Babrujčanka sabrała kalekcyju ź dźviuch tysiač navahodnich jełačnych cacak časoŭ SSSR
Samyja staryja šary ŭ kalekcyi — 1930-ch hadoŭ.
Halina Žuk — nastaŭnica biełaruskaj i ruskaj moŭ z Babrujska. Kala 20 hadoŭ adpracavała ŭ škole, ciapier zajmajecca repietytarstvam. A kalekcyjanavańnie — jaje sapraŭdnaje zachapleńnie apošnich hadoŭ 15, piša «Viačerni Babrujsk».
«Pieršaja sieryja, jakuju ja sabrała — z «Kazki pra rybaka i rybku»: dzied, baba i rybka. Potym byŭ «Doktar Ajbalit», z hetaj kazki ja sabrała siem piersanažaŭ. Pastupova ŭ mianie źjaviłasia šmat cacak roznych hadoŭ, roznych vytvorcaŭ».
Na siońnia ŭ kalekcyi Haliny bolš za 2 tysiačy savieckich jołačnych cacak.
Jość cacki z vaty, kardonnyja, papiarovyja i navat z drotu. Apošnija — pieryjadu VAV, zroblenyja na zavodzie «Moskabiel» z adchodaŭ vytvorčaści.
Samyja kaštoŭnyja — navahodnija ŭpryhažeńni, vypuščanyja da 1966-ha hoda, jany ličacca kalekcyjnymi. Takija stali apošnimi, jakija byli zroblenyja ŭručnuju, paźniej vytvorčaść nabyła pramysłovy razmach i cacki stali nie takimi detalizavanymi.
Pa rašeńni Mižnarodnaj arhanizacyi kalekcyjanieraŭ jołačnych cacak Golden Glow staradaŭnimi pryznajucca cacki, vyrablenyja da 1966 hoda.
Samyja staryja ŭ kalekcyi Haliny — šary 1930-ch hadoŭ z mastackim rośpisam i jašče vatnyja cacki, vypuščanyja paśla 1936 hoda.
Jość u Haliny i lubimyja cacki.
«Vielmi padabajucca mnie cacki pa matyvach kazki Džani Radary «Pryhody Čypalina». Usiaho ŭ hetaj sieryi 23 cacki, mnie pakul udałosia sabrać 10. Jany vielmi detalizavanyja i cikavyja. A jašče šalona lublu ledziašy, tamu što jany nahadvajuć mnie dziacinstva. U mianie ich kala 100 štuk, i ni adzin nie paŭtarajecca!
Lublu cacki i paštoŭki ź sieryi «Dzieci», i jany vyklikajuć uva mnie nastalhiju. Mnie taksama apranali takuju šubku, chutali ŭ puchovuju chustku».
Halinie cikava vyvučać historyju pa cackach.
«Da prykładu, samyja pieršyja cacki pavinny byli nieści ŭ masy idei kamunizmu, tamu jany ŭklučali ŭ siabie simvoliku savieckaj dziaržavy — sierp, mołat, piacikancovuju zorku. U kancy 30-ch hadoŭ u SSSR aktyŭna asvojvaŭsia Zapalarny kruh, u hety čas źjavilisia cacki ŭ vyhladzie biełych miadźviedziaŭ, pinhvinaŭ, chakieistaŭ i palarnikaŭ. U 1937-m hodzie dyryžabl SSSR ździejśniŭ rekordny pa praciahłaści palot u 130 hadzin, u honar hetaha była vypuščanaja jołačnaja cacka-dyryžabl. Paśla ašałamlalnaha pośpiechu filma «Cyrk» 1936 hoda rezka pavysiŭsia popyt na cacki, jakija pakazvajuć błazanaŭ, dresiravanych sabak, słanoŭ, miadźviedziaŭ.
Da jubileju Puškina, u 1949 hodzie, vypuścili sieryi ź piersanažami jaho kazak. U časy Chruščova (1950-1960-yja hady), kali asnoŭny ŭpor u Savieckim Sajuzie byŭ zrobleny na raźvićcio sielskaj haspadarki, u modu ŭvajšli cacki z vyjavaj harodniny — vinahrad, jabłyki, hrušy, limony, ahurki, pamidory, i, viadoma, kukuruza. U chruščoŭskija hady taksama byli vypuščanyja cacki ŭ vyhladzie ledziašoŭ, jakija simvalizujuć epochu «adlihi». U hety pieryjad u tematycy cacak stała mienš kamunistyčnaj prapahandy, a źjavilisia pradmiety pobytu: samavary, lampy, čajniki. Cikava, što pry Chruščovie pačali vypuskać mini-cacki, tamu što mnohija siemji sialilisia ŭ nievialikich «chruščoŭkach». Niekalki takich jość i ŭ majoj kalekcyi. Na maleńkich cackach namalavana toje, što i na vialikich, tolki ŭ minijaciury».
Papaŭniać svaju kalekcyju Halina praciahvaje i siońnia, ale ŭžo nie hetak aktyŭna. Źviazana heta, u pryvatnaści, z tym, što dastać kalekcyjnyja asobniki stanovicca ŭsio składaniej i ceny na ich rastuć z kožnym hodam.
«Ceny zaležać ad popytu. Siońnia jany vahajucca ŭ siarednim ad 20 da 100 rubloŭ za cacku. Košt na redkija asobniki moža dachodzić da niekalkich tysiač dalaraŭ».
Halina maryć sabrać usiu sieryju pa kazcy «Pryhody Čypalina» — 23 štuki. A taksama maryć stvaryć muziej jołačnaj cacki ŭ Biełaviežskaj puščy.
Ciapier ekspanaty z kalekcyi Haliny Žuk vystaŭleny ŭ etnahrafičnym i ŭ krajaznaŭčym muziejach Mahilova.
-
Chłopčyk, jaki viartaŭsia sa škoły ŭ mascy Jakuboviča i staŭ zorkaj tyktoku, raskazaŭ pra svoj prykoł
-
«Samy čas admyć hrachi». Baranavicki zavod paraškoŭ zrabiŭ seksualnuju kałabaracyju
-
«Na jaho 250 rubloŭ ja žyła šykoŭnaje žyćcio. A jamu nie chapaje!» Minčanka spračajecca z byłym mužam pra alimienty
Kim akazaŭsia toj biełarus, što ŭ adnych trusach napaŭ na palicejskich na Pchukiecie i raskidaŭ ich5
Kamientary