У Літве затрымалі двух літоўцаў, якія працавалі на Беларусь: адзін з іх пранік у Саюз стралкоў
Генеральная пракуратура перадала ў суд крымінальную справу, у якой двое грамадзян Літвы абвінавачваюцца ў шпіянажы на карысць Беларусі. Падазраваныя самі прапанавалі супрацоўніцтва з беларускай ваеннай разведкай, а адзін з іх мэтанакіравана інфільтраваўся ў Саюз стралкоў, пры гэтым перадаваў не засакрэчаную інфармацыю, піша LRT.
Паводле звестак дасудовага расследавання, у маі 2022 года абодва абвінавачаныя адправіліся ў Мінск, дзе праз пасярэдніка дамовіліся аб кантактах і далейшым супрацоўніцтве з прадстаўнікамі вайсковых структур Беларусі.
У мэтах шпіянажу адзін з абвінавачаных уступіў у Літоўскі саюз стралкоў і стаў яго актыўным чальцом.
У ходзе расследавання было сабрана дастаткова дадзеных, якія дазваляюць меркаваць, што пасля гэтай сустрэчы да свайго затрымання ў лістападзе 2023 года абодва абвінавачаныя выконвалі заданні Галоўнага разведвальнага ўпраўлення Генеральнага штаба Міністэрства абароны Беларусі.
Паводле матэрыялаў справы, беларускае ГРУ было зацікаўлена ў атрыманні інфармацыі аб дыслакаванай у Літве вайсковай тэхніцы і ўзбраенні, якое належыць літоўскаму войску, добраахвотніцкім сілам нацыянальнай абароны, саюзнікам па НАТА; аб стратэгічнай інфраструктуры аб'ектаў і іх ахове; аб дзейнасці Літоўскага саюза стралкоў і зместу вучэнняў, якія ён праводзіў; аб дзейнасці беларускай апазіцыі ў Літве і яе ўдзельніках, а таксама аб грамадзянах Літвы, якія маглі б быць завербаваныя.
Хаця, як мяркуецца, інфармацыя, сабраная і перададзеная абвінавачанымі беларускаму ГРУ, не была засакрэчанай, яна ўяўляе каштоўнасць для ўзброеных сіл замежных дзяржаў пры падрыхтоўцы планаў ваеннай агрэсіі, а таксама выкарыстоўваецца для іншай дзейнасці, накіраванай супраць Літвы.
У цяперашні час да абодвух абвінавачаных прыменена самая строгая мера стрымання — арышт.
Максімальнае пакаранне за гэта злачынства — пазбаўленне волі тэрмінам да 15 гадоў.
Каментары