«Dumała, u Ziabraŭku prylacieła». Pad Homielem, imavierna, vybuchnuŭ bieśpiłotnik
Unačy 8 studzienia žychary paŭdniovych uskrain Homiela čuli mocny vybuch. Fłahštok sabraŭ dastupnyja źviestki.
Vybuch byŭ dobra čutny ŭ Navabielickim rajonie Homiela i pryharadnym pasiołku Čonki kala 2 hadzin nočy. Adna z krynic adznačyła sieryju vybuchaŭ, dźvie inšyja nazvali vybuch adzinočnym. Pavodle śviedčańniaŭ dvuch naziralnikaŭ, krynica huku znachodziłasia na poŭdni ad Homiela. Ahniavych uspyšak i śladoŭ hareńnia z žyłoj zabudovy zafiksavać nie ŭdałosia.
«Babach mocny byŭ z boku lesu na poŭdni ad Homiela. Abyšła vakoł i pahladzieła, ci nie prylacieŭ znoŭ šachied u Bielicu. Muž taksama čuŭ vybuch. Ale ŭspyšak nie było ni ŭ Bielicy, ni ŭ horadzie. Dumała, u Ziabraŭku prylacieła», — padzialiłasia ŭražańniami čytačka Fłahštoka.
Mahčymaje tłumačeńnie vybuchu
Ab tym, što vybuch moh być źviazany z padzieńniem udarnaha bieśpiłotnika, śviedčyć paviedamleńnie ŭkrainskaha manitorynhavaha kanała, źviazanaha sa słužbaj PPA Ukrainy, «Rinda monitoriť». Unačy 8 studzienia ŭ 1:43 pa minskim časie kanał paviedamiŭ pra pierasiačeńnie biełaruskaj miažy ŭdarnym BPŁA. Bieśpiłotnik ruchaŭsia ŭzdoŭž miažy Rasii i Ukrainy i pranik u pavietranuju prastoru Biełarusi praz rasijskuju miažu ŭ 1:43 (u paviedamleńni ŭkazany čas pa kijeŭskim časie) i nakiravaŭsia ŭ bok pasiołka Kruhaviec-Kalinina.
U kamientary Fłahštoku śpiecyjalist manitorynhavaha kanała paviedamiŭ, što ŭkrainskimi srodkami kantrolu pavietranaj prastory było zafiksavana, jak BPŁA pierasiek miažu ŭ rajonie «Troch siaścior» i dalacieŭ da Cierachaŭki, paśla čaho jaho sihnał byŭ zhubleny.
Z ulikam taho, što chutkaść palotu najbolš raspaŭsiudžanaha ŭdarnaha BPŁA Shahed-136 składaje 140—180 km/h, bieśpiłotnik moh dasiahnuć paŭdniovych uskrain Homiela i pa niejkich pryčynach upaści, paśla čaho zdetanavaŭ.
Łatuška: Ryžankoŭ maryć stać prezidentam Biełarusi i nienavidzić Łukašenku. Jon nie projdzie detektar chłuśni6
Kamientary