Radzina rezka adkazała Chalezinu: Paśla Płoščy-2010 my ŭsie trapili ŭ turmy, a Mikałaj — nie

Radzina piša, što intervju kiraŭnika Svabodnaha teatra Mikałaja Chalezina kanału TOK — «nastolki zanadta chłuślivaje», što jana nie moža nie adkazać.

Jana piša, što jaje ździŭlaje Chalezin, ź jakim jana asabista pracavała ŭ haziecie «Imia» i zatym u «Chartyi'97».

«Da samoha sajta Charter97.org hety čałaviek nikoli nie mieŭ dačynieńnia, zredku ŭ kancy 1990-ch — pačatku 2000-ch na našych staronkach źjaŭlalisia jaho aŭtarskija artykuły, ale nie bolš za toje. U 2005 hodzie jon stvaryŭ Svabodny teatr i dystancyjavaŭsia ad jakoj-niebudź palityčnaj i žurnalisckaj dziejnaści, — piša jana i dadaje. — Ale zaraz ja chaču spytać: što ty viarzieš, Mikoła?»

Jana admaŭlaje słovy Chalezina pra toje, što Nieŭźlin finansavaŭ Sańnikava i «Chartyju'97» z 2010 hoda.

«Zajava, što sajt «Chartyi'97» i vybarčuju kampaniju kandydata ŭ prezidenty Andreja Sańnikava ŭ 2010 hodzie finansavaŭ izrailski miecenat Leanid Nieŭźlin — poŭnaje hłupstva. I Chalezin vydatna viedaje, jak my, nie majučy praktyčna nijakich srodkaŭ, kinulisia jak u ataku ŭ hetuju kampaniju i praktyčna pieramahli ŭ joj.

Pa źviestkach niezaležnych naziralnikaŭ, lidar «Jeŭrapiejskaj Biełarusi» Sańnikaŭ tady vychodziŭ u druhi tur z Łukašenkam. Ale paśla Płoščy 19 śniežnia 2010 hoda my ŭsie trapili ŭ turmy. Chalezin, darečy, nie.

Napiaredadni hetych «vybaraŭ» byŭ zabity zasnavalnik sajtu «Chartyi» Aleh Biabienin, ja była fihurantkaj šmatlikich kryminalnych spraŭ i ŭrešcie była źbitaja i aryštavanaja ŭ dzień vybaraŭ aŭtamatčykami ŭ maskach razam z usimi žurnalistami.

Chalezin cudoŭna viedaje, jak ja paśla turmy i napiaredadni suda ŭciakała ź Biełarusi biez kapiejki ŭ kišeni. Jakimi ciažkimi byli maje ŭcioki biez pašparta, jaki ŭ mianie kanfiskavali ŭ turmie KDB. I jak my z kalehami potym adnaŭlali pracu sajta na emihracyi: spačatku ŭ Vilni, dziakujučy dapamozie litoŭskaha ŭrada, a potym i ŭ Varšavie, kudy nas zaprasiła Ministerstva zamiežnych spraŭ Polščy.

A ahučanaja Chalezinym infarmacyja ab kvatery byłoha palitviaźnia Źmitra Bandarenki — naohuł padsudnaja chłuśnia. Nijakaj kvatery ŭ Varšavie va ŭłasnaści Źmitra niama i nikoli nie było. A kvatera jahonaj žonki Volhi ŭ Minsku, dzie jon byŭ prapisany, niadaŭna była aryštavanaja biełaruskimi ŭładami», — piša Radzina.

Ale paźniej u publikacyi redaktarka «Chartyi'97» nie admaŭlaje dapamohi fonda Nieŭźlina. Ale źviartaje ŭvahu na inšaje.

«Adkul uziaŭsia naratyŭ pra «ruskaha aliharcha»? Leanid Nieŭźlin — hramadzianin Izraila, žyvie tam bolš za 20 hadoŭ, jon admoviŭsia ad rasijskaha hramadzianstva, źjaŭlajecca asabistym voraham dyktatara Pucina, prysudžany pucinskim sudom da pažyćciovaha źniavoleńnia.

I sapraŭdy, Nieŭźlin — moj siabar i čałaviek, jaki šmat zrabiŭ dla raźvićcia demakratyi ŭ mnohich krainach. U siońniašnich atakach na jaho i nieabhruntavanych abvinavačańniach ja baču ruku rasijskich śpiecsłužbaŭ, a ciapier, vidavočna, da hetych napadak aktyŭna dałučyŭsia i biełaruski KDB, adnačasova sprabujučy čarhovym razam źniščyć nienavisnuju «Chartyju», — śćviardžaje jana. 

Radzina piša, što nie choča dumać, što «Chalezin — častka płana režymu Łukašenki ŭ dyskredytacyi «Chartyi'97».

«U mianie niama inšaha łahičnaha tłumačeńnia, akramia jak padazravać, što ŭ Mikałaja pačaŭsia rańni starečy marazm i jon užo błytaje realnaść sa svaimi chvorymi fantazijami. Tamu što tolki čałaviek ź vidavočnymi adchileńniami ŭ psichicy budzie tak samazabyŭna chłusić, treścisia ad nianaviści i metanakiravana paklopničać na svaich byłych siabroŭ. Jak jamu dapamahčy? Pa starym siabroŭstvie mahu paraić dobraha lekara», — pierachodzić na abrazy Radzina.

• 11
• 5
• 4
• 25
• 0
• 0
• 0
• 0