«Pačalisia frazy, čamu ja nie na vajnie». U Varšavie źbili biełaruskaha taksista — jaho pryniali za ŭkrainca
U Varšavie pasažyry napali na taksista ź Biełarusi: adzin z chłopcaŭ udaryŭ jaho pa hałavie, a dziaŭčyny aplavali. Padčas incydentu napadniki nazyvali Vasila (imia źmieniena) «ukrainskaj śvińnioj» i žadali jamu «pamierci na vajnie» — pasažyry čamuści vyrašyli, što jon ukrainiec. Biełarus užo padaŭ zajavu ŭ palicyju i raspavioŭ Most, čaho jon damahajecca.
Skrynšot videazapisu. Instagram dawid.dehnert
Jak pačaŭsia kanflikt
Kanflikt adbyŭsia 3 studzienia 2025 hoda. U toj dzień Vasil vioz dvuch chłopcaŭ i dźviuch dziaŭčat. Pajezdka pavinna była doŭžycca kala 25 chvilin, ale prablemy pačalisia amal adrazu.
Spačatku dziaŭčyna, jakaja siadzieła napieradzie, paprasiła dazvołu zakuryć elektronnuju cyharetu. Vasil suprać kureńnia ŭ sałonie, ale dazvoliŭ pry ŭmovie, što akno budzie adčyniena. Praź niekatory čas dziaŭčyna zamierzła i zakryła akno. Paśla hetaha jaje zacikaviła adklučanaja mahnitoła. Jana chacieła padklučyć svaju muzyku praz Bluetooth, ale Vasil adkazaŭ, što heta budzie adciahvać jaho ad kiravańnia.
«Zabyŭsia, jak pa-polsku budzie «pieradača»
Vidać, praviły Vasila razdražnili pasažyraŭ. Dziaŭčyna spytała, čamu jon suprać taho, kab jana praciahvała kuryć u zakrytym sałonie, bo havorka idzie tolki pra elektronnuju cyharetu. Vasil pasprabavaŭ rastłumačyć, što elektronnaja cyhareta hetak ža škodnaja, jak i zvyčajnaja. Jon chacieŭ raspavieści, što hladzieŭ pieradaču na hetuju temu, ale zabyŭsia, jak pa-polsku budzie «pieradača», i vykarystaŭ ruskaje słova. Tady kampanija zrazumieła, što jon ź inšaj krainy, i spytała, ci nie z Ukrainy.
— Ja adkazaŭ, što nie z Ukrainy, i dadaŭ, što heta nie maje dačynieńnia da našaj pajezdki.
Vasil miarkuje, što pasažyry mahli vyrašyć, što jon «nie choča pryznavacca».
— Pačalisia frazy, čamu ja nie na vajnie.
Vasil nie skazaŭ pasažyram, adkul jon rodam, patłumačyŭšy, što heta asabistaja infarmacyja, ale nastojvaŭ, što jon nie z Ukrainy.
«U adkaz cišynia. A potym — haz u tvar»
Pracujučy ŭ taksi ŭ Varšavie ŭžo paŭtara hoda, Vasil adznačaje, što bolšaść pajezdak prachodzić hładka, i ŭ cełym polskija pasažyry jamu padabajucca. Ale hety vypadak byŭ vyklučeńniem. Zrazumieŭšy heta, Vasil skazaŭ, što zavieršyć pajezdku ŭ pieršym biaśpiečnym miescy, a pasažyry zmohuć vyklikać inšaje taksi.
Pajezdka była apłačana kartaj u dadatku, i namier taksista pierapynić jaje aburyŭ maładych ludziej. Vasil rastłumačyŭ, što jany mohuć napisać rekłamacyju, kab im viarnuli hrošy. Maładyja ludzi skazali, što pastaviać Vasilu adnu zorku, ale jon nie admoviŭsia ich vysadzić.
Kali Vasil spyniŭsia ŭ biaśpiečnym miescy, pajezdka doŭžyłasia tolki čatyry chviliny. Pasažyry pakinuli aŭto, ale dziaŭčyna aplavała kiroŭcu i nazvała jaho «ŭkrainskaj śvińnioj». Adzin z chłopcaŭ udaryŭ pa mašynie — na joj zastałasia ŭvahnutaść.
Vasil uklučyŭ zapis na telefonie i paviedamiŭ, što vyklikaŭ palicyju. Ale nabrać numar jon nie paśpieŭ — dźviery mašyny adčynilisia, i klijenty viarnulisia. Adzin ź ich namataŭ šalik na hałavu.
— Ja spytaŭ: «Što ty chočaš?» U adkaz cišynia. A potym — haz u tvar, — apisvaje Vasil.
Dapamoha palicyi i pierśpiektyvy spravy
Napad spynili sihnały mašyny: pobač prajazdžaŭ patrul. Palicejskija spynili napadnikaŭ i vyklikali chutkuju dapamohu. Vasilu pamierali cisk, jaki skłaŭ 190, i zrabili MRT, jakoje pakazała adsutnaść surjoznych traŭmaŭ.
Vasil užo padaŭ zajavu ŭ palicyju i źviarnuŭsia ŭ fond Ponad podziałami, dzie jamu dapamahli aformić skarhu.
Juryst David Dechnert ličyć, što hety vypadak padpadaje pad artykuł ab dyskryminacyi, ale davieści ksienafobski matyŭ moža być składana. Vasil spadziajecca, što sprava pryciahnie ŭvahu da prablemy ksienafobii i biaśpieki taksistaŭ.
Łukašenka: U 2020 hodzie kala Pałaca Niezaležnaści nie pakistancy biehali20
Kamientary
połučajetsia fraza "ukrainskaja śvińja" eto normalka ? Pošioł takoj jurist v *upu. A kakoje otnošienije v poliklinikach ili hosinstitucijach... Etoho "iurist" nie znajet.