Радзіна рэзка адказала Халезіну: Пасля Плошчы-2010 мы ўсе трапілі ў турмы, а Мікалай — не

Радзіна піша, што інтэрв'ю кіраўніка Свабоднага тэатра Мікалая Халезіна каналу ТОК — «настолькі занадта хлуслівае», што яна не можа не адказаць.

Яна піша, што яе здзіўляе Халезін, з якім яна асабіста працавала ў газеце «Имя» і затым у «Хартыі'97».

«Да самога сайта Charter97.org гэты чалавек ніколі не меў дачынення, зрэдку ў канцы 1990-х — пачатку 2000-х на нашых старонках з'яўляліся яго аўтарскія артыкулы, але не больш за тое. У 2005 годзе ён стварыў Свабодны тэатр і дыстанцыяваўся ад якой-небудзь палітычнай і журналісцкай дзейнасці, — піша яна і дадае. — Але зараз я хачу спытаць: што ты вярзеш, Мікола?»

Яна адмаўляе словы Халезіна пра тое, што Неўзлін фінансаваў Саннікава і «Хартыю'97» з 2010 года.

«Заява, што сайт «Хартыі'97» і выбарчую кампанію кандыдата ў прэзідэнты Андрэя Саннікава ў 2010 годзе фінансаваў ізраільскі мецэнат Леанід Неўзлін — поўнае глупства. І Халезін выдатна ведае, як мы, не маючы практычна ніякіх сродкаў, кінуліся як у атаку ў гэтую кампанію і практычна перамаглі ў ёй.

Па звестках незалежных назіральнікаў, лідар «Еўрапейскай Беларусі» Саннікаў тады выходзіў у другі тур з Лукашэнкам. Але пасля Плошчы 19 снежня 2010 года мы ўсе трапілі ў турмы. Халезін, дарэчы, не.

Напярэдадні гэтых «выбараў» быў забіты заснавальнік сайту «Хартыі» Алег Бябенін, я была фігуранткай шматлікіх крымінальных спраў і ўрэшце была збітая і арыштаваная ў дзень выбараў аўтаматчыкамі ў масках разам з усімі журналістамі.

Халезін цудоўна ведае, як я пасля турмы і напярэдадні суда ўцякала з Беларусі без капейкі ў кішэні. Якімі цяжкімі былі мае ўцёкі без пашпарта, які ў мяне канфіскавалі ў турме КДБ. І як мы з калегамі потым аднаўлялі працу сайта на эміграцыі: спачатку ў Вільні, дзякуючы дапамозе літоўскага ўрада, а потым і ў Варшаве, куды нас запрасіла Міністэрства замежных спраў Польшчы.

А агучаная Халезіным інфармацыя аб кватэры былога палітвязня Змітра Бандарэнкі — наогул падсудная хлусня. Ніякай кватэры ў Варшаве ва ўласнасці Змітра няма і ніколі не было. А кватэра ягонай жонкі Вольгі ў Мінску, дзе ён быў прапісаны, нядаўна была арыштаваная беларускімі ўладамі», — піша Радзіна.

Але пазней у публікацыі рэдактарка «Хартыі'97» не адмаўляе дапамогі фонда Неўзліна. Але звяртае ўвагу на іншае.

«Адкуль узяўся наратыў пра «рускага алігарха»? Леанід Неўзлін — грамадзянін Ізраіля, жыве там больш за 20 гадоў, ён адмовіўся ад расійскага грамадзянства, з'яўляецца асабістым ворагам дыктатара Пуціна, прысуджаны пуцінскім судом да пажыццёвага зняволення.

І сапраўды, Неўзлін — мой сябар і чалавек, які шмат зрабіў для развіцця дэмакратыі ў многіх краінах. У сённяшніх атаках на яго і неабгрунтаваных абвінавачаннях я бачу руку расійскіх спецслужбаў, а цяпер, відавочна, да гэтых нападак актыўна далучыўся і беларускі КДБ, адначасова спрабуючы чарговым разам знішчыць ненавісную «Хартыю», — сцвярджае яна. 

Радзіна піша, што не хоча думаць, што «Халезін — частка плана рэжыму Лукашэнкі ў дыскрэдытацыі «Хартыі'97».

«У мяне няма іншага лагічнага тлумачэння, акрамя як падазраваць, што ў Мікалая пачаўся ранні старэчы маразм і ён ужо блытае рэальнасць са сваімі хворымі фантазіямі. Таму што толькі чалавек з відавочнымі адхіленнямі ў псіхіцы будзе так самазабыўна хлусіць, трэсціся ад нянавісці і мэтанакіравана паклёпнічаць на сваіх былых сяброў. Як яму дапамагчы? Па старым сяброўстве магу параіць добрага лекара», — пераходзіць на абразы Радзіна.

• 13
• 6
• 4
• 25
• 0
• 1
• 0
• 0