U Polščy źbirajucca adkryć matematyčnuju škołu dla biełaruskich dziaciej

— Vy arhanizoŭvajecie matematyčnuju škołu dla biełaruskich i ŭkrainskich dziaciej. Skažycie, kali łaska, na jakoj stadyi vaša inicyjatyva?

— My padali prajekt na dadatkovaje finansavańnie, užo padrychtavanyja dakumienty. U naš prajekt uvajšli matematyka, fizika, prahramavańnie sa štučnym intelektam i finansavaja piśmiennaść. To-bok, my źbirajemsia vučyć dziaciej finansavaj piśmiennaści: jak u Polščy adbyvajecca padatkaabkładańnie, jak adkryvajecca bankaŭski rachunak, kali jaho možna adkryć, jakija vidy rachunkaŭ isnujuć. My chočam supracoŭničać z bankami, kab ich supracoŭniki pravodzili zaniatki, navat u anłajn-farmacie, ale kab prychodzili i tłumačyli dzieciam, jak pracuje biźnies, nakolki adkrytaja sistema. Tut jość zakon ab svabodzie haspadarčaj dziejnaści, što značna adroźnivajecca ad taho, što adbyvajecca pry režymie Łukašenki. Tamu my vielmi chočam, kab dzieci adčuli siabie svabodnymi ŭ hetym novym hramadstvie, čaho my sami ŭ ich vieku nie mahli adčuć. Nam daviałosia praz heta prajści i ciarpieć ciažkaści, kab mieć toje, što majem ciapier. I dziakuj bratam-palakam za toje, što jany pastajanna padtrymlivajuć nas, talerujuć i pamahajuć.

 — A chto budzie vykładać hetyja pradmiety — matematyku, fiziku, prahramavańnie sa štučnym intelektam i bankaŭskuju spravu, ja tak razumieju, finansavuju hramatnaść? Vy ŭžo zhadali, što damovilisia z bankaŭskimi supracoŭnikami. A što nakont inšych pradmietaŭ?

— Častku pradmietaŭ buduć vykładać polskija vykładčyki, bo navučańnie budzie na dvuch movach — polskaj i ruskaj, kab dzieci zasvojvali polskuju terminałohiju ŭ dakładnych navukach. A ź biełaruskaha boku — heta vykładniki, jakija paciarpieli ad represij, u tym liku byłyja vykładčyki z BDU, z kafiedry prykładnoj matematyki. Nam nie staje tolki fizikaŭ-jadzierščykaŭ — astatnija vykładniki ŭžo jość. Na žal, mnohim daviałosia źmianić prafiesiju, i zaraz jany, naprykład, dastaŭlajuć picu. Baluča na heta hladzieć, tamu my i arhanizujem škołu, kab ich viedy nie źnikli. Hetyja ludzi jašče maładyja, ale zamiest pracy pa śpiecyjalnaści jany zajmajucca fizičnaj pracaj.

My chočam, kab jany pieradali svaje viedy novamu pakaleńniu. Tym bolš, što ŭ śfiery štučnaha intelektu i prahramavańnia ŭ nas adnyja z najlepšych śpiecyjalistaŭ. Mnohija ź ich pracavali nad stvareńniem viadomych hulniaŭ suśvietnaha roŭniu. Naša ziamla bahataja na talenavitych ludziej. A razam z tymi, chto znachodzicca tut, u Polščy, my jašče ŭdvaja macniejšyja, jak adna vialikaja siamja.

Škoła pavinna adčynicca ŭ vieraśni 2025 hoda.

• 5
• 2
• 1
• 2
• 0
• 0
• 1
• 0