U niekatorych handlovych sietkach nizkakałaryjnyja napoi jašče možna znajści, ale jość adčuvańnie, što raspradajucca reštki.
![](http://nashaniva.com/img/w840d4webp1/photos/z_2025_01/pepsi250129-6pex8.jpg.webp)
Niekalki čytačoŭ Tochka.by paviedamili, što ŭ kramach Minska źnikli papularnyja siarod biełarusaŭ Pepsi i Coca-Cola biez cukru.
Kudy padziełasia Pepsi biez cukru?
Adzin z čytačoŭ žyvie ŭ Baraŭlanach. Małady čałaviek u apošnija miesiacy amal zaŭsiody kuplaŭ Pepsi biez cukru, ale niadaŭna niešta pajšło nie tak.
«Zaŭvažyŭ dziŭnyja rečy, jakija adbyvajucca ŭ kramach. Pepsi biez cukru źnikła z palic. Kali raniej jašče možna było znajści litrovuju butelku, to ciapier prablematyčna kupić navat blašanku 0,33 ł. U čym pryčyna?» — cikavicca jon.
Jašče adno paviedamleńnie dasłaŭ žychar minskaj Kamiennaj Horki. Jašče ŭ śniežni jon źviarnuŭ uvahu, što z palic kramaŭ źnikła impartnaja dyjetyčnaja koła.
«U našaj siamji tolki jaje i pili z haziroŭki. U kramie «Chit» skazali, što prablema nie ŭ ich, a ŭ pastaŭščyka. U «Ałmi» adkazali toje ž. Ci budzie ŭ nas znoŭ Pepsi biez cukru?» — pytajecca čytač.
Kab pierakanacca ŭ praŭdzivaści hetych śćviardžeńniaŭ, žurnalisty naviedali niekalki bujnych handlovych sietak.
U «Pierakryžavańni» na palicach zastałasia tolki kłasičnaja Pepsi u butelkach pa 1 i 1,5 ł. A voś u «Jeŭraopcie» Pepsi biez cukru nie znajšli ni ŭ jakim abjomie. Niama papularnaj amierykanskaj haziroŭki i ŭ dastaŭcy mnohich handlovych sietak.
Prablema jość
U Biełarusi ź lipienia 2015 hoda Pepsi vyrablajuć na zavodzie «Lidskaje piva». Žurnalisty źviazalisia z kampanijaj i paprasili prakamientavać situacyju.
«Źniknieńnie Pepsi biez cukru — źjava časovaja. Sam pradukt nikudy nie dzieniecca. Pryčyna — zatrymka ŭ vytvorčaści i łahistycy, ale chutka ŭsio adnavicca. Tym bolš što napoj jašče možna znajści ŭ niekatorych kramach» — raskazali karespandentu Tochka.by u AAT «Lidskaje piva».
Čarhovaja pastaŭka Pepsi biez cukru ŭ handlovyja kropki adbudziecca ŭ kancy nastupnaha tydnia. U kampanii zapeŭnili, što spažyŭcy biez pradukta nie zastanucca.
Amal usia syravina, nieabchodnaja dla vyrabu haziroŭki, — biełaruskaja. Vyklučeńnie — sakretny sirop, jaki zavozicca z-za miažy. Mahčyma, zatrymki ź jaho zakupkaj i stali pryčynaj prablem u «Lidskaha piva».
Z Coca-Cola, aproč pary kramaŭ, pakul bačnych prablem niama.
Kamientary