My možam tolki hadać pra toje, jaki raskład siłaŭ ciapier i jakoj situacyja stanie praz paru miesiacaŭ, piša Mikoła Buhaj.
My nie viedajem realnaj siły Rasii na siońnia. Ci Maskva pieramałoła svaje siły i hatovaja skončyć vajnu na hetaj linii, ci jana pa-raniejšamu ličyć siabie zdolnaj urešcie vyjści na pravy bierah Dniapra i pastavić pad kantrol Ukrainu całkam? Rasijskaja armija paniesła kałasalnyja straty ŭ žyvoj sile i technicy. Ale ci dastatkovyja, kab Kreml admoviŭsia ad zadačy-maksimum?
My nie viedajem, pa vialikim rachunku, i realnych mahčymaściej Jeŭrasajuza biez ZŠA. Ci zdolny byŭ by ES u adzinočku vieści zmahańnie za Ukrainu i Biełaruś dy procistajać Rasii, ci ES rassyplecca pad ciažaram takoj zadačy?
Miž tym adkaz na pytańnie pra dalejšaje raźvićcio padziej zaležyć ad hetych fundamientalnych raskładaŭ.
Navat samyja prostyja publičnyja sihnały ad novaha kiraŭnictva ZŠA prychodziać supiarečlivyja. To Tramp zvonić Pucinu cieraz hałavu Ukrainu i Jeŭropy. Heta akurat toje, čaho choča Maskva — dzialić śviet na traich, dzialić kantrol nad małymi i siarednimi dziaržavami, jak Hitler sa Stalinym ci Stalin z sajuźnikami ŭ časy Druhoj suśvietnaj. Niadaŭna Patrušaŭ akurat heta pastulavaŭ u svaim prahramnym artykule, «Naša Niva» pra jaho raskazvała. Praź dzień paśla zvanka ministr abarony ZŠA ŭžo zajaŭlaje, što Jeŭropa maje być za stałom pieramovaŭ, a Vens nie vyklučaje adpraŭki amierykanskich vojskaŭ va Ukrainu, choć i pavučaje jeŭrapiejskija elity ŭ Miunchienie pad ich ledzianoje maŭčańnie.
Poŭny zachop Ukrainy aznačaŭ by, ź vialikaj imaviernaściu, i likvidacyju dziaržaŭnaści Biełarusi ŭ vielmi chutkim časie, pa schiemie DNR i ŁNR. Łukašenka padrychtavaŭ usio dla taho, jon abiezhałoviŭ i źniasiliŭ hramadstva, a taksama razburyŭ procivahu — adnosiny z Zachadam, zachodni viektar. Tak jak Ukraina adzin na adzin niazdolnaja była b vystajać, tak i Biełaruś biez sajuza ci prynamsi adnosin z Zachadam nie vystaić.
A Ukraina — navat niahledziačy na podłaść Minska i abmiežavanaść padtrymki ZŠA i Jeŭropy — vystajała. Vytrymała Ukraina i try hady vajny paśla hetaha.
Pakul Ukraina, vosiemdziasiat pracentaŭ Ukrainy, stajać, niejkija reštki staroha, ad 1945 i 1991 hadoŭ, zvykłaha nam paradku zastajucca. Śviet nie viarnuŭsia jašče tatalna da «prava mocnaha», pry jakim lubuju Biełaruś ci Hrenłandyju moža zachapić toj, u kaho bolš zbroi.
My nie viedajem, ci pryvatnyja intaresy niejkich hrup u amierykanskaj elicie zdolnyja vybić z-pad noh śvietu i hetyja reštki paradku.
Ja bajusia, što koły, blizkija da Trampa, Rasija i Saudaŭskaja Aravija razam zacikaŭlenyja ŭ vysokich cenach na naftu, što stvaraje mocny supolny intares.
Ja bajusia, što ŭ ZŠA niama jasnaha płana, što rabić z Kitajem — jaki pieratvaryŭsia ŭ pahrozu svabodnamu śvietu, ale admovicca ad tannych tavaraŭ ź jakoha svabodny śviet nie hatovy.
My nie viedajem, jak daloka amierykanskaja administracyja hatovaja pajści ŭ svaim novym kursie, my nie viedajem, jaki heta kurs, i jašče pytańnie, ci sama administracyja maje jasnaje ŭjaŭleńnie, jak jany źbirajucca dziejničać. Pakul jany to ŭvodziać taryfy, to admianiajuć taryfy, to prynižajuć sajuźnikaŭ, to ŭschvalajuć praciŭnikaŭ.
Što da Biełarusi, to my na siońnia majem značeńnie dla Amieryki tolki ŭ kantekście taho, što im, zdajecca, usio ž chaciełasia b zachavać niezaležnaść Ukrainy — inakš chto ž i dzie im budzie daviarać, kali nie zdolejuć.
Vizit amierykanskaha dypłamata Śmita ŭ Minsk pakazaŭ, što Vašynhton pa-raniejšamu razhladaje Biełaruś samastojnym subjektam. Jašče ŭ bolšaj stupieni na heta ŭkazvaje jaho kamunikacyja sa Śviatłanaj Cichanoŭskaj jak hołasam biełaruskaha hramadstva.
Pabačym, ci dastatkova ŭžo mocny Jeŭrasajuz, kab u takoj situacyi procistajać Rasii sam adzin. Darečy, Mierc, imavierny budučy kancler Niamieččyny, vyhladaje davoli celnym čałaviekam i jasnym lidaram na fonie taho biaźlidarja, jakoje było niejki čas.
Ja dumaju, što ŭvohule mała chto što znaje pakul — navat u jeŭrapiejskich uradach. My zastajomsia ŭ situacyi poŭnaj niapeŭnaści i budziem u joj jašče niejki čas, ale pastupova infarmacyja budzie pranikać. A pakul treba prosta trymać našy bastyjony.
Vyjšaŭ na svabodu biełarus, jakoha ŭ svoj čas prysudzili da pažyćciovaha źniavoleńnia. Heta pieršy viadomy taki vypadak9
Kamientary
Ale, vidać, vam lahčej trymać bastyjony adviečna. Voś rekłamu zapuścili, mo j praz try miesiacy i z-za akijanu razmaroziać jusejdy.
A biełarusy žyvuć svaim žyćciom, jak i žyli!