«Hazpram» siońnia nakiravaŭ u AT «Małdovahaz» apaviaščeńnie, u jakim havorycca, što małdaŭskaja kampanija rehularna nie vykonvaje svaje apłatnyja abaviazacielstvy pa dziejnym kantrakcie, što źjaŭlajecca istotnym parušeńniem jaho ŭmoŭ.
U suviazi z hetym «Hazpram» z 8:00 maskoŭskaha času (supadaje ź minskim) 1 studzienia 2025 hoda całkam spyniaje pastaŭki hazu ŭ Małdovu.
«Abmiežavańnie budzie dziejničać datul, pakul PAT «Hazpram» piśmova nie paviedamić AT «Małdovahaz» pra inšaje. PAT «Hazpram» pakidaje za saboj usie svaje pravy, uklučajučy prava na adnabakovaje skasavańnie kantraktu i prava patrabavać z AT «Małdovahaz» kampiensacyi ŭsich strat i vypłaty štrafaŭ za nievykanańnie i/abo nienaležnaje vykanańnie AT «Małdovahaz» svaich abaviazacielstvaŭ pa kantrakcie», — zajaŭlaje «Hazpram».
Raniej u čakańni hetaha kroku z boku «Hazprama» ŭłady Małdovy z 16 śniežnia ŭviali nadzvyčajnaje stanovišča ŭ enierhietyčnaj śfiery terminam na 60 dzion.
Prezidentka Małdovy Maja Sandu zaklikała małdavan ekanomić elektraenierhiju:
«Ja viedaju, što ceny na enierhanośbity turbujuć mnohich. Urad robić usio mahčymaje, kab zabiaśpiečyć krainu elektraenierhijaj i hazam, a taksama dapamahčy małazabiaśpiečanym ludziam apłacić svaje rachunki. Ale my ŭsie možam zrabić heta praściej. Nievialikija źmieny ŭ našych štodzionnych zvyčkach mohuć mieć vialiki ŭpłyŭ-jany dapamahajuć nam ekanomić enierhiju i skaračać vydatki», — zajaviła Maja Sandu.
Jana prapanavała čaściej vyklučać śviatło, asabliva ŭ hadziny-pik. Taksama lidarka Małdovy prapanavała paźbiahać adnačasovaha vykarystańnia niekalkich elektrapryboraŭ i źnizić tempieraturu kandycyjaniera na adzin hradus.
«Razam my hodna pieražyviem hetuju zimu. Małdova zaŭsiody demanstravała, što jana macniejšaja, kali my salidarnyja», — dadała Sandu.
Premjer Małdovy Doryn Rečan papiaredziŭ, što choć zapasy hazu ŭ Małdovie jość, ale ŭ krainie mohuć uźniknuć prablemy z elektraenierhijaj.
«My maksimalna narościm abjom vytvorčaści — u nas jość niekatoryja reziervy, my budziem złučanyja z Rumynijaj, zmožam vykarystoŭvać liniju vysokaha napružańnia na poŭnačy, jana ŭraźlivaja, ale my vykarystoŭvajem usie srodki, kab pastaŭlać nieabchodnuju vam elektraenierhiju Małdovie».
Pry hetym rasijski haz sami ŭłady Małdovy nie zakuplali i raniej, jon išoŭ u prarasijskaje sieparatysckaje Prydniastroŭje, z ułasnymi samaabvieščanymi ŭładami. Adnak Kišynioŭ zakuplaŭ elektryčnaść z Małdaŭskaj HRES, jakaja znachodzicca na terytoryi Prydniastroŭja, i voś dla jaho vytvorčaści jakraz i vykarystoŭvaŭsia rasijski haz.
«Taksama my razhladajem i scenar vytvorčaści elektraenierhii na Małdaŭskaj HRES za košt hazu, jaki my kupim śpiecyjalna dla hetaha. Usio zaležyć ad cany hazu. Ale my bačym, što ceny na jeŭrapiejskim rynku pajšli ŭniz, tamu taki varyjant my razhladajem», — zajaviŭ Rečan 20 śniežnia.
Prydniastroŭje ž ciapier ryzykuje zastacca ŭvohule bieź ciapła. U Rasii jość mahčymaść pastaŭlać tudy haz praz transbałkanski trubapravod, ale Maskva nastojvaje, kab Kišynioŭ apłaciŭ zapazyčanaść za pastaŭki hazu ŭ minułyja hady. Ułady Małdovy. adnak, hety abaviazak nie pryznali, spasyłajučysia na vyniki mižnarodnaha aŭdytu, praviedzienaha ŭ 2023 hodzie na zamovu Kišyniova.
Pradstaŭniki samaabvieščanych uładaŭ Prydniastroŭja abviaścili, što 1 studzienia ŭ rehijonie adklučać aciapleńnie, ale elektryčnaść u im budzie, bo HES pieraviaduć na vuhal.
U Małdovie budzie ŭviedziena nadzvyčajnaje stanovišča ŭ enierhietycy na 60 dzion
Ułady Małdovy vyrašyli nie płacić «Hazpramu» doŭh pamieram 709 młn dalaraŭ
U Małdovie ŭrad padnimaje zarobki na 9%, nastaŭniki patrabujuć rostu na 35%
Premjer Słavakii pahražaje spynić pastaŭki elektraenierhii Ukrainie
Aŭstryja lohka zamianiła rasijski haz enierhijaj vietru
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1111
Kamientary