Ź jakimi miratvorčymi prapanovami Makron i Starmier jeduć u Vašynhton

U bližejšyja dni ŭ Vašynhtonie premjer-ministr Vialikabrytanii Kir Starmier i prezident Francyi Emanuel Makron pradstaviać Trampu płan raźmiaščeńnia zamiežnaha kantynhientu va Ukrainie ŭ vypadku dasiahnieńnia pahadnieńnia ab spynieńni ahniu pamiž Ukrainaj i Rasijaj.

Jeŭrapiejskaja prapanova zaklučajecca ŭ tym, kab pierakanać Trampa pahadzicca na abmiežavanuju vajennuju rolu Złučanych Štataŭ. Pra heta paviedamlaje The Wall Street Journal sa spasyłkaj na ŭłasnyja krynicy, piša «Suśpilnie».

Zhodna ź inicyjatyvaj, ZŠA mohuć nie raźmiaščać ułasnyja siły va Ukrainie, ale ŭ vypadku pahrozy z boku RF jeŭrapiejskija vojski pavinny zadziejničać sistemy supraćpavietranaj abarony i pryvieści ŭ bajavuju hatoŭnaść VPS susiednich krain. U zadačy brytanskich i francuzskich vojskaŭ uvojdzie abarona infrastruktury, haradoŭ i partoŭ u Čornym mory.

Pavodle krynic WSJ, biez padtrymki Trampa realizavać jeŭrapiejski płan adpraŭki miratvorcaŭ budzie składana.

Jeŭrapiejskija čynoŭniki zajavili, što Starmier płanuje abmierkavać hety płan z Trampam u čaćvier. Adznačajecca, što jon naŭrad ci źvierniecca z kankretnaj prośbaj ab amierykanskaj dapamozie.

Makron sustreniecca z Trampam u paniadziełak, 24 lutaha. Jon pavinien aznajomić Trampa z bolš šyrokimi pohladami sajuźnikaŭ na vajnu Rasii va Ukrainie.

Premjer-ministr Vialikabrytanii Starmier 16 lutaha 2025 hoda zajaviŭ ab hatoŭnaści raźmiaścić brytanskich vajskoŭcaŭ va Ukrainie dla zabieśpiačeńnia vykanańnia luboha mirnaha pahadnieńnia. Pra heta jon napisaŭ u kałoncy dla The Telegraph. Heta pieršy raz, kali jon prama zajaviŭ, što razhladaje takuju mahčymaść.

Pavodle słoŭ premjera, jon adčuvaje adkaznaść, źviazanuju z mahčymaściu pastavić pad pahrozu brytanskich vajskoŭcaŭ, ale dapamoha Ukrainie, pavodle jaho słoŭ, dapamoža ŭmacavać biaśpieku samoj Brytanii i ŭsiaho jeŭrapiejskaha kantynienta.

Adnak kancler Niamieččyny Šolc nazvaŭ dyskusiju pra heta zaŭčasnaj. Polšča zajaviła, što nie razhladaje mahčymaść adpraŭki vajskoŭcaŭ va Ukrainu dla padtrymki misii. Ministr abarony ZŠA Chiehsiet zajaviŭ, što amierykanskija vojski nie buduć raźmieščanyja va Ukrainie ŭ ramkach jakich-niebudź harantyj biaśpieki.

Na samicie ŭ Paryžy nie ŭdałosia damovicca pa pytańni miratvorcaŭ va Ukrainie.

Hałoŭnaje pytańnie, jakoje ŭźnikaje, kali dapuścić, što raźmiaščeńnie zamiežnych vojskaŭ usio ž adbudziecca, kolki mienavita ich budzie. New York Times adznačaje, što nazvanyja Zialenskim 100 tysiač čałaviek — nierealnaja ličba, bo heta bolš, čym usia brytanskaja armija. Vydańnie cytuje nienazvanaha jeŭrapiejskaha čynoŭnika, jaki zajaviŭ, što Jeŭropa nie zdoleje na hety momant sabrać navat 40 tysiač vajskoŭcaŭ.

• 2
• 0
• 3
• 1
• 0
• 0
• 0
• 0