Sańnikaŭ: ES pavinien pryznać pamyłkovaść svajoj biełaruskaj stratehii
U sieradu adbyłasia pres-kanfierencyja, pryśviečanaja aŭtorkavym pieratrusam u ofisach «Chartyi-97», «Narodnaj Voli», a taksama na pryvatnych kvaterach Natalli Radzinaj, Maryny Koktyš i Andreja Sańnikava.
Jeŭrasajuz pavinien pryznać, što niezaležnych sudoŭ i svabody presy ŭ Biełarusi nie isnuje, zajaviŭ lider hramadzianskaj inicyjatyvy «Jeŭrapiejskaja Biełaruś» Andrej Sańnikaŭ 17 sakavika na pres-kanfierencyi, arhanizavanaj u suviazi z praviedzienymi napiaredadni vobyskami ŭ niezaležnych žurnalistaŭ.
Akramia taho, ličyć Sańnikaŭ, «Jeŭrasajuz pavinien pryznać paražeńnie svajoj niaŭmiełaj palityki vychavańnia dyktatara».
«Reakcyja Jeŭrasajuza pavinna być adnaznačnaj: ES pavinien pryznać, što niezaležnych sudoŭ i svabody presy ŭ Biełarusi nie isnuje. Chopić hulać u hetyja hulni», — pierakanany palityk.
Sańnikaŭ ličyć, što praviedzienyja vobyski nie majuć nijakaha dačynieńnia da tak zvanaj «palaŭničaj spravy».
«Idzie palavańnie na najbolš papularnyja niezaležnyja ŚMI ŭ Biełarusi,
— zajaviŭ jon. — Ciapier iduć napady nie na žurnalistaŭ i palitykaŭ, a na ŭvieś biełaruski narod».
Pavodle słoŭ Sańnikava, Alaksandru Łukašenku «treba zabyć ciapier pra ŭsie zamiežnyja kredyty, tamu što naŭrad ci chtości ciapier zachoča finansavać dyktaturu».
Namieśnica hałoŭnaha redaktara haziety «Narodnaja vola» Maryna Koktyš, u jakoj taksama praviali vobysk, ličyć,
što heta ŭsio ž źviazana z «palaŭničaj spravaj».
«U hetaj situacyi žurnalistaŭ prosta chočuć zrabić krajnimi. Adbyłasia ŭciečka infarmacyi, iduć razborki pamiž dvuma viedamstvami, KDB i MUS, a žurnalistaŭ robiać krajnimi», — skazała žurnalistka.
Redaktar interniet-sajta «Chartyja'97» Natalla Radzina paviedamiła, što pra masavyja vobyski ŭžo apavieščanyja lidery krain Jeŭrasajuza, a taksama pravaabarončyja arhanizacyi, u tym liku «Reparciory bieź miežaŭ», Kamitet pa abaronie žurnalistaŭ, Mižnarodnaja asacyjacyja žurnalistaŭ.
16 sakavika supracoŭniki staličnaj milicyi praviali vobyski ŭ ofisie sajta «Chartyja'97», redakcyi haziety «Narodnaja vola», u kvatery žurnalistki Iryny Chalip i jaje muža Andreja Sańnikava, a taksama ŭ kvatery Maryny Koktyš. Va ŭsich vypadkach kanfiskavanyja sistemnyja błoki kampjuteraŭ i elektronnyja nośbity infarmacyi.
Vobyski pravodzilisia pa tak zvanaj «palaŭničaj spravie», u asnovie jakoj — kanflikt pamiž siłavymi strukturami ŭ Homielskaj vobłaści. Pa zajavie adnaho ź fihurantaŭ hetaj spravy — byłoha načalnika Upraŭleńnia KDB pa Homielskaj vobłaści Ivana Karža, jaki ciapier zajmaje pasadu načalnika UKDB pa Hrodzienskaj vobłaści, — raspačata jašče adna kryminalnaja sprava ab paklopie pa fakcie publikacyi artykułaŭ na hetuju temu ŭ šerahu ŚMI.
Heta ŭžo druhaja chvala vobyskaŭ u suviazi z «palaŭničaj spravaj» — pieršaja prajšła ŭ lutym.
Andrej Sańnikaŭ zajaviŭ, što adekvatnym adkazam na pieratrusy pavinien stać masavy ŭdzieł u demanstracyi na Dzień Voli.
Kamientary