ dla zboru srodkaŭ na lačeńnie Dejzi. Akramia samoj maci, rachunak adkryła babula dziaŭčynki pa baćkoŭskaj linii, adzin siabar siamji i navat miascovaja spartyŭnaja zała. Ahułam za niekalki miesiacaŭ atrymałasia sabrać sumu, ekvivalentnuju $16 tysiačam.

Ałana Charys śćviardžała, što ŭ jaje dački dyjahnastavali epilepsiju, infantylnyja spazmy (redkuju, ale surjoznuju formu sutarhaŭ u niemaŭlat i maleńkich dziaciej) i tubierozny skleroz (redkaje hienietyčnaje zachvorvańnie, jakoje vyklikaje rost dabrajakasnych puchlin u mozhu i inšych orhanach).

Pavodle infarmacyi babuli Dejzi, jakuju jana pryviała na sajcie dla zboru srodkaŭ, dziaŭčynka taksama pakutuje ad nieŭstanoŭlenaha rasstrojstva abo zachvorvańnia ŭ hałaŭnym mozhu i ačahovaj korkavaj dyspłazii.

Adnak u kastryčniku siamja niečakana spyniła svaju aktyŭnaść u sacyjalnych sietkach, akaŭnty byli vydaleny, a paźniej źjaviłasia infarmacyja ab tym, što maci dziaŭčynki zmahła padmanuć daktaroŭ, prymusiŭšy ich zrabić Dejzi dźvie niepatrebnyja apieracyi na hałaŭnym mozhu. Paźniej dakumienty, atrymanyja žurnalistami, pakazali, što chvaroba Dejzi była nie nastolki surjoznaj, jak heta śćviardžała jaje maci.

Ałanu abvinavačvajuć u tym, što dla taho, kab vyklikać surjoznyja simptomy ŭ svajoj zdarovaj dački, jana davała joj bienzadyjaziepin — psichatropny srodak, jakija zvyčajna prymianiajecca dla lačeńnia takich stanaŭ, jak tryvožnaść, biassońnica i sutarhi.

Pa infarmacyi, dastupnaj ź miascovych ŚMI, miedsiostry padniali tryvohu paśla taho, jak ubačyli videa Ałany ŭ sacyjalnych sietkach. Jany zasumniavalisia ŭ praŭdapadobnaści jaje apoviedaŭ. U vyniku balnica pieradała infarmacyju ŭ palicyju, padazrajučy, što Dejzi mahła być padvierhnutaja narkatyčnamu ŭździejańniu padčas špitalizacyi.

Praviedzieny taksikałahičny analiz paćvierdziŭ najaŭnaść bienzadyjaziepinu ŭ arhaniźmie Dejzi.

Hety fakt razam z maŭčańniem siamji praciahvaje budaražyć hramadskaść. Na hety momant troje inšych dziaciej Ałany zabrali z-pad jaje apieki. 27-hadovy muž žančyny zajaviŭ, što ničoha nie viedaŭ.

Pa adnoj z teoryj, jakuju vykazvajuć karystalniki internetu, u Ałany moža być chraničnaje simulatyŭnaje rasstrojstva viadomaje jak «delehavany sindrom Miunchhaŭziena». Pry jaho najaŭnaści baćki naŭmysna vyklikajuć u dziciaci simptomy chvaroby abo pierabolšvajuć najaŭnyja, kab źviarnucca pa miedycynskuju dapamohu. Takija dziejańni ździajśniajuć čaściej žančyny.

Adzin z samych viadomych vypadkaŭ — sprava Džypsi Roŭz Błanšar. Maci dziaŭčynki manipulavała jaje zdaroŭjem, pierakonvajučy asiarodździe, što jaje dačka pakutuje ad mnostva surjoznych zachvorvańniaŭ, u tym liku lejkiemii i myšačnaj dystrafii. Heta pryviało da taho, što Džypsi była padvierhnutaja šmatlikim niepatrebnym miedycynskim praceduram i apieracyjam, a sama maci vykarystoŭvała chvarobu dački dla atrymańnia spahady i hrošaj. Pa matyvach hetaj historyi ŭ 2019 hodzie byŭ źniaty mini-sieryjał «Prytvorstva» (The Act).

Adnosna Ałany i jaje dački Dejzi pakul nielha ničoha skazać dakładna. Ułady Aŭstralii pravodziać rasśledavańnie pa spravie.

• 0
• 0
• 0
• 6
• 2
• 3
• 12
• 0